Mako 13:1-37
13 Omu Yesu apwile nakulovoka mutembele, umwe hali tumbaji twenyi ambile kuli ikiye ngwenyi: “Ove Muka-kunangula, tala omu awaha awa malolwa najeji jizuvo!”+
2 Oloze Yesu ambile kuli ikiye ngwenyi: “Eji jizuvo jajinene unajimono nyi? Hano kaheshi lilolwa limwe nalikasala helu lyalikwavo chakuzeneka kuliholwela hamavuko.”+
3 Kahomu atwamine haPili yaMilive haze amwenenga kanawa tembele, Petulu, naYakova, naYowano, naAndelei vaputukile kumwihula kwauka wavo ngwavo:
4 “Tulweze, uno vyumevi navikasoloka mwaka uka, kaha nawa chinjikizo muka chakutachikijilaho lwola lwachikukulwishi chavyuma vyosenevi?”+
5 Jino Yesu aputukile kuvalweza ngwenyi: “Zangamenu, kanda namuketavila mutu umwe akamihungumwiseko.+
6 Vavavulu navakeza mulijina lyami nakwamba ngwavo, ‘Yami ikiye,’ kaha navakahungumwisa vavavulu.
7 Kaha nawa omu namukevwa jijita namijimbu yajijita, kanda namukalizuzukila nawomako. Vyumevi vyatela kusoloka, oloze kukuma chichili kanda.+
8 “Mwomwo lifuchi limwe nalikafumbukila lifuchi likwavo, kaha wangana umwe naukafumbukila wangana ukwavo,+ kaha kuvihela vyeka navyeka nakukapwa mindenda. Nakukapwa nawa zala.+ Evi navikapwa kuputuka chaluyando.*+
9 “Oloze enu zangamenunga. Vatu navakamitwalanga kujizango jakusopela milonga,+ kaha navakamiveta mujisunangonga.+ Navakamilingisa mukemanenga kumeso avanguvulu navamyangana mwomwo yayami, mangana ukapwe unjiho kuli vakiko.+
10 Kaha nawa mujimbu wamwaza watela chatete kuwambulula muli vaka-mafuchi osena.+
11 Oloze omu navakamitwala nakumihana kuli vakiko, kanda namukavangila kulizakamina vyuma namukahanjikako, mwomwo vyeshovyo navakamihana haola vene yize, kavihanjikenu, mwomwo keshi yenu namukahanjikako, oloze shipilitu yajila.+
12 Kaha nawa, mutu mwakahana ndumbwenyi vakamujihe, ise yamutu mwakahana mwanenyi, kaha vana navakafumbukila visemi javo nakuvajihisa.+
13 Navakamihunganga kuli vatu vosena mwomwo yalijina lyami.+ Oloze ou mwakakachila palanga nakusongo+ navakamulwila.+
14 “Jino omu namukamona chuma chakwivwisa unyengwe chakuneha kunongesa+ chinemana muze kachatela kwimanako, (ou mwatanga anangakane), kaha vaze vali muYuleya vakaputuke kuchinyina kujipili.+
15 Mutu uze ali helu lyazuvo kanda akasulukaho chipwe kwingila muzuvo yenyi nakumbata chuma chimweko,
16 kaha mutu uze ali kuwande kanda akakinduluka kuvyuma naseze kunyima nakumbata uvwalo wenyi waheluko.
17 Lamba kuli mapwevo vaze navakemita majimo nakuli vaze navakapwa navakemba hamakumbi aze!+
18 Lombenunga lika mangana vyuma kana vikazeneke kusoloka hangonde yachishika,
19 mwomwo makumbi aze nawakapwa makumbi aluyando,+ luze kanda lusolokengaho lyehi kufuma haze Kalunga aputukile kutanga vyuma palanga nakulwola vene luze, kaha kulutwe nawa kalweshi kukasoloka chekako.+
20 Chikupu vene kuvanga Yehova* akakehese makumbi aze, mokomoko kakweshi ukwechi mujimba navakalwilako. Oloze mwomwo yavaze vasakula, vaze asakula ivene, aze makumbi navakawakehesa.+
21 “Jino kachi nge mutu mwakamba kuli enu ngwenyi, ‘Talenu! Kulishitu ali kuno,’ chipwe ngwenyi, ‘Talenu! Uze ali kuze,’ enu kanda namuketavilako.+
22 Mwomwo vaKulishitu vamakuli navapolofweto vamakuli navakeza,+ kaha navakalinga vinjikizo navyuma vyakukomwesa mangana nge chinahase, vakahungumwise vaze vasakula.
23 Oloze enu zangamenunga.+ Ami ngunamilwezela chimweza vyuma vyosena.
24 “Oloze hamakumbi aze, omu nalukalinga luyando lunakumu, likumbi nalikelava wi, kaha kakweji keshi kukalovola myeji yenyiko,+
25 vatanganyika navakahosomoka mwilu, kaha ngolo jize jatwama mumelu najikalinyika.
26 Jino navakamona Mwanamutu+ ali nakwiza mumavwi nangolo jajinene naupahu.+
27 Kaha mwakatuma vangelo jenyi nakukungulwila hamwe vatu jenyi asakula kufuma kumitamba yiwana,* kufuma kusongosongo yamavu mbwe nakusongosongo yalilu.+
28 “Jino linangulenu chishina chino kuchifwanyisa chamukuyu: Omu weji kusokanga mitango yayihya nakusokolokela mafwo, mweji kutachikizanga ngwenu ngonde yanonga yili kwakamwihi.+
29 Nayenu nawa omu namukamona vyumevi vili nakusoloka, katachikizenu ngwenu ali kwakamwihi, kuvikolo.+
30 Chamuchano vene nangwamba kuli enu ngwami, chisemunwino chino kacheshi kuhitako kuvanga vyuma vyosena evi vinasoloka.+
31 Melu namavu navikahita,+ oloze mazu ami kaweshi kukahitako.+
32 “Kutalisa kulikumbi lize chipwe kuola yize kakweshi mutu umwe natachikizako, chipwe vangelo vali mwilu, chipwe Mwana, shina Tata+ kaha.
33 Vangulukenunga, tonenunga,+ mwomwo kamwatachikijile oho nalukejila lwola vatongolako.+
34 Chinafwane nge mutu uze apwile nakuya kulifuchi lyeka, uze asezele zuvo yenyi nakuhana wata kuli vandungo jenyi.+ Mutu himutu amuhanyine mulimo wenyi, kaha alwezele muka-kulama kuchikolo atonenga.+
35 Shikaho tonenunga, mwomwo kamwatachikijile lwola mweza mwenyazuvoko,+ kwiji hamashikajamo, nyi mukachi kaufuku, nyi shimbu kanda havandemba, nyi nachimenemene,+
36 mangana omu mweza mukumikasumuna, ahone kumiwana muli mutulo.+
37 Omu nguli nakwamba kuli enu mukiko munangwamba nakuli vosena ngwami: Tonenunga.”+
Kwinyikila Chamwishi
^ Chipwe “kuputuka chamisongo yakusema.”
^ Tala Chihande A5.
^ Hela., “kujipeho jiwana.”
