Mako 15:1-47
15 Jino kulungulungu lyakucha, vakulwane, navapilishitu vavakulwane, navaka-kusoneka, navaka-Sunendeline vosena vatwamine punga, kaha vakashile Yesu, vamumbachile nakumutwala kuli Pilatu.+
2 Kaha Pilatu amwihwile ngwenyi: “Ove yove Mwangana wavaYuleya tahi?”+ Yesu amukumbulwile ngwenyi: “Ove ivene unambemo lyehi.”+
3 Oloze vapilishitu vavakulwane vapwile nakumuvangijikila vyuma vyavivulu.
4 Jino Pilatu aputukile kumwihula cheka ngwenyi: “Kaweshi namazu akukumbululako tahi?+ Ivwa milonga kuvula vali nakukuhana.”+
5 Oloze Yesu kamukumbulwile numba lizu limweko, ngocho Pilatu alikomokelele chikuma.+
6 Jino hachiwanyino hichiwanyino, Pilatu apwilenga nakukasununa funge umwe uze valombelenga vatu.+
7 Kaha halwola luze, mutu vavulukilenga ngwavo Mbalapa, apwile mukamenga hamwe kaha navaka-kufumbukila fulumende vaze vajihile vatu hakufumbukila fulumende.
8 Ngocho lize liyongomena lyejile, kaha vaputukile kumulomba Pilatu avalingile vyuma avalingililenga.
9 Ikiye avakumbulwile ngwenyi: “Namusaka ngwenu ngumikasunwine Mwangana wavaYuleya tahi?”+
10 Mwomwo Pilatu ejivile ngwenyi vapilishitu vavakulwane vahanyine Yesu kuli ikiye+ mwomwo vamwivwilile lushiushiu.
11 Oloze vapilishitu vavakulwane vasangumwine lize liyongomena mangana valombe Pilatu avakasunwine Mbalapa.+
12 Pilatu ambile cheka kuli vakiko ngwenyi: “Nyi ou mwavuluka ngwenu Mwangana wavaYuleya ngumulinge muka?”+
13 Vakiko vatambakanyine cheka ngwavo: “Vamupapalile hachitondo!”+
14 Oloze Pilatu avehwile cheka ngwenyi: “Mwomwo ika? Chuma muka chachipi nalingi?” Oloze vakiko vatambakanyine chikuma ngwavo: “Vamupapalile hachitondo!”+
15 Ngocho Pilatu hakusaka ngwenyi asuulwise lize liyongomena, avakasunwinyine Mbalapa. Kahomu alingile hanavetesa lyehi Yesu vikote,+ amuhanyine kuli maswalale vamupapalile hachitondo.+
16 Jino maswalale vamutwalile muchipango, muzuvo yanguvulu, kaha vakungulwile lizavu lyamaswalale lyosena.+
17 Vamuvwikile uvwalo waungonyi, vavinjile nawa muchama wamingonga nakumuvwikawo.
18 Kaha vaputukile kumwamba ngwavo: “Mwoyo wove,* ove Mwangana wavaYuleya!”+
19 Vamuvetelenga nawa lihongo mumutwe nakumufwijila maleji, kaha vafukaminenga nakulifukula kuli ikiye.
20 Omu vakumishile kumuhenda, vamuzulile uze uvwalo waungonyi nakumuvwika cheka uvwalo wenyi wahelu. Kaha vamutwalile vakamupapalile hachitondo.+
21 Jino vashinjilile mutu umwe uze apwile nakuhita kufuma kundandanda yimwe mangana ambate chitondo chakuyanjishila* Yesu.+ Ou mutu lijina lyenyi apwile ikiye Shimona wakuKulene, ise yaAlekesande naLufuse.
