Lushimbi lwamuchivali 7:1-26
7 “Omu Yehova Kalunga kenu mwamingisa mulifuchi lize muli hakamwihi nakwingila mangana mulihete,+ mwakahangamo miyachi yayinene kumeso enu.+ Mwakahanga vaHete navaNgilingashe, navaAmole,+ navaKanane, navaPeliji, navaHivi, navaYevuse,+ miyachi yayinene 7 yakumihambakanenu kuvula nangolo.+
2 Yehova Kalunga kenu mwakavahana mumavoko enu, kaha namukavafungulula.+ Mukavanongesa vosena ndolokoto.+ Kanda namukalishika navo lushikoko chipwe kuvevwila kekeko.+
3 Kanda namukalimbachila navoko. Kanda namukahangisa vana venu vamapwevo kuli vana vavo vamalunga chipwe kumbachila vana venu vamalunga vana vavo vamapwevoko.+
4 Mwomwo navakazondola vana venu vakazeneke kukavangiza Kalunga, nakuputuka kuzachila tulunga veka.+ Kaha utenu waYehova naukeza hali enu nakuminongesa washi.+
5 “Oloze mukalinga ngana: Mukapuzula majiko avo akulumbila, mukachika jipanda javo jajila jamalolwa,+ mukateta jipanda javo jajila jamitondo,*+ nakwocha makombelo avo akusonga.+
6 Enu munapu muvatu vajila kuli Yehova Kalunga kenu, kaha Yehova Kalunga kenu namisakula mupwenga muvatu jenyi vakulipwila* havatu veka naveka vosena vali hano hamavu.+
7 “Keshi nge mwavulile chikuma havatu vosena vahamavu numba Yehova amizange nakumisakulako,+ enu mwapwile muvatu vavandende chikuma havatu vosena.+
8 Yehova amilowele nalivoko lyenyi lyangolo mangana amisokole muzuvo yaundungo,+ mulivoko lyaFwalo mwangana waEjipitu, mwomwo Yehova amizangile, kaha nawa asakile kulama lushingo alishingile kuli vakakuluka jenu.+
9 Munatachikiza kanawa ngwenu Yehova Kalunga kenu apwa Kalunga wamuchano, hiKalunga wakushishika. Eji kulamanga lushiko lwenyi nakusolola zangi yenyi yakwilila nakuchisemunwino chakusokesa likombakaji chavaze vamuzanga nakulama jishimbi jenyi.+
10 Oloze vaze vamuhunga mwakavashishishilamo hakuvanongesa.+ Keshi kukalangisa kuzangamisa vaze vamuhungako, mwakavashishishilamo.
11 Ngocho, lamenunga jishimbi, najindongi, namazu akuyula vize nguli nakumilweza likumbi lyalelo.
12 “Kachi nge namwivwililanga kumazu awa akuyula, nakuwalama, nakuwakavangiza, kaha Yehova Kalunga kenu mwakamisolwela zangi yenyi yakwilila nakulama lushiko luze alishikile kuli vakakuluka jenu.
13 Mwakamizanga, mwakamikisula nakumivulisa. Mwakamikisula hakumihana vana vavavulu,*+ nevi vyakusoka hamavu, manona, navinyo vyavihya, namaji.+ Kaha vangombe jenu, namikoko jenu, navapembe jenu navakasemunwina mulifuchi lize alishingile kuhana kuli vakakuluka jenu.+
14 Namukapwa vakukisula havatu vosena,+ kaha muli enu kamweshi kukapwa lunga chipwe pwevo chipwe chimuna mwakazeneka kusema vanako.+
15 Yehova mwakafumisa misongo yosena muli enu, kaha keshi kukaneha misongo yayipi yize mwatachikijile muEjipituko.+ Oloze mwakayineha hali vosena vaze vamihunga.
16 Kajihenu* vatu vosena vaze Yehova Kalunga kenu mwakamihana mumavoko enu.+ Enu* kanda mukavevwila kekeko.+ Kaha kanda mukazachila tulunga twavoko+ kuchina nachikapwa muheto kuli enu.+
17 “Kachi nge namukalyamba mumichima yenu ngwenu, ‘Vaka-mafuchi ano vatuhambakanetu kuvula, natuhasa kuvahanga ngachilihi?’+
18 Enu kanda namukavevwa womako.+ Kanukenu vyuma alingile Yehova Kalunga kenu kuli Fwalo navaEjipitu vosena.+
19 Yehova Kalunga kenu amilowele navipupu* vyavinene vize mwamwene nameso enu, navinjikizo, navyuma vyakukomwesa,+ nalivoko lyenyi lyaundume, lyangolo.+ Omu mukiko Yehova Kalunga kenu mwakalinga kuvatu vosena vaze namukevwa woma.+
20 Yehova Kalunga kenu mwakavazuzwisa nawoma, palanga nomu navakanonga vaze navakasalaho,+ vaze navakalisweka kumeso enu.
21 Kanda namukavevwa womako, mwomwo Yehova Kalunga kenu ali nayenu.+ Apwa hiKalunga wangolo, wakwivwisa woma.+
22 “Yehova Kalunga kenu mwakahanga vaka-mafuchi awa kumeso enu chikoki chikoki.+ Keshi kukamitavisa kuvanongesa washiko kuchina tunyama vamuchipapa navakamivulila nakumiyanjisa.
23 Yehova Kalunga kenu mwakahana vaka-kole mumavoko enu, kaha namukavafungulula nakuvanongesa ndolokoto.+
24 Navamyangana javo nawa mwakavahana mumavoko enu,+ kaha namukavanongesa nakukajimbangana majina avo hano hamavu.+ Kakweshi mutu mwakamimanyina nakoleko+ palanga nomu namukavanongesa vosena.+
25 Kochenu makombelo avo. Kanda namukafwila palata naulu+ yili hamakombelo avo akusonga, chipwe kuyimbatako kuchina nachikapwa muheto kuli enu,+ mwomwo vinapu vyaunyengwe kumeso aYehova Kalunga kenu.+
26 Kanda namukaneha vyuma vyaunyengwe mujizuvo jenuko, kuchina navakaminongesa ngana mwavikiko. Mukavivwila kupihya, mukavivwila unyengwe, mwomwo vinapu vyuma vyakutela kunonga.
Kwinyikila Chamwishi
^ Tala Mukana waMazu.
^ Chipwe “mupwenga muluheto lwenyi azanga.”
^ Hepe., “Mwakakisula mihako yamumajimo enu.”
^ Hepe., “Kenyekenu.”
^ Hepe., “Meso enu.”
^ Chipwe “navyeseko.”
