Lute 1:1-22
1 Jino hamakumbi aze vayulilenga vaka-kuyula,+ mulifuchi mwengilile zala yakalombolombo. Kaha lunga umwe afumine kuMbetelema+ muYuta nakuya nakuzuzumana mulifuchi lyaMowave.+ Ayile napwevo lyenyi navana venyi vamalunga vavali.
2 Lunga kana ikiye Elimeleke,* pwevo lyenyi apwile Nowemi,* kaha vana venyi vamalunga vavali vapwile Malone* naKiliyone. Vapwile vaka-Efwalata vakuMbetelema muYuta. Vahetele mulifuchi lyaMowave, kaha vatwaminenga muze.
3 Kutwala muze, Elimeleke lunga lyaNowemi afwile, ngocho Nowemi asalile navana venyi vavali.
4 Kufumaho ava vana vambachile mapwevo vavaMowave. Umwe lijina lyenyi apwile ikiye Olopa, mukwavo apwile ikiye Lute.+ Kaha vatwamine kuze myaka kafwe 10.
5 Kutwala muze, Malone naKiliyone navakiko vafwile, ngocho ou pwevo asalile uka wenyi chakuzeneka vana chipwe lunga lyenyi.
6 Shikaho akatukile mulifuchi lyaMowave navanayewenu mwomwo omu apwile mulifuchi kana evwile ngwavo Yehova nalakana vatu jenyi nakuvahana vyakulya.*
7 Afumine kuchihela kuze atwaminenga, ayile hamwe navanayewenu vosena vavali. Omu vatambukilenga ungeji wavo wakukinduluka kulifuchi lyaYuta,
8 Nowemi ambile kuli vanayewenu ngwenyi: “Yenunga, kindulukenu mutu himutu kuzuvo yanaye. Yehova amisolwele zangi yakwilila+ ngana muze mwasolwele zangi kana kumalunga jenu vaze vanafu nakuli ami.
9 Yehova amikafwe* muvosena mukawane malunga mangana mukapwe vakukingiwa.”*+ Kufumaho avasweswenyele, kaha valilile namazu akukanguka.
10 Vamwambile ngwavo: “Nduma, natuya nayove kuvatu jove.”
11 Oloze Nowemi ambile kuli vakiko ngwenyi: “Enu vana vami, kindulukenu. Ikaze namuyila nayami? Uno ngunahase kusema cheka vana vamalunga vakwamba ngwami navakamimbata nyi?+
12 Enu vana vami, kindulukenu. Yenunga mwomwo ngunakolo, shikaho kangweshi kuhasa kusombokako. Numba nge ngwapwanga nalutalililo ngwami nanguwana lunga wakungumbata lelo naufuku, nakusema nawa vana vamalunga,
13 kutala munahase kuvavandamina palanga noho navakakolela tahi? Kutala namutwama lika muujike nakuvavandamina tahi? Nduma enu vana vami, nguli nakulyonyinga chikuma hali enu mwomwo Yehova nangumwenesa vihuli.”+
14 Kaha valilile cheka namazu akukanguka. Kufumaho, Olopa asweswenyele nayewenu, kaha ayile. Oloze Lute amukakachilile.
15 Jino Nowemi amwambile ngwenyi: “Tala, muhalika wove nakinduluka kuvatu jenyi nakutulunga twenyi. Yakonga namuhalika wove.”
16 Oloze Lute amwambile ngwenyi: “Kanda naungushinjila ngukuseze nakuzeneka kukukavako. Mwomwo kweshokwo nauya kukiko nanguya nayami. Kweshokwo naukasavala kukiko nangukasavala nayami. Vatu jove navakapwanga vatu jami, kaha Kalunga kove mwakapwanga Kalunga kami.+
17 Kweshokwo naukafwila kukiko nangukafwila nayami, kaha kukiko vene navakangufunda. Kufwa chikiko kaha nachikatuhandununa. Kachi nge nangukechelela chuma cheka chikatuhandunune, kaha Yehova akanguzangamise mwamunene.”
18 Omu Nowemi amwene ngwenyi Lute namukakachila ayenga nenyi, alitwaminyine kumushinjila akinduluke.
19 Ngocho vatambukile ungeji wavo palanga nomu vahetele kuMbetelema.+ Kahomu vahetele, vatu vosena munganda vazungumukile hakuvamona. Mapwevo vambilenga ngwavo: “Uno Nowemi vene ou?”
20 Oloze ikiye avambilenga ngwenyi: “Kanda namungusanyika ngwenu Nowemiko.* Ngusanyikenu ngwenu Mala,* mwomwo ou Wangolo Josena nangumwenesa vihuli.+
21 Ngwapwile navyuma vyavivulu omu ngwayile, oloze Yehova nangulingisa ngukinduluke mavokovoko. Ikaze namungusanyikila ngwenu Nowemi okunyi Yehova nangwimanyina nakole, ou Wangolo Josena nangumwenesa lupi?”+
22 Omu mukiko akindulukile Nowemi nanayewenu Lute, pwevo wakaMowave kufuma kulifuchi lyaMowave.+ Vahetele muMbetelema kumaputukilo angonde yakwaha mbale.+
Kwinyikila Chamwishi
^ Ulumbunwiso, “Kalunga Kami Apwa Mwangana.”
^ Ulumbunwiso, “Kuwaha Chami.”
^ Pamo lyafuma kulizu lyachiHepeleu lize lyalumbununa “kuzeya; kuviza.”
^ Hepe., “mbolo.”
^ Chipwe “amihane wana.”
^ Hepe., “mukapwe chihela chakunokela.”
^ Ulumbunwiso, “Kuwaha Chami.”
^ Ulumbunwiso, “Kusasa.”
