Lute 4:1-22
4 Jino Mbowaze ayile kuchikolo changanda,+ atwamine kuze. Kaha kausoko kavo uze avulukile+ apwile nakuhita mujila. Jino Mbowaze amwambile ngwenyi: “Ove mukwetu, hichila kuno, twama aha.” Kaha achekunukile nakwiza nakutwama.
2 Kufumaho, Mbowaze asanyikile vakulwane vamunganda 10.+ Avambile ngwenyi: “Twamenu aha.” Kaha vatwamine.
3 Mbowaze ambile kuli uze kausoko kavo+ ngwenyi: “Nowemi uze nakinduluka kufuma kulifuchi lyaMowave+ ali nakulanjisa musuka wamavu uze wapwile wandumbwetu Elimeleke.+
4 Shikaho ami ngwashinganyekanga kukulwezako ngwami, ‘Musuka kana uulande hameso avatu vosena nahameso avakulwane javatu jami.+ Kachi nge nauulanda, kaha ulande. Oloze nge kaweshi kuulandako, kaha ngulweze mangana ngutachikize. Mwomwo ove yove mutu wakulivanga uze ali nalisesa lyakuulanda, kaha ami yami ngunashishi kuli ove.’” Ngocho uze lunga ambile ngwenyi: “Nanguulanda.”+
5 Jino Mbowaze ambile ngwenyi: “Tachikiza ngwove ou musuka wamavu wapwa waNowemi nauze kaMowave Lute, pwevo lyambozo. Ngocho musuka kana nauulanda kuli vosena vavali mangana uswana wayou mbozo upwenga lika mulijina lyenyi.”+
6 Uze kausoko kavo ambile ngwenyi: “Kangweshi kuhasa kuulandako, kuchina nangwenyeka uswana wami. Ngunakuhane lisesa lyakuulanda, ngocho ulande yove mwomwo ami kangweshi kuhasa kuulandako.”
7 Omu mukiko valingilenga vatu muIsalele kutalisa kukulanda nakukutambasana vyuma mangana vazamise vyuma vyosena: Mutu azulilenga mendelo+ enyi nakuwahana kuli mukwavo. Omu mukiko vazamishilenga vivwasano muIsalele.
8 Ngocho uze kausoko kavo azulile mendelo enyi omu alwezele Mbowaze ngwenyi: “Musuka kana ulande yove.”
9 Kaha Mbowaze ambile kuli vakulwane navatu vosena ngwenyi: “Enu munapu muvinjiho+ likumbi lyalelo omu ngunalande vyuma vyosena kuli Nowemi vize vyapwile vyaElimeleke, navyuma vyosena vize vyapwile vyaKiliyone naMalone.
10 Ngunambate nauze kaMowave Lute, pwevo lyaMalone kupwa pwevo lyami mangana uswana+ wambozo upwenga lika mulijina lyenyi, kuchina lijina lyambozo nalijimbangana muli vandumbwenyi namunganda yenyi. Enu munapu muvinjiho likumbi lyalelo.”+
11 Kaha vatu vosena vaze vapwile kuchikolo changanda navakulwane vambile ngwavo: “Eyo, tunapu tuvinjiho! Yehova alingise ou pwevo mwengila muzuvo yove kupwa nge Lakele naLeya, vaze vasemene vaze vakuzuvo yaIsalele.+ Fukilanga muEfwalata,+ kaha fumakananga* muMbetelema.+
12 Zuvo yove yipwenga nge zuvo yaPeleze+ uze vasemene kuli Tamale naYuta. Yipwenga ngocho kuhichila muvana mwakuhana Yehova vaze nausemena kuli ou mwanapwevo.”+
13 Ngocho Mbowaze ambachile Lute kupwa pwevo lyenyi. Alisavalile nenyi, kaha Yehova amukiswile, emichile lijimo nakusema mwana walunga.
14 Jino mapwevo vambile kuli Nowemi ngwavo: “Vamwalisenga Yehova, ou nakuhane mutu uze nakusokola likumbi lyalelo. Lijina lyenyi valyalisenga muIsalele.
15 Nazamisa* kuyoya* chove, kaha mwakuzakamanga muushinakaji wove, mwomwo nasemuka kuli nokowenu ou akuzanga,+ ou nawahe kuhambakana vana vamalunga 7.”
16 Nowemi ambachile uze mwana, amuhakile hatulo yenyi, kaha ikiye amulelelenga.*
17 Mapwevo vaze valihachile navo valukile uze mwana lijina. Vambile ngwavo: “Nowemi naseme mwana walunga.” Ngocho vamulukile lijina ngwavo Ovete.+ Ovete ikiye ise yaYese,+ Yese ikiye ise yaNdavichi.
18 Evi vikiko visemunwino vyaPeleze:+ Peleze asemene Hezelone,+
19 Hezelone asemene Lame, Lame asemene Aminatave,+
20 Aminatave+ asemene Nashone, Nashone asemene Salamone,
21 Salamone asemene Mbowaze, Mbowaze asemene Ovete,
22 Ovete asemene Yese,+ Yese asemene Ndavichi.+
Kwinyikila Chamwishi
^ Hepe., “vilikanga lijina lyove.”
^ Kulumbununa, muzukulu lyaNowemi.
^ Chipwe “mwono.”
^ Chipwe “ikiye apwilenga ndeji yenyi.”
