Lute 2:1-23
2 Jino Nowemi apwile nakausoko kalunga lyenyi waluheto chikuma. Lijina lyenyi apwile ikiye Mbowaze,+ apwile wakutanga yaElimeleke.
2 Likumbi limwe, Lute pwevo wakaMowave ambile kuli Nowemi ngwenyi: “Ngwitavise nguyenga mumande ngukahuhwojole+ kulya chamanona vanaseze vaka-kwaha vaze navangwivwila uselewa.” Kaha amwambile ngwenyi: “Yakonga mwanami.”
3 Ngocho ayile, kaha engilile muwande umwe nakuputuka kuhuhwojola kulya chamanona munyima yavaka-kwaha. Jino chakuzeneka kutachikiza, engilile muwande waMbowaze+ uze apwile wakutanga yaElimeleke.+
4 Kaha Mbowaze ejile kufuma kuMbetelema, ambile kuli vaka-kwaha ngwenyi: “Yehova apwenga nayenu.” Kaha vakiko vamwambile ngwavo: “Yehova akukisulenga.”
5 Jino Mbowaze ambile kuli mukweze uze apwile kapitau kavaka-kwaha ngwenyi: “Ou mwanapwevo nafumu kutanga yeya?”
6 Kaha uze mukweze amukumbulwile ngwenyi: “Ou mwanapwevo apwa kaMowave+ uze eza naNowemi kufuma kulifuchi lyaMowave.+
7 Angulombanga ngwenyi: ‘Ngwitavise nguhuhwojole+ nakunonojola hamikuta yakulya chamanona munyima yavaka-kwaha.’ Ngocho nazate kufuma kuchimene ezanga palanga noholyapwa. Ali nakunokako jino chindende mukapundo.”
8 Mbowaze ambile kuli Lute ngwenyi: “Ove mwanami, ivwilila. Kanda nauya nakuhuhwojola muwande wekako. Kanda naufuma munoko. Pandama kwakamwihi navangamba jami vamapwevo.+
9 Nyingilila weshowo wande navaya nakwaha mangana uvakavangize. Vakweze ngunavalweze ngwami kanda navakukwatako.* Kaha nge unevu lipwila, yako kumilondo ukanwe meya aze vanaswichi vakweze.”
10 Lute afukamine hamavu nakulifukula. Ambile ngwenyi: “Ika yinakulingisa ungwivwile uselewa nakunguzakama okunyi ami ngumutu wakulifuchi lyeka?”+
11 Mbowaze amwambile ngwenyi: “Vanangulweze mujimbu wavyuma vyosena unalingi kuli nokowenu kufuma hakufwa chalunga lyove. Nomu unaseze iso, nanoko, nalifuchi lyavausoko wove nakwiza nakutwama navatu vaze kawatachikizako.+
12 Yehova akufwete havyuma vyamwaza unalingi.+ Yehova Kalunga kaIsalele uze ukwechi mavava uneza nakuswamamo akuhane fweto yakukupuka.”*+
13 Kaha Lute amwambile ngwenyi: “Ove mwata, ngwivwile lika uselewa mwomwo unanguvendejeka nakuhanjika mazu anahete kumuchima wayami ngamba yove, numba tuhu kangweshi nguumwe wavangamba joveko.”
14 Jino kuheta hakulya, Mbowaze ambile kuli Lute ngwenyi: “Twaya kuno ulyenga mbolo nakutata chihanda chambolo yove muvinangele.”* Ngocho Lute atwamine kwakamwihi navaka-kwaha. Mbowaze amuhanyine manona akwocha, kaha alile nakwikuta nakusezaho.
15 Kufumaho akatukile nakuya nakuhuhwojola.+ Jino Mbowaze alwezele vakweze jenyi ngwenyi: “Mwechenu anonojole nahamikuta yakulya chamanona chize munahe lyehi, kanda namumuyanjisako.+
16 Musomwenenu nawa visachi vimwe hamikuta yakulya chamanona, muselenuvyo munyima mangana ahuhwojole. Kanda namumukanyisako.”
17 Shikaho ahuhwojwele lika muwande palanga nakuchingoloshi.+ Azungwile vize ahuhwojwele, kaha vyatesekele mulifwa* limwe lyambale.
18 Jino ambachile yize mbale nakuya munganda, kaha nayewenu amwene mbale yize ahuhwojwele. Lute ambachile kulya chize aseleho,+ achihanyine nayewenu.
19 Jino nayewenu amwambile ngwenyi: “Lelo wayanga nakuhuhwojwela kulihi? Kulihi wayanga nakuzachila? Vamukisule ou akuzakamanga.”+ Kaha alwezele nayewenu kuwande wamutu uze azachilile. Amulwezele ngwenyi: “Lijina lyalunga uze ukwechi wande ngunazachila lelo ikiye Mbowaze.”
20 Nowemi ambile kuli nayewenu ngwenyi: “Lunga kana vamukisulenga kuli Yehova ou nasolwela vavatonyi navafu+ zangi yakwilila.” Nowemi ambile cheka ngwenyi: “Ou lunga apwa kausoko ketu,+ umwe wavava vaka-kutusokola.”*+
21 Kaha uze kaMowave Lute ambile ngwenyi: “Angulwezanga nawa ngwenyi, ‘Pandama kwakamwihi navangamba jami vamapwevo palanga nomu navakumisa kwaha mande ami osena.’”+
22 Ngocho Nowemi ambile kuli nayewenu Lute ngwenyi: “Ove mwanami, nachiwaha kuyanga navangamba jenyi vamapwevo kuhambakana kuya mumande eka vakakukokojwese.”
23 Ngocho apandaminenga kwakamwihi navangamba jaMbowaze, ahuhwojwelenga kulya chamanona palanga nomu ngonde yakwaha mbale+ natiliku yakumine. Kaha atwaminenga lika nanayewenu.+
Kwinyikila Chamwishi
^ Chipwe “kanda navakutangulako.”
^ Chipwe “fweto yakutamo.”
^ Vinangele vyapwa vyakunwa vingangamina vize vyafuminenga kuvinyo vyavisasu chipwe kuwala weka.
^ Kafwe jilita 22. Tala Chihande B14.
^ Chipwe “umwe wavava vakwechi ngolo jakutusokola (jakutulwila).”
