Mako 2:1-28
2 Omu mwahichile makumbi amwe, engilile cheka muKapelenau, kaha mujimbu wevwakanyine ngwavo ali kwimbo lyenyi.+
2 Shikaho vatu vavavulu vakungulukile muzuvo, ngocho kamwapwile nomu mwakwimanyina mutuko, chipwe vene kuchikolo, kaha aputukile kuvambulila mujimbu wamwaza.+
3 Jino vamunehelelele muka-kalepa uze vambachile kuvatu vawana.+
4 Oloze vahonene kumuneha kuli Yesu mwomwo yakuvula chavatu, ngocho vambandumwine hamulungu haze apwililile Yesu. Kahomu valingile hivanatuu lyehi lihanya, vazezumwine kahela kaze asavalile uze muka-kalepa.
5 Omu Yesu amwene lufwelelo lwavo,+ ambile kuli uze muka-kalepa ngwenyi: “Ove mwanami, jishili jove vanakukonekelajo.”+
6 Jino kuze kwapwile navaka-kusoneka vamwe vaze vatwamine nakushinganyeka mumichima yavo+ ngwavo:
7 “Mwomwo ika ou mutu ali nakuhanjikila ngana? Ali nakusaula Kalunga. Uno keshi Kalunga kaha ikiye eji kukonekelanga jishiliko nyi?”+
8 Oloze hahaze vene Yesu ejivile mushipilitu yenyi ngwenyi vali nakushinganyeka ngocho mumichima yavo, kaha ambile kuli vakiko ngwenyi: “Ikaze muli nakushinganyekela vyuma kanevi mumichima yenu?+
9 Chachashi chimwe chilihi, kwamba muka-kalepa ngwami, ‘Jishili jove vanakukonekelajo,’ nyi kwamba ngwami, ‘Katuka, mbata kahela kove utambuke’?
10 Oloze hakusaka mutachikize ngwenu Mwanamutu+ ali nangolo jakukonekela jishili hano hamavu—”+ ambile kuli uze muka-kalepa ngwenyi:
11 “Nangwamba kuli ove ngwami, Katuka, mbata kahela kove, yakonga kwimbo lyove.”
12 Hakwivwa ngocho, uze muka-kalepa akatukile, kaha hahaze vene ambachile kahela kenyi nakulovoka oku vatu vosena vali nakumutala. Ngocho vosena valikomokelele, kaha vamutohwesele Kalunga nakwamba ngwavo: “Kanda tumonengaho lyehi chuma changanako.”+
13 Jino alovokele nawa nakuya kukalungalwiji, kaha vatu vosena vapwile nakwiza lika kuli ikiye, kaha aputukile kuvanangula.
14 Kahomu apwile nakuhita, amwene Levi mwanaAlefweu natwame kuzuvo yakutelela mitelo. Ambile kuli ikiye ngwenyi: “Pwako umuka-kungukavangiza.” Kaha akatukile, amukavangijile.+
15 Kufumaho, omu apwile nakulya vyakulya* muzuvo yaLevi, vaka-kutambula mitelo navaka-shili vavavulu vapwile nakulya vyakulya hamwe naYesu natumbaji twenyi. Kaha kwapwile vavavulu vaze vamukavangijile.+
16 Oloze omu vaka-kusoneka javaFwaliseu vamwene ali nakulya navaka-shili navaka-kutambula mitelo, vaputukile kwamba kuli tumbaji twenyi ngwavo: “Kumana eji kulyanga hamwe navaka-kutambula mitelo navaka-shili?”
17 Yesu hakwivwa ngocho, ambile kuli vakiko ngwenyi: “Vatu vavakangule kaveshi kusakiwa chimbukeko, kuvanga vaka-kuviza kaha. Ami kangwejile nakusanyika vaka-kwolokako, oloze shina vaka-shili.”+
18 Jino tumbaji twaYowano navaFwaliseu vapwile nakulijilikanga kulya. Ngocho vejile nakwamba kuli ikiye ngwavo: “Mwomwo ika tumbaji twaYowano natumbaji twavaFwaliseu veji kulijilikilanga kulya, oloze tumbaji twove kaveshi kulijilika kulyako?”+
19 Yesu ambile kuli vakiko ngwenyi: “Uno masepa jamwenyamwenga vatela kulijilika kulya shimbu mwenyamwenga+ achili hamwe navakiko numba? Shimbu vachili hamwe namwenyamwenga, kaveshi kulijilika kulyako.
20 Oloze makumbi nawakeza omu navakavatambula mwenyamwenga+ numbanyi vakalijilike kulya.
21 Kakweshi mutu mwatongela chikamba chalihina lyalihya hauvwalo wamwakako. Kachi nge mwalinga ngocho, chize chikamba nachilikoka, kaha nachipula uze uvwalo wamwaka nakutohwesa chikuma mbelo.+
22 Kaha nawa, kakweshi mutu eji kulongelanga vinyo vyavihya mujituku jamalambu jamwakako. Kachi nge mwalinga ngocho, vinyo navipula malambu, kaha vinyo navilyenyeka hohamwe namalambu. Oloze vinyo vyavihya veji kuvilongelanga mujituku jamalambu jajihya.”
23 Jino omu apwile nakuhita mumande atiliku haSambata, tumbaji twenyi vaputukile kuhela tumitwe twatiliku omu vapwile nakuya.+
24 Ngocho vaFwaliseu vambile kuli ikiye ngwavo: “Tala! Mwomwo ika vali nakulingila chuma chize kavetavisa kulinga haSambatako?”
25 Oloze ikiye ambile kuli vakiko ngwenyi: “Uno kanda mutangengaho lyehi muze alingile Ndavichi omu akalikijile nakwivwa zala hohamwe navaze apwile navoko nyi?+
26 Vavuluka mumujimbu waAviyatale+ kapilishitu wamukulwane ngwavo, engilile muzuvo yaKalunga nakulya jize jimbolo jakutumbika kumeso aKalunga* jize kavetavishile mutu kulyako, shina vapilishitu kaha.+ Ahanyine nawa jimwe kuli vaze apwile navo.”
27 Jino ambile kuli vakiko ngwenyi: “Sambata vayihakilileko mutu,+ oloze mutu kavamuhakilileko Sambatako.
28 Shikaho Mwanamutu ikiye Mwata waSambata.”+
