Mako 4:1-41
4 Yesu aputukile cheka kunangula vatu kuchikulo chakalungalwiji, kaha liyongomena lyalinene chikuma lyalihomenene kuli ikiye. Ngocho engilile muwato uze wapwile hahasuku chindende nangenge, kaha atwaminemo. Oloze lize liyongomena lyosena lyemanyine kungenge yakalungalwiji.+
2 Kaha aputukile kuvanangula vyuma vyavivulu navifwanyisa.+ Omu apwile nakuvanangula ambile kuli vakiko ngwenyi:+
3 “Ivwenu! Muka-kukuva ayile nakukuva mbuto.+
4 Kahomu apwile nakukuva, mbuto jimwe jaholokelele kujila, kaha tujila vejile, vajilile.
5 Jikwavo jaholokelele hamalolwa haze kahapwile mavu amavuluko, kaha nakushimbula chiku jasokele, mwomwo kahapwile mavu amavuluko.+
6 Oloze omu lyatutukile likumbi, javaukile, kaha jomine chau mwomwo kajapwile namijiko.
7 Jikwavo nawa jaholokelele hamingonga, kaha yize mingonga yakolele nakujikivisa, ngocho kajemine mihakoko.+
8 Oloze jikwavo jaholokelele hamavu amwaza, kahomu jasokele nakukula, japutukile kwima mihako. Jeminenga eji 30, jikwavo 60, jeka 100.”+
9 Ambile nawa ngwenyi: “Ou ali namatwitwi akwivwa evwilile.”+
10 Jino omu apwile uka wenyi, vaze vapwile naikiye hamwe, navaze 12 vaputukile kumwihula havifwanyisa.+
11 Kaha ambile kuli vakiko ngwenyi: “Enu vanamihane mangana akutachikiza vyuma vyajila vyakusweka+ vyaWangana waKalunga, oloze kuli vaze vali kuweluka, vyuma vyosena vili muvifwanyisa,+
12 mangana numba nge navatala, vahone kumona, numba nge navevwa, vahone kumona mwalumbunukila vyuma chipwe kwalumuka mangana vavakonekeleko.”+
13 Kaha nawa ambile kuli vakiko ngwenyi: “Kumana echi chifwanyisa enu kamwachitachikijileko? Nyi evi vifwanyisa vikwavo vyosena navimilumbunukila ngachilihi?
14 “Muka-kukuva eji kukuvanga mazu.+
15 Kujila kuze vanakuu mbuto, ava vakiko vaze hakwivwa mazu, Satana himweza+ nakufumisa mazu aze vanakuu muli vakiko.+
16 Ngocho nawa, hamalolwa haze vanakuu mbuto, ava vakiko vene vaze vanevu mazu, kaha hahaze vene hinavawetavila nakuwahilila.+
17 Muli vakiko kamweshi mijiko, oloze navatwalaho hatando yayindende, jino omu nakwiza vihuli chipwe luyanjisa mwomwo yamazu, kaha hinavahukana.
18 Kaha nawa hamingonga haze vanakuu mbuto, ava vakiko vene vaze vanevu mazu,+
19 oloze kulizakamina+ hakatwamino kamyaka yino,* naluheto luze lwatwama nangolo jakutangisa,+ nakufwila+ chavyuma vyeka nawa navingila mumichima yavo nakukivisa mazu, kaha nawahona kwima mihako.
20 Kukuminyinako, hamavu amwaza haze vakuvile mbuto, ava vakiko vaze veji kwivwanga mazu nakuwetavila nakwima mihako, vamwe 30, vakwavo 60, veka 100.”+
21 Ambile nawa kuli vakiko ngwenyi: “Uno linongo veji kulimbatanga mangana valifwikilile mumbango* chipwe mwishi yakahela numba? Kutala kaveshi kulimbata mangana valihake hachitumbikilo chalyoko nyi?+
22 Mwomwo kakweshi chuma chaswama chize navakahona kusopololako, chipwe chuma chakusweka kanawa chize nachikahona kusoloka hatomako.+
23 Weshowo ali namatwitwi akwivwa evwilile.”+
24 Ambile cheka kuli vakiko ngwenyi: “Hakenu muchima kuvyuma muli nakwivwa.+ Chesekelo chize muli nakwesekelanga nacho vakwenu, chikiko navakamyesekela nacho nayenu nawa. Chikupu vene navakamihakilako vikwavo.
