Mako 3:1-35
3 Engilile cheka musunangonga, kaha awanyinemo lunga wakusoseka livoko.+
2 Ngocho vapwile nakumutala vamone numba nge mwoka uze lunga haSambata mangana vamuhane mulonga.
3 Jino ambile kuli uze lunga wakusoseka livoko ngwenyi: “Katuka, twaya hakachi.”
4 Kufumaho, ambile kuli vakiko ngwenyi: “Uno chimwe chilihi vetavisa kulinga haSambata, kulinga mwamwaza nyi kulinga mwamupi, kulwila mwono nyi kuujiha?”+ Oloze vakiko vaholele kulu.
5 Kahomu avatalile vosena namatoto oku nanyengetela chikuma mwomwo yakukakama chamichima yavo,+ ambile kuli uze lunga ngwenyi: “Olola livoko lyove.” Alyolwele, kaha livoko lyenyi lyalumukile cheka kupwa lyalambwe.
6 Omu vaFwaliseu vamwene chuma kana, valovokele, kaha hahaze vene vaputukile kumutwama punga nalizavu lyavatu jaHelote+ mangana ngwavo vamujihe.
7 Oloze Yesu natumbaji twenyi vafumine kuze nakuya kukalungalwiji, kaha liyongomena lyalinene lyakufuma kuNgalileya nakuYuleya lyamukavile.+
8 Kaha nawa kuYelusalema, nakuIndumeya, namusali yaYotau, nakujingalila jakuTule nakuShitone, kwafumine liyongomena lyalinene lize lyejile kuli ikiye hakwivwa vyuma vyosena vize alingilenga.
9 Jino alwezele tumbaji twenyi vamunehele wato waundende anyinemo mangana liyongomena lihone kumushindakanya.
10 Hakuwana nge okile vavavulu, ngocho vosena vaze vapwile namisongo yayinene valishinjejekelenga vezenga kuli ikiye mangana vamutute.+
11 Navashipilitu vavapi,+ omu valingilenga nge vanamumono, valimbililenga hamavu kuli ikiye nakutambakana ngwavo: “Ove uMwanaKalunga.”+
12 Oloze ikiye avakanjilenga kakavulu ngwenyi kanda navamujimbula kuvatuko.+
13 Jino akandukile hapili, asanyikile tumbaji twenyi vamwe,+ kaha vayile kuli ikiye.+
14 Kaha atungile* lizavu lyavatu 12, vaze alukile nawa ngwenyi vaposetolo, vaze atambukilenga navo, vaze nawa atuminenga kuya nakwambulula
15 nakupwa nangolo jakulovolanga vandemone.+
16 Kaha lizavu lyavaze 12+ lize atungile,* vapwile vakiko Shimona uze alukile nawa ngwenyi Petulu,+
17 naYakova mwanaZevete, naYowano ndumbwaYakova, (vaze alukile ngwenyi vaMbowaneje, kulumbununa, “Vana vaMikalateta”),+
18 naAndelei, naFwilipu, naMbalaTolomeu, naMateu, naTomase, naYakova mwanaAlefweu, naTateu, naShimona uze watwima,*
19 naYuta Isakalyote uze jino amusolwele kuli vaka-kole.
Jino engilile muzuvo.
20 Liyongomena lyakungulukile cheka, ngocho kavahashile numba kulya vyakulyako.
21 Oloze omu vausoko wenyi vevwile vyuma vyapwile nakulingiwa, vayile kuze ngwavo vakamukwate, mwomwo vapwile nakwamba ngwavo: “Nazaluka.”+
22 Kaha nawa, vaka-kusoneka vaze vejile kufuma kuYelusalema, vapwile nakwamba ngwavo: “Atwama naMbelezembule,* kaha eji kulovolanga vandemone nangolo jakufuma kuli muka-kuyula vandemone.”+
23 Ngocho omu avasanyikile, ahanjikile kuli vakiko navifwanyisa ngwenyi: “Uno Satana mwahasa ngachilihi kulovola Satana?
24 Kachi nge wangana naulimbalaka uvene, wangana kana kaweshi kuzamako.+
25 Kaha kachi nge zuvo nayilimbalaka yivene, zuvo kana kayeshi kuhasa kuzamako.
26 Kaha nawa, kachi nge Satana nalifumbukila ivene nakulimbalaka, kaha keshi kuhasa kuzamako, oloze mwaya nakukuma.
27 Chikupu vene kakweshi mutu mwengila muzuvo yamutu wangolo nakwiva vikumba vyenyi nge kanda avangile kukasa mutu kanako. Kuvanga nalingi ngocho numbanyi apupe zuvo yenyi.
28 Chamuchano vene nangwamba kuli enu ngwami, vyuma vyosena navakavakonekelavyo vana vavatu, numba jipwa jishili chipwe kusaula chosena navasaula vyuma vyajila.
29 Oloze weshowo mwasaula shipilitu yajila kaveshi kukamukonekelako haya myaka namyaka,+ oloze mwapwa namulonga washili yahaya myaka yosena.”+
30 Ambile ngocho mwomwo vapwile nakwamba ngwavo: “Atwama nashipilitu wamupi.”+
31 Jino naye navandumbwenyi+ vejile, vemanyine kuweluka, kaha vatumine mutu akamusanyike.+
32 Liyongomena lyatwamine oku linamujingilika, kaha vambile kuli ikiye ngwavo: “Tala! Noko navandumbwove vali kuweluka, vali nakukutonda.”+
33 Oloze avakumbulwile ngwenyi: “Iya napu mama, veya vanapu vandumbwami?”
34 Jino atalile vosena vaze vatwamine oku vanamujingilika che ndo, nakwamba ngwenyi: “Talenu, mama navandumbwami ava!+
35 Weshowo eji kulinganga mwaya muchima waKalunga, ikiye ndumbwami walunga, ikiye ndumbwami wapwevo, ikiye mama.”+
Kwinyikila Chamwishi
^ Chipwe “atongwele.”
^ Chipwe “atongwele.”
^ Chipwe “naShimona kaKanane.”
^ Lijina kana lyatalisa kuli Satana.
