Mako 14:1-72
-
Vapilishitu navajina kujiha Yesu (1, 2)
-
Yesu navamuhingunwina maji alivumba lyamwaza (3-9)
-
Yuta mwasolola Yesu (10, 11)
-
Paseka yamakumishilo (12-21)
-
Kulinga Kulya chaMwata chaChingoloshi (22-26)
-
Navavuluka chimweza ngwavo Petulu mwakakana Yesu (27-31)
-
Yesu mwalomba muNgetesemane (32-42)
-
Yesu navamukwata (43-52)
-
Navamusopesa kuli vaka-Sunendeline (53-65)
-
Petulu mwakana Yesu (66-72)
14 Jino kwasalile makumbi avali+ kuchilika chaPaseka+ naChiwanyino chaJimbolo Jakuzeneka Chimbalwila.+ Kaha vapilishitu vavakulwane navaka-kusoneka vapwile nakutondatonda jila yakukwachilamo Yesu kuzachisa makuli* mangana vamujihe.+
2 Oloze vambilenga ngwavo: “Hachiwanyinonyi chiku, kuchina vatu navakatula liuya.”
3 Kahomu Yesu apwile nakulya vyakulya* kuMbetane muzuvo yaShimona muka-mbumba, pwevo umwe ejile nasaji yaalambashite* yamaji alivumba lyamwaza, analatu hayohayo, andando yayinene chikuma. Kaha ajikwile yize saji yaalambashite nakuputuka kuhingunwina aze maji hamutwe waYesu.+
4 Hakumona chuma kana, vamwe vevwile kupihya nakulihanjikisa mwavomwavo ngwavo: “Mwomwo ika awa maji alivumba lyamwaza vanawenyekela ngana?
5 Mwomwo maji awa alivumba lyamwaza kachi vanawalanjisa handando yakuhambakana jindenali* 300 nakuhana jimbongo kana kuli vaka-kuhutwa.” Ngocho vapihililile chikuma nauze pwevo.*
6 Oloze Yesu ambile ngwenyi: “Mwechenu. Ika muli nakusaka kumwivwishila kupihya? Nangulingila chuma chamwenemwene.+
7 Mwomwo enu namupwanga navaka-kuhutwa shimbu yosena,+ kaha munahase kuvalingila vyuma vyamwaza heshoho namusakila, oloze kamweshi kupwanga nayami shimbu yosenako.+
8 Ou pwevo nalingi echi nahase. Nahingunwina chimweza maji alivumba lyamwaza hamujimba wami mangana awahise vyakungufunda.+
9 Chamuchano vene nangwamba kuli enu ngwami, kweshokwo navakambulwila ou mujimbu wamwaza mukaye kosena,+ chuma nalingi ou pwevo nachikiko navakachivulukanga mangana vakamwanukilengaho.”+
10 Jino Yuta Isakalyote, umwe hali vaze 12 ayile kuli vapilishitu vavakulwane mangana ngwenyi amusolole kuli vakiko.+
11 Vakiko hakwivwa ngocho, vawahililile, kaha vamufwelelesele kumuhana jimbongo japalata.+ Shikaho aputukile kutondatonda lwola lwamwaza lwakumusolola kuli vakiko.
12 Jino halikumbi lyatete lyaChiwanyino chaJimbolo Jakuzeneka Chimbalwila,+ haze vahanyinenga chimuna wakuvatula waPaseka,+ tumbaji twenyi vambile kuli ikiye ngwavo: “Kulihi unasake ngwove tuyenga nakukuwahishila mangana ulileko Paseka?”+
13 Hakwivwa ngocho, atumine tumbaji twenyi vavali nakwamba kuli vakiko ngwenyi: “Yenu munganda, kaha navamihumangana kuli lunga nambate mulondo wameya. Kaha mukavenu.+
14 Mweshomwo mwengila, ambenu kuli mwenyazuvo ngwenu, ‘Muka-kunangula nambe ngwenyi: “Kapete kavangeji kalihi, muze nangulila Paseka natumbaji twami?”’
15 Kaha ikiye mwamilweza kapete kakanene kahelu, kaze vanawahisa lyehi. Tuwahishilenu vene kuze.”
16 Ngocho vaze tumbaji vayile, vengilile munganda, kaha vawanyine nge muze vene avalwezele, kaha vawahishile vyaPaseka.
17 Omu kwatokele, ejile natumbaji twenyi 12.+
18 Kahomu vasendavalile kumesa nakulya, Yesu ambile ngwenyi: “Chamuchano vene nangwamba kuli enu ngwami, umwe hali enu, ou ali nakulya nayami, mwangusolola kuli vaka-kole.”+
