Lushimbi lwamuchivali 8:1-20
8 “Lamenunga jishimbi josena eji nguli nakumihana likumbi lyalelo, mangana muyoyenga,+ muvule, nakuheta lifuchi lize alishingile Yehova kuli vakakuluka jenu.+
2 Anukenu tunda yayisuku yize amitambukishile Yehova Kalunga kenu mupambo hamyaka eyi 40+ mangana aminyise, amyeseke,+ atachikize vyapwile mumichima yenu,+ numba nge namulama jishimbi jenyi nyi chiku.
3 Aminyishile, nakumyecha nazala,+ kaha amilishilenga mana+ yize mwazenekele enu kutachikiza navakakuluka jenu, mangana mutachikize ngwenu mutu keshi kuyoyela hambolo kahako, oloze nahamazu akufuma mukanwa kaYehova osena.+
4 Uvwalo wenu mwavwalile kawapulikileko, kaha mahinji enu nawa kawajimbileko hamyaka eyi 40.+
5 Munatachikiza kanawa mumichima yenu ngwenu Yehova Kalunga kenu amyolwelenga nge omu chisemi eji kwololanga mwanenyi.+
6 “Ngocho lamenunga jishimbi jaYehova Kalunga kenu, nakutambukanga mujijila jenyi, nakumwivwanga woma.
7 Mwomwo Yehova Kalunga kenu mwamingisa mulifuchi lyamwaza,+ lyavana vatulwiji vameya, namashima, natuselwoke vakuvweluka muvinema, nakujipili.
8 Lifuchi lyatiliku, nambale, namivinyo, namikuyu, namiloma,+ namaji amilive, nauchi.+
9 Lifuchi lyakulisala vyakulya, kaha kamweshi kukakalikizako. Hilifuchi lyamalolwa afwelu, lyajipili jize namukafula unengu.
10 “Omu namukalya nakwikuta, mukamwalisa Yehova Kalunga kenu halifuchi lyamwaza namihane.+
11 Kalilamenu kuchina namukavulyama Yehova Kalunga kenu hakuzeneka kulama jishimbi jenyi, namazu enyi akuyula nguli nakumilweza likumbi lyalelo.
12 Omu namukalya nakwikuta nakutunga jizuvo jamwaza nakutwamamo,+
13 nomu navakasemunwina vangombe jenu namikoko jenu nakuvula, nomu nayikavula palata yenu naulu wenu, nakupwa naluheto lwaluvulu chikuma,
14 kanda namukechelela michima yenu yikalivwimbe+ nakuvulyama Yehova Kalunga kenu uze amilowele mulifuchi lyaEjipitu, muzuvo yaundungoko.+
15 Ikiye amitambukishile mupambo+ yakwivwisa woma yikwechi manoka natuvwanda vaulembe, mupambo yakuhona meya. Alowele meya kulilolwa lyakukola.+
16 Amilishilenga mana+ mupambo, mana yize mwazenekele enu kutachikiza navakakuluka jenu, mangana aminyise,+ amyeseke, mukanganyale kulutwe.+
17 Kachi nge namukalyamba mumichima yenu ngwenu, ‘Ngolo jetu, namavoko etu akukanyama vikiko vinatuhetesa luheto kanelu,’+
18 kaha kanukenu ngwenu Yehova Kalunga kenu ikiye muka-kumihana ngolo numba mupwenga naluheto,+ mangana atesemo lushiko alishikile kuli vakakuluka jenu nge omu chili oholili ngana.+
19 “Kachi nge namukavulyama Yehova Kalunga kenu nakukavangiza tulunga veka, nakuvazachila, nakulifukula kuli vakiko, nangwambulula unjiho wakumipayisa likumbi lyalelo ngwami, namukafwa chikupu.+
20 Kachi nge namukazeneka kwivwilila mulizu lyaYehova Kalunga kenu,+ kaha Yehova mwakaminongesa nganomu ali nakunongesa vaka-mafuchi kumeso enu.
