Mako 11:1-33
11 Omu vapwile kwakamwihi naYelusalema, kuMbetefwaje naMbetane+ haPili yaMilive, Yesu atumine tumbaji twenyi vavali+
2 nakuvalweza ngwenyi: “Yenu mwimbo lize muli nakumona, kahomu namwingila namuwana livuvu lyachimbulu uze kanda vachinyinengaho lyehi kuli mutu vanamukase. Mukasununenu nakumuneha kuno.
3 Kachi nge mutu mwamihula ngwenyi, ‘Ika muli nakulingila chumechi?’ Enu ambenu ngwenu, ‘Mwata ali nakumusaka, kaha mwamukindulwisa kalinwomu.’”
4 Ngocho vayile, kaha vawanyine uze livuvu lyachimbulu vanamukashilila kwakamwihi nachikolo kuweluka kujila, kaha vamukasunwine.+
5 Oloze vatu vamwe vaze vemanyine kuze vavehwile ngwavo: “Ika muli nakukasunwina ou livuvu lyachimbulu?”
6 Vakiko vavalwezele ngana vene muze ambile Yesu, kaha vavasuwile.
7 Kaha vanehele uze livuvu lyachimbulu+ kuli Yesu, vamuhakile uvwalo wavo wahelu, kaha atwamineho.+
8 Kaha nawa vavavulu valile uvwalo wavo wahelu mujila, veka vatetele mitango yamafwo muchipapa.+
9 Kaha vaze vatetekelele kulutwe navaze nawa vakavilenga munyima vatambakanyinenga lika ngwavo: “Tuli nakukulomba umulwile.+ Vakisula ou mweza mulijina lyaYehova.*+
10 Vakisula shina Wangana ou uli nakwiza wasetu Ndavichi.+ Tuli nakukulomba ove watwama mwilu umulwile.”
11 Jino engilile muYelusalema, kaha ayile mutembele. Ataliletalile vyuma vyosena, kahomu lyalingile likumbi hilinahunguluka lyehi, alovokele nakuya kuMbetane navaze 12.+
12 Lichako, omu vafumine kuMbetane, evwile zala.+
13 Kahomu amwene mukuyu kwakusuku uli namafwo, ayileko nakutala numba nge mwawanako vimwe. Oloze hakuheta kuze, kawanyineko vimweko, shina mafwo kaha, mwomwo kayapwile ngonde yajikuyuko.
14 Ngocho awambile ngwenyi: “Kanda nakukapwa mutu mwakalya cheka mihako kuli oveko.”+ Jino tumbaji twenyi vapwile nakwivwilila.
15 Kaha vejile kuYelusalema. Jino Yesu engilile mutembele nakuputuka kuhangamo vosena vaze vapwile nakulanjisa navaze vapwile nakulanda. Akatumwine jimesa javaka-kutambasana jimbongo, navitwamo vyavaka-kulanjisa mayembe.+
16 Kaha ketavishile mutu kumbata chuma nakupulasana nacho mutembeleko.
17 Jino apwile nakuvanangula ngwenyi: “Uno kavasoneka ngwavo: ‘Zuvo yami navakayivulukanga ngwavo zuvo yakulombela vaka-mafuchi osenako’ nyi?+ Oloze enu munayitenge kupwa nge wina wakuswama vihwanga.”+
18 Kaha vapilishitu vavakulwane navaka-kusoneka vevwile chuma kana, kaha vaputukile kutondatonda jila yakumujihilamo,+ mwomwo vamwivwile woma hakuwana nge vatu vosena valikomokelele hakunangula chenyi.+
19 Kaha hamashikajamo, valovokele munganda.
20 Jino omu vapwile nakuhita chimenemene, vamwene uze mukuyu unomu chau swi nakumiji yawo.+
21 Ngocho Petulu anukile, kaha ambile kuli ikiye ngwenyi: “Ove Lapi, tala, ou mukuyu wangulanga unomu lyehi chau.”+
22 Yesu ambile kuli vakiko ngwenyi: “Fwelelenunga muli Kalunga.
23 Chamuchano vene nangwamba kuli enu ngwami, weshowo mwamba kupili yino ngwenyi, ‘Tutuka ukalimbile mukalungalwiji,’ kaha mumuchima wenyi keshi nakuhuhwasanako, oloze mwapwa nalufwelelo ngwenyi chuma nahanjika nachilingiwa, kaha nachipwa vene ngocho.+
24 Shikaho nguli nakumilwezela ngwami, vyuma vyosena namulomba novyo namusaka, pwenu nalufwelelo ngwenu munavitambula lyehi, kaha namupwa navyo vene.+
25 Kahomu namwimana nakulomba, konekelenu mutu cheshocho chuma namivulumuna mangana Senu uze ali mwilu ahase kumikonekela nayenu nawa havilinga vyenu vyakuhenga.”+
26 *——
27 Kaha vejile cheka kuYelusalema. Jino omu apwile nakutambuka mutembele, vapilishitu vavakulwane, navaka-kusoneka, navakulwane vejile kuli ikiye
28 nakwamba ngwavo: “Ngolo jakulinga vyuma kanevi unajiwane kulihi? Iya akuhana ngolo kaneji jakulinga vyuma kanevi?”+
29 Yesu ambile kuli vakiko ngwenyi: “Nangumihula chihula chimwe. Ngukumbululenu, kaha nayami nawa nangumilweza okwo ngunawane ngolo jakulinga vyuma kanevi.
30 Uno lumbapachiso lwaYowano+ lwafumine mwilu tahi, nyi lwafumine kuli vatu? Ngukumbululenu.”+
31 Ngocho vaputukile kulihanjikisa mwavomwavo ngwavo: “Kachi nge natwamba ngwetu, ‘Lwafumine mwilu,’ kaha mwamba ngwenyi, ‘Nyi ikaze mwahonene kumwitavila?’
32 Uno twambenga ngwetu, ‘Lwafumine kuli vatu tahi’?” Oloze vevwile woma liyongomena, mwomwo vatu vosena vamwenenga ngwavo Yowano apwile chikupu kapolofweto.+
33 Jino vakumbulwile Yesu ngwavo: “Katwatachikijileko.” Kaha Yesu ambile kuli vakiko ngwenyi: “Nayami nawa kangweshi kumilweza okwo ngunawane ngolo jakulinga vyuma kaneviko.”