19 Jino vaputukile kunyengetela, kaha mutu himutu amwihwile ngwenyi: “Yami tahi?”
20 Ikiye avakumbulwile ngwenyi: “Umwe hali enu 12, ou ali nakutata nayami halilonga limwe.+
21 Mwanamutu mwaya vene nge muze vasoneka hali ikiye, oloze lamba kuli mutu uze mwasolola Mwanamutu kuli vaka-kole.+ Mutu kana kachi chawahile kuli ikiye kuhona kusemuka.”+
22 Omu vatwalileho lika nakulya, anonele mbolo, alombele, ayipuzwile, kaha ayihanyine kuli vakiko nakwamba ngwenyi: “Tambulenu, eyi yinemanyinako mujimba wami.”+
23 Anonele nawa lupasa, alombele nakuluhana kuli vakiko, kaha vosena vanwinemo.+
24 Kaha ambile kuli vakiko ngwenyi: “Elu lunemanyinako ‘manyinga ami+ alushiko,’+ aze nawamwangala mangana vakonekele jishili javatu vavavulu.+
25 Chamuchano vene nangwamba kuli enu ngwami, kangweshi kunwa cheka vinyoko palanga nakulikumbi lize nangukanwa vinyo vyavihya muWangana waKalunga.”
26 Omu vakumishile kwimba myaso yakwalisa* Kalunga, valovokele nakuya kuPili yaMilive.+
27 Jino Yesu ambile kuli vakiko ngwenyi: “Enu muvosena namuhukana, mwomwo vasoneka ngwavo: ‘Nanguveta kafunga,+ kaha mikoko navalimwanga.’+
28 Oloze omu nangukalinga hivanangusangula lyehi, nangukatetekela kuya kuNgalileya.”+
29 Oloze Petulu ambile kuli ikiye ngwenyi: “Numba nge vakwetu vosena navahukana, aminyi nduma.”+
30 Yesu hakwivwa ngocho, ambile kuli ikiye ngwenyi: “Chamuchano vene nangwamba kuli ove ngwami, lelo, ufuku vene uno, shimbu kanda ndemba atambike kamuchivali, naungukana mapapa katatu.”+
31 Oloze ikiye akanyine lika ngwenyi: “Numba nge kufwa, nangufwila hamwe nayove, ami kangweshi kukukanako.” Navakwavo vosena nawa vaputukile kuhanjika mwomumwe.+
32 Jino vejile kuchihela vavuluka ngwavo Ngetesemane, kaha ambile kuli tumbaji twenyi ngwenyi: “Twamenu hano, shimbu nangulomba.”+
33 Ambachile Petulu, naYakova, naYowano nakuya navo,+ kaha aputukile kunyengetela nakulyonyinga chikuma mumuchima wenyi.
34 Jino ambile kuli vakiko ngwenyi: “Nguli* nakulyonyinga chikuma+ kwijiva kufwa kaha. Salenu hano, tonenunga.”+
35 Kahomu ayile chindende kulutwe, afukamine chameso hamavu nakuputuka kulomba ngwenyi kachi nge chinahase, ola kana yimuhite.
36 Ambile ngwenyi: “Apa,* Ove Tata,+ vyuma vyosena vyapwa vyavyashi kuli ove. Fumisa lupasa kanelu kuli ami. Oloze keshi omu munayi kusaka chamiko, shina omu munayi kusaka chove.”+
37 Omu akindulukile nakuwana vali mutulo, ambile kuli Petulu ngwenyi: “Ove Shimona uli mutulo? Uno kaweshi nangolo jakutona ola yimwe nayami hamweko nyi?+
38 Tonenunga, lombenunga lika kuchina namwingila mucheseko.+ Shipilitu yinasake vene, oloze mujimba unazeye.”+
39 Jino ayile cheka, alombele nakuhanjika vyuma vyovimwe.+
40 Omu ejile cheka awanyine vali mutulo mwomwo meso avo alemene natulo, ngocho kavapwile namazu eka akumukumbululako.
41 Kaha ejile kamuchitatu nakwamba kuli vakiko ngwenyi: “Shimbu yakufwana ngana yino enu munasavala nakunoka! Kunahu! Ola jino yinahete!+ Talenu! Mwanamutu vanamuhane mumavoko avaka-shili.
42 Katukenu, tuyenu. Talenu! Muka-kungusolola napandama kwakamwihi.”+
43 Hahaze vene, shimbu apwile nakuhanjika, Yuta, umwe wavaze 12 ejile naliyongomena lize lyafumine kuli vapilishitu vavakulwane, navaka-kusoneka, navakulwane.+ Vambachile jipoko jamikwale najimbwechi.
44 Jino muka-kumusolola avalwezele chimweza chinjikizo ngwenyi: “Weshowo nangusweswenya, ikiye vene. Mukasenu muyenga nenyi, mulamenu.”