25 Mwomwo weshowo ali navyo navamuwezelako vikwavo,+ oloze weshowo keshi navyoko, nachize ali nacho navamutambulacho.”+
26 Kaha atwalileho lika nakwamba ngwenyi: “Jino Wangana waKalunga unapu nge omu mutu mwakuva mbuto hamavu.
27 Eji kusavalanga naufuku nakuhinduka namusana, oloze jize mbuto jeji kusokanga nakukula chakuzeneka ikiye kutachikiza vyuma vili nakulingisa ngocho.
28 Mavu eji kulovolanga avene jimbuto chikoki chikoki, chakulivanga mitombo, numba kusoloke mitwe, kukuminyinako himanona akuhya lyehi kumitwe.
29 Oloze omu najihya mbuto, kaha eji kuhichisangamo chekeshi, mwomwo lwola lwakwaha lunahete.”
30 Kaha atwalileho lika nakwamba ngwenyi: “Uno Wangana waKalunga natuufwanyisa kuka, chipwe natuulumbununa nachifwanyisa muka?
31 Unafwane nge linona lyamusetale, lize halwola valitumbile mumavu lyapwile lyalipululu hambuto jikwavo josena jahamavu.+
32 Oloze nge vanalitumbu lyehi, lyeji kusokanga nakupwa lyalinene havisakwola vyosena nakupwa namitango yayinene, ngocho tujila vakutuka mwilu veji kwizanga nakutwama mumuvule wayo.”
33 Ngocho avanangwilenga mazu aKalunga navifwanyisa+ vyavivulu vyangachize, kweseka noho wakuminyine uhashi wavo wakwivwilila.
34 Chikupu vene, kahanjikilenga kuli vakiko chakuzeneka chifwanyisako, oloze apwilenga nakulumbunwina tumbaji twenyi vyuma vyosena kwauka wavo.+
35 Kaha halikumbi lize, omu kwalingile hikunatoko lyehi, ambile kuli vakiko ngwenyi: “Tuzaukenu, tuyenu musali.”+
36 Jino omu valingile hivanasuula lyehi lize liyongomena, vayile nenyi muwato, nge muze vene apwile. Kaha kwapwile nawa mato eka kuze.+
37 Jino kwahuhwile nyamanganda wamunene chikuma, kaha makimba apwile nakwingila muwato, ngocho wato wapwile hakamwihi nakuvomba.+
38 Oloze ikiye apwile kutongo yakunyima, asavalile hamusau. Ngocho vamuhindwile nakwamba kuli ikiye ngwavo: “Ove Muka-kunangula, uno kawamwene ngwove natunongako nyi?”
39 Hakwivwa ngocho, ahindukile nakutenukila yize peho, ambile kukalungalwiji ngwenyi: “Unda! Hola kulu!”+ Peho yatulile, kaha kwaunjile.
40 Jino ambile kuli vakiko ngwenyi: “Mwomwo ika munevwila woma?* Kumana noholili kanda muchipwe nalufweleloko nyi?”
41 Oloze vevwile woma chikuma, kaha valihanjikishile mwavomwavo ngwavo: “Iya venyou? Mwomwo napeho nakalungalwiji vinononoka kuli ikiye.”+
Kwinyikila Chamwishi
^ Tala Mukana waMazu.
^ Chipwe “mumbango yakupimina.”
^ Chipwe “munalizuzukila.”
