Lushimbi lwamuchivali 9:1-29
9 “Ivwenu enu vaIsalele, likumbi lyalelo namuzauka Yotau+ nakuya nakufungulula vaka-mafuchi vakumihambakanenu kuvula, nangolo,+ vakwechi jinganda jajinene jajikembwe jakuheta namwilu,+
2 vanapu vatu vangolo, vakutaluka, vana vavaAnake,+ vaze mwatachikiza, vaze mwevwa lyehi navavahanjika ngwavo, ‘Iyaze mwahasa kwimana kumeso avana vavaAnake?’
3 Ngocho tachikizenu likumbi lyalelo ngwenu Yehova Kalunga kenu mwazauka kulutwe lwenu.+ Napu kakahya kakunongesa,+ kaha mwavanongesa vosena. Mwakavafungulula kumeso enu mangana mukavahangemo washi nakuvanongesa, ngana muze amishikile Yehova.+
4 “Omu Yehova Kalunga kenu mwakavahanga kumeso enu, kanda namukahanjika mumichima yenu ngwenu, ‘Hakwoloka chetu hakiko natunehela Yehova mangana tuhete lifuchi linoko.’+ Oloze Yehova navahange vaka-mafuchi kumeso enu mwomwo yavilinga vyavo vyavipi.+
5 Keshi nge hakwoloka chenu chipwe hakusungama chamichima yenu hakiko namuyila nakuheta lifuchi lyavoko nduma. Oloze havilinga vyavo vyavipi hakiko mwavahangila Yehova Kalunga kenu kumeso enu,+ mangana Yehova atesemo vyuma alishingile kuli vakakuluka jenu vaApalahama,+ naIsaka,+ naYakova.+
6 Shikaho tachikizenu ngwenu keshi nge hakwoloka chenu hakiko mwamihanyina Yehova Kalunga kenu lifuchi lyamwaza nakulihetako. Enu mwapwa muvatu vakukakama michima.*+
7 “Kanda namuvulyama omu mwasangumwine Yehova Kalunga kenu mupamboko.+ Munalikangenga kuli Yehova kufuma vene kulikumbi lize mwalovokole mulifuchi lyaEjipitu swi nomu mumunahete kuchihela chino.+
8 Omu mwapwile kuHoleve nawa mwamusangumwine Yehova, kaha apihililile nayenu nakusaka kachi aminongese muvosena.+
9 Omu ngwakandukile kupili nakutambula malolwa akuya muuhanda,+ malolwa alushiko luze amishikile Yehova,+ ngwatwamine kupili makumbi 40 namusana naufuku.+ Kangwalile vyakulya chipwe kunwa meyako.
10 Jino Yehova anguhanyine malolwa avali akuya muuhanda akusoneka namunwe wenyi, aze apwile namazu osena ahanjikile Yehova kuli enu kupili mukakahya halikumbi lize mwalikungulwile.+
11 Omu akumine aze makumbi 40 namusana naufuku, Yehova anguhanyine malolwa avali akuya muuhanda, malolwa alushiko.
12 Yehova angwambile ngwenyi: ‘Katuka, shikumuka washi hamavu, mwomwo vatu jove walowele muEjipitu vanalumbuka.+ Vanapyapumuka washi mujila ngwavalwezele kuya. Vanalitengela vavene likombelo lyakuzuzulula.’+
13 Jino Yehova ambile kuli ami ngwenyi: ‘Ngunamono ngwami vatu kanava vanapu vakukakama michima.*+
14 Shikaho mana nguvanongese vosena, ngujimbangane majina avo hano hamavu, kaha nangukulingisa ove kupwa umuyachi waunene, wangolo kuhambakana vakiko.’+
15 “Jino ngwashikumukile hamavu kufuma kupili oku yili nakuwema nakakahya.+ Kaha ngwakwachile aze malolwa alushiko avali mumavoko ami.+
16 Kahomu ngwamitalile, ngwamwene ngwami munalingi shili kumeso aYehova Kalunga kenu. Munalitengela mwanangombe wakuzuzulula. Munapyapumuka washi mujila yize amilwezele Yehova.+
17 Kaha aze malolwa avali akuya muuhanda apwile mumavoko ami, ngwawambilile hamavu kumeso enu.+
18 Ngwalifukwile kuli Yehova makumbi 40 namusana naufuku ngana muze ngwalingile hakavanga. Kangwalile vyakulya chipwe kunwa meyako+ mwomwo yashili yenu mwalingile hakulinga vyuma vyavipi kumeso aYehova nakumwivwisa kupihya.
19 Kaha ngwevwile woma mwomwo Yehova amikwachilile utenu nakusaka kachi aminongese.+ Oloze halwola kanelu Yehova angwivwililile cheka.+
20 “Yehova apihililile naAlone nakusaka kachi amunongese,+ oloze ngwamulembeleleleko.
21 Kaha ngwambachile chize chuma chaunyengwe mwatengele, uze mwanangombe+ waulu nakumumbila mukakahya. Ngwamupazwile nakumutwa palanga nomu achikikile nakupwa lukungu. Kaha luze lukungu ngwalumbilile mumwanakalwiji uze afumine kupili.+
22 “Kaha nakuTavela+ nawa, nakuMasa,+ nakuKivilote-hatava+ mwasangumwine Yehova evwenga matoto.
23 Omu Yehova amitumine kufuma kuKateshe-mbalaneya,+ amyambile ngwenyi, ‘Katukenu, muyenga nakuheta lifuchi lize nangumihana.’ Oloze enu mwalikangile cheka kumazu aYehova Kalunga kenu,+ kamwamufwelelele+ nakumwononokako.
24 Munalikangenga lika kuli Yehova kufuma vene haze ngwamitachikijile.
25 “Ngwalifukwile kumeso aYehova makumbi 40 namusana naufuku,+ ngwalingile ngocho mwomwo Yehova ambile ngwenyi mwaminongesa muvosena.
26 Kaha ngwamulembelelele Yehova ngwami, ‘Ove Mwata Wakulitulaho Yehova, kanda unongesa vatu joveko. Vanapu hiluheto lwove,*+ ava wasokwele naunene wove, nakuvalovola muEjipitu nalivoko lyove lyangolo.+
27 Anuka vangamba jove vaApalahama, naIsaka, naYakova.+ Kanda utala hakunjinjavala chavatu kanava, nahakuhuka chavo, nahashili yavoko.+
28 Kuchina vatu vamulifuchi lize watulowele navakamba ngwavo: “Yehova ahonene kuvengisa mulifuchi lize avashikile. Hakuwana nge avahungile, shikaho avalowele nakuvatwala mupambo mangana akavajihilemo.”+
29 Ava vanapu vatu jove, hiluheto lwove,*+ ava walowele nangolo jove nalivoko lyove lyaundume.’+
Kwinyikila Chamwishi
^ Hepe., “vakukakama jishingo.”
^ Hepe., “vakukakama jishingo.”
^ Chipwe “hiuswana wove.”
^ Chipwe “hiuswana wove.”