45 Kaha ejile swi nakuli Yesu nakwamba ngwenyi: “Ove Lapi!” Kaha amusweswenyele.
46 Ngocho vamukwachile nakumukasa.
47 Oloze umwe hali vaze vemanyine kuze, asolomwene poko yenyi yamukwale nakusepula litwitwi lyandungo yakapilishitu wakulitulaho.+
48 Jino Yesu ambile kuli vakiko ngwenyi: “Munejila ika najipoko jamikwale najimbwechi kwijiva nge muneza nakukwata chihwanga?+
49 Ngunapunga nayenu mutembele hakumbi hakumbi nakunangula,+ oloze kamwangukashileko. Oloze evi vinasoloka mangana Visoneka vitesemo.”+
50 Kaha tumbaji vosena vamusezele, vachinyine.+
51 Oloze mukweze umwe walunga uze avwalile lihina lyamwaza hamujimba wenyi, aputukile kumukavangijila hakamwihi. Kaha vasakile kumukwata,
52 oloze asezele lize lihina lyenyi nakuchina uselesele.*
53 Jino vatwalile Yesu kuli kapilishitu wakulitulaho,+ kaha vapilishitu vavakulwane vosena, navakulwane, navaka-kusoneka valikungulwile hamwe.+
54 Oloze Petulu amukavangijile hakasuku swi nakuchipango chakapilishitu wakulitulaho. Kaha atwamine hamwe navaka-kuzata kuzuvo nakwota kakahya.+
55 Jino vapilishitu vavakulwane navaka-Sunendeline vosena vapwile nakutondatonda unjiho wakuvangijikila Yesu mangana vamujihe, oloze kavauwanyineko.+
56 Vavavulu vapwile nakuhana unjiho wamakuli wakumuvangijikila,+ oloze unjiho wavo kawalitombwelengako.
57 Kaha vamwe nawa vakatukilenga nakwambulula unjiho wamakuli ngwavo:
58 “Twamwivwile mwamba ngwenyi, ‘Nangukashiula eyi tembele vatungile namavoko, kaha nangukatunga yeka mumakumbi atatu, oloze keshi namavokoko.’”+
59 Oloze numba hamilonga kaneyi, unjiho wavo kawayile mwomumweko.
60 Jino kapilishitu wakulitulaho emanyine mukachi kavo nakwihula Yesu ngwenyi: “Uno kaweshi kuvakumbululako nyi? Kawevwile ou unjiho vali nakukuvangijikila ava malungako tahi?”+
61 Oloze aholele kulu, kakumbulwile lizu numba limweko.+ Cheka nawa, kapilishitu wakulitulaho aputukile kumwihula ngwenyi: “Ove yove Kulishitu Mwana Wayou Vakisula tahi?”
62 Yesu ambile ngwenyi: “Yami vene. Enu namukamona Mwanamutu+ natwame kulivoko lyachilyo+ lyangolo, ali nakwiza namavwi amwilu.”+
63 Hakwivwa ngocho, kapilishitu wakulitulaho apihililile nakupula uvwalo wenyi nakwamba ngwenyi: “Ikaze natusakila cheka vinjiho veka?+
64 Munevu omu nasaula Kalunga. Munashinganyeka muka?” Vosena vamuhanyine mulonga ngwavo atela kufwa.+
65 Kaha vamwe vaputukile kumufwijila maleji,+ nakumufwika kumeso, nakumulukula jikonyi nakwamba kuli ikiye ngwavo: “Polofweta!” Kahomu vamuvetele jimbanda kumeso, tupasu vamumbachile.+
66 Jino shimbu Petulu atwamine mwishi, muze vene muchipango, ngamba umwe hali vangamba vamapwevo vakapilishitu wakulitulaho ejile.+
67 Kaha hakumona Petulu ali nakwota kakahya, amutalile swi nakwamba ngwenyi: “Nayove nawa wapwanga naYesu wakuNazaleta.”
68 Oloze ikiye alihamikile ngwenyi: “Ami kangwamutachikizako, kaha ovyo uli nakuhanjika nawa kavyangulumbunukilileko.” Ngocho alovokele nakuya kuwingililo.
69 Jino uze ngamba wapwevo amumwene, kaha aputukile cheka kwamba kuli vaze vemanyine kuze ngwenyi: “Ou naikiye napunga hamwe navakiko.”
70 Kaha Petulu akanyine cheka. Kahomu hahichile katando kakandende, vaze vemanyine kuze vaputukile kwamba kuli Petulu ngwavo: “Pundu vene nayove nawa unapunga hamwe navo, mwomwo umuka-Ngalileya.”
71 Oloze ikiye aputukile kulyangula nakulishinga ngwenyi: “Ou mutu muli nakuvuluka ami kangwamutachikizako!”
72 Hahaze vene ndemba atambikile kamuchivali.+ Kaha Petulu anukile mazu ahanjikile Yesu kuli ikiye ngwenyi: “Shimbu kanda ndemba atambike kamuchivali, naungukana mapapa katatu.”+ Jino evwile kumuchima kukola, kaha alilile.
Kwinyikila Chamwishi
^ Chipwe “kuzachisa tufuta.”
^ Chipwe “Yesu asendavalile kumesa.”
^ Alambashite yapwile saji yalilolwa.
^ Tala Chihande B14.
^ Chipwe “vatenukilile uze pwevo.”
^ Chipwe “kwimba jisamu jakwalisa.”
^ Chipwe “Mwono wami uli.”
^ Lizu lyachiHepeleu chipwe chiAlamayiki lize lyalumbununa, “Ove Tata.”
^ Chipwe “nakuchina chakuhona kuvwala kanawa; nakuchina nauvwalo wamukachi kaha.”
