Lute 3:1-18
3 Jino Nowemi ambile kuli nayewenu ngwenyi: “Ove mwanami, ikaze nanguzenekela kukutondela zuvo*+ mangana utwamenga kanawa?
2 Mbowaze uze ukwechi vangamba jenyi vamapwevo vaze wapwanga navo apwa kausoko ketu.+ Kaha lelo naufuku ali nakupepa mbale kuchizungwilo.
3 Ngocho sana, likwite maji alivumba lyamwaza nakuvwala kanawa* mangana uyenga kuchizungwilo. Kanda naukalijimbula kuli uze lungako palanga nomu mwakakumisa kulya nakunwa.
4 Kahomu mwakasavala, ukanyingilila kuze mwakaya nakusavala. Ukayako ukamufukunune kumahinji nakusavala. Kaha ikiye mwakakulweza vyuma watela kukalinga.”
5 Lute amwambile ngwenyi: “Nangulinga vyuma vyosena unangulweze.”
6 Kaha ashikumukile kuchizungwilo, alingile vyuma vyosena amulwezele nayewenu.
7 Jino Mbowaze alile nakunwa, kaha awahililile mumuchima wenyi. Kufumaho ayile nakusavala kusongo yamulumba wambale. Jino Lute alivembele nakwiza kuli ikiye, amufukunwine kumahinji enyi nakusavala.
8 Kuheta mukachi kaufuku, uze lunga aputukile kulichikimina. Ngocho ahindukile, atalile kumahinji enyi, kaha amwene kunasavala pwevo.
9 Amwambile ngwenyi: “Yove iya?” Kaha Lute amukumbulwile ngwenyi: “Yami ngamba yove Lute. Tanduula chikuto chove ungufwike ami ngamba yove, mwomwo ove ukausoko ketu uze nahase kutusokola.”+
10 Kaha Mbowaze amwambile ngwenyi: “Ove mwanami, Yehova akukisule. Zangi yakwilila unasolola oholili yinatoho kuhambakana yize wasolwele kunyima,+ mwomwo kawayile nakutonda lunga hali vakweze vakuhutwa chipwe valuhetoko.
11 Ngocho ove mwanami, kanda nawivwa womako. Nangukulingila vyeshovyo nausaka,+ mwomwo vatu vosena munganda* vanatachikiza ngwavo ove wapwa upwevo wamwenemwene.
12 Numba tuhu ami ngukausoko kenu uze nahase kumisokola,+ oloze kuli kausoko kenu weka uze napandama chikuma kuli enu kuhambakana ami.+
13 Savala kuno ufuku wosena, omu nakucha nachimene, nge mwetavila kukusokola, kaha nachiwaha.+ Oloze nge kasakileko, kahomu ayoya Yehova tu, ami nangukusokola. Savala kuno palanga nomu nakucha.”
14 Ngocho Lute asavalile kumahinji aMbowaze palanga nomu kwachele, kaha ahindukile muze pulundundu kuchina navamumona. Mbowaze amulwezele ngwenyi: “Vatu kanda navatachikiza ngwavo kuno kuchizungwilo kwezanga pwevoko.”
15 Mbowaze amwambile cheka ngwenyi: “Neha ocho chikuto unalikupilika, chitanduule.” Ngocho achitanduwile, kaha amuhingunwinyineho vyesekelo vyambale 6.* Amutwikile, kaha Mbowaze ayile munganda.
16 Omu Lute ahetele kuli nayewenu, amwihwile ngwenyi: “Ove mwanami, ngachilihi oku wayanga?”* Kaha amuhichililemo vyuma vyosena amulingilile uze lunga.
17 Amulwezele cheka ngwenyi: “Nanguhane evi vyesekelo vyambale 6, mwomwo ambanga ngwenyi, ‘Kanda nauya kuli nokowenu mavokovokoko.’”
18 Kaha Nowemi amwambile ngwenyi: “Ove mwanami, vandamina umone omu naviya vyuma, mwomwo uze lunga keshi kunokako, kuvanga amanyise chuma kana likumbi lyalelo.”
Kwinyikila Chamwishi
^ Hepe., “chihela chakunokela.”
^ Chipwe “nakuvwala uvwalo wove wahelu.”
^ Hepe., “mwomwo vikolo vyavatu jami vyosena.”
^ Pamo jishiya 6, chipwe jilita kafwe 44. Tala Chihande B14.
^ Hepe., “Ove mwanami, yove iya?”