22 Ngocho vamunehele kuchihela vavuluka ngwavo Ngolongota, kulumbununa, “Chihela chaChikola.”+
23 Jino vesekele kumuhana vinyo vyakufutula namila yakupendesa,+ oloze kavinwineko.
24 Kaha vamupapalilile hachitondo, valipangilile uvwalo wenyi wahelu kuzachisa tutachikijilo mangana vamone uvwalo mwambata mutu himutu.+
25 Ola vamupapalilile hachitondo yapwile ola yamuchitatu.*
26 Kaha vasonekele mulonga vamuhanyine ngwavo: “Mwangana WavaYuleya.”+
27 Vamupapalilile navihwanga vavali havitondo, umwe kulivoko lyenyi lyachilyo kaha mukwavo kuchimoswe.+
28 *——
29 Kaha vaze vahichilenga mujila vapwile nakumusaula, vanyengesele mitwe+ nakwamba ngwavo: “Wo! Ove wambile kushiula tembele nakuyitunga mumakumbi atatu,+
30 lilwile ove ivene hakusuluka oho hachitondo chakuyanjishila.”*
31 Vapilishitu vavakulwane navaka-kusoneka navakiko vapwile nakumuhenda ngwavo: “Alwilile veka, oloze ivene keshi kuhasa kulilwilako.+
32 Mwechenu Kulishitu Mwangana waIsalele asuluke jino hachitondo chakuyanjishila* mangana tumone, numbanyi twitavile.”+ Navaze vapapalilile havitondo hamwe naikiye vapwile nakumusaula.+
33 Omu yahetele ola yakusokesa 6* milima yafwikile lifuchi lize lyosena palanga nakuola yakusokesa 9.*+
34 Kaha haola yakusokesa 9, Yesu atambakanyine nalizu lyakukanguka ngwenyi: “Eli, Eli, lama savakatanyi?” kulumbununa ngwenyi, “Ove Kalunga kami, ove Kalunga kami, mwomwo ika unangusezela?”+
35 Vatu vamwe vaze vemanyine kwakamwihi hakwivwa ngocho, vaputukile kwamba ngwavo: “Ivwenu! Ali nakusanyika Elija.”
36 Jino minavo umwe alahile, azovesele chiponja* navinyo vingangamina, achihakile kulihongo, kaha amuhanyine anwenga.+ Ambile ngwenyi: “Mwechenu! Manenu tutale numba nge Elija mweza nakumufumisaho.”
37 Oloze Yesu atambakanyine nalizu lyakukanguka, kaha afwile.*+
38 Kaha lihina lyamuchihela chajila+ lyapulikile havali, kufumisa kwilu mbwe nakwishi.+
39 Kaha kapitau kamaswalale uze emanyinyine kuze amwenenga Yesu kanawa, hakumona vyuma vize vyasolokele halwola lwakufwa chenyi, ambile ngwenyi: “Pundu vene ou mutu apwanga MwanaKalunga.”+
40 Jino kwapwile nawa mapwevo vavavulu vaze vapwile hahasuku nakutala vyuma navisoloka. Hali vakiko hapwile Maliya Mangatala, naSalome, naMaliya nevo yaYakova Wamundende naYose,+
41 vaze vamukavilenga nakumuzachila+ omu apwile muNgalileya, namapwevo veka vavavulu vaze vakandukile nenyi kuYelusalema.
42 Omu lyalingile likumbi linahunguluka lyehi, kaha nawa lyapwile Likumbi lyaKulongesa Vyuma, hilikumbi lyakukokela kuSambata,
43 kwejile Yosefwe wakuAlimateya, chilolo wamulemu muZango yaKusopela yavaYuleya,* uze nawa apwilenga nakuvandamina Wangana waKalunga. Ou lunga ahamukile nakuya kuli Pilatu nakulomba mujimba waYesu.+
44 Oloze Pilatu ahuhwasanyine numba nge Yesu nafu lyehi nyi chiku, kaha asanyikile kapitau kamaswalale nakumwihula ejive numba nge nafu lyehi.
45 Ngocho omu awanyine unjiho kuli uze kapitau kamaswalale, etavishile Yosefwe ambate uze mujimba.
46 Kaha alanjile lihina lyamwaza, amufumishile hachitondo, kaha amuvungilile hali lize lihina lyamwaza nakumusavalika muchimbumbe*+ chize vatotele mulilolwa. Kaha ashindumwinyineko lilolwa lyalinene kuchikolo chachimbumbe.+
47 Oloze Maliya Mangatala, naMaliya naye yaYose vatwalileho lika nakutala kuze vamusavalikile.+
Kwinyikila Chamwishi
^ Chipwe “Vulye.”
^ Tala Mukana waMazu.
^ Kafwe 9:00 yachimene.
^ Tala Chihande A3.
^ Tala Mukana waMazu.
^ Tala Mukana waMazu.
^ Kafwe 12:00 yamusana.
^ Kafwe 15:00.
^ Echi hichuma chachivwovu chakufwana nge mupelo.
^ Chipwe “atulishile mwono wenyi.”
^ Chipwe “muSunendeline.”
^ Chipwe “muchimbumbe chakwanukila.”
