Mako 5:1-43
5 Jino vejile musali yakalungalwiji mungalila yavaka-Ngelase.+
2 Kahomu Yesu afumine muwato vamuhumanganyine kuli mutu washipilitu wamupi uze apwile nakufuminyina kuvimbumbe.*
3 Ou mutu atwaminenga kuvimbumbe, kaha nahalwola kanelu, naumwe wauchi ahashile kumukasa lilenge.
4 Kakavulu vamukashilenga jikuli namalenge, oloze ambitwojwelenga aze malenge nakuhokwojola jize jikuli. Kakwapwile mutu apwile nangolo jakumuhombolako.
5 Shimbu yosena, ufuku namusana, apwilenga nakuteta kuvimbumbe nakujipili, nakulipulapula namalolwa.
6 Oloze omu amwene Yesu hahasuku, alahilileko nakulifukula kuli ikiye.+
7 Kaha atetumukile nalizu lyakukanguka ngwenyi: “Ove Yesu, MwanaKalunga ou Wakulitulaho Chikuma, vyuma muka uli nakusaka kuli ami? Ngunakushingisa Kalunga ngwami, kanda unguyanjisako.”+
8 Mwomwo Yesu amulwezelenga ngwenyi: “Ove shipilitu wamupi, lovoka muli ou mutu.”+
9 Yesu amwihwile ngwenyi: “Lijina lyove yove iya?” Ikiye amukumbulwile ngwenyi: “Lijina lyami yami Liyongomena mwomwo tuvavavulu.”
10 Kaha amulembelelele Yesu mapapa kakavulu ahone kuhanga vashipilitu mungalila yize.+
11 Jino utanga waunene wavangulu+ wapwile kupili nakulya.+
12 Ngocho vashipilitu vamulembelelele ngwavo: “Tutume kuvangulu mangana twingile muli vakiko.”
13 Kaha avetavishile. Ngocho vaze vashipilitu vavapi valovokele nakuya nakwingila muli vaze vangulu, kaha uze utanga walupukilile kuze kwakumbolomoka nakukalyasa mukalungalwiji chu. Vaze vangulu vapwile kafwe 2,000, kaha vosena valondomanyine mukalungalwiji.
14 Oloze tufunga twavo vachinyine nakuya nakwambulula chuma kana munganda namumembo, kaha vatu vejile nakutala vyuma vize vyasolokele.+
15 Ngocho vejile kuli Yesu, kaha vamwene mutu uze apwile navandemone natwame, navwale kanawa, naliunjika undutu. Ikiye vene uze apwilenga naLiyongomena lyavandemone. Kaha vevwile woma.
16 Kaha nawa vaze vamwene vyuma kanevi, vambulilile vakwavo vyuma vyasolokele kuli uze muka-ndemone nakuvangulu.
17 Ngocho vatu vamulembelelele Yesu ngwavo afume mungalila yavo.+
18 Jino omu apwile nakwingila muwato, mutu uze vafumishile vandemone aputukile kulembelela Yesu mangana amwitavise ayenga nenyi.+
19 Oloze ikiye kamwitavishileko, ambile kuli ikiye ngwenyi: “Yakonga kwimbo lyove kuli vausoko wove, ukavambulile vyuma vyosena nakulingila Yehova* nomu nawa nakutetela.”
20 Ngocho ayile, aputukile kuvilika muNdekapole* vyuma vyosena amulingilile Yesu, kaha vatu vosena valikomokelele.
21 Omu Yesu alingile nakinduluka cheka nawato musali, liyongomena lyalinene lyalihomenene kuli ikiye. Kaha ikiye apwile kungenge yakalungalwiji.+
22 Jino Yailu, umwe wavaze vaka-kutwaminyina musunangonga ejile. Omu amwene Yesu, alimbilile hamavu kumahinji enyi.+
23 Amulembelelele lika ngwenyi: “Mwanami wapwevo wamundende ali nakuviza chikuma.* Ngunakulembelela wizenga umusalike mavoko ove+ mangana ahinduke, ayoye.”
24 Hakwivwa ngocho, Yesu ayile nenyi. Kaha liyongomena lyalinene lyapwile nakumukavangiza oku lili nakumushindakanya.
25 Jino kwapwile pwevo umwe uze apwile namusongo wakuhita manyinga+ hamyaka 12.+
26 Ou pwevo ayanjiwile chikuma* hakumuka kuli vimbuke vavavulu, kaha nawa amanyishile vikumba vyenyi vyosena, oloze kahindukileko. Musongo wapwile nakuya nakumutekeleka lika.
27 Jino omu evwile vyuma vahanjikilenga hali Yesu, ejile munyima yenyi mukachi kaliyongomena nakukwata kuuvwalo waYesu wahelu,+
28 mwomwo ou pwevo apwilenga nakulyamba ngwenyi: “Kachi nge nangukwata kaha kuuvwalo wenyi wahelu, nanguhinduka.”+
29 Hahaze vene manyinga aze apwilenga nakuhita omine chau, kaha evwile mumujimba wenyi ngwenyi vanamuhindula lyehi kumusongo waupi.
30 Hahaze vene Yesu evwile ngwenyi ngolo+ jinamufumu, kaha alumukile muze muliyongomena apwile, nakwihula ngwenyi: “Iya nakwate kuuvwalo wami wahelu?”+
31 Oloze tumbaji twenyi vamukumbulwile ngwavo: “Ove unamono ngwove liyongomena lili nakukushindakanya, kaha wihule nawa ngwove, ‘Iya nangukwate?’”
32 Chipwe ngocho, apwile nakutalatala amone owo amukwachile.
33 Uze pwevo evwile woma nakulichikimina hakwijiva vyalingiwile kuli ikiye, ngocho ejile nakulimbila hamavu kumeso enyi nakumulweza muchano wosena.
34 Kaha Yesu ambile kuli ikiye ngwenyi: “Ove mwanami, lufwelelo lwove lunakuhindula. Yakonga mukuunda,+ likangule kumusongo wove waupi.”+
35 Shimbu Yesu apwile nakuhanjika, vatu vamwe vakuzuvo yayauze muka-kutwaminyina musunangonga vejile kuli ikiye nakumulweza ngwavo: “Mwanove nafu lyehi. Nyi ikaze uli nakuyanjishila Muka-kunangula?”+
36 Oloze Yesu hakwivwa vyuma vapwile nakuhanjika, ambile kuli uze muka-kutwaminyina musunangonga ngwenyi: “Kanda nawivwa womako, ijiva kufwelela kaha.”+
37 Jino Yesu ketavilile mutu numba umwe kumukavako, shina Petulu naYakova naYowano ndumbwaYakova+ kaha.
38 Ngocho vejile kuzuvo yayauze muka-kutwaminyina musunangonga, kaha amwene vatu vali nakuneha liuya, nakulila jimbimbi.+
39 Kahomu engilile mukachi, ambile kuli vakiko ngwenyi: “Mwomwo ika muli nakunehela liuya nakulila ngana? Ou mwana kafwileko, nasavala kaha tulo.”+
40 Hakwivwa ngocho vaputukile kumuseha nakumupopolola. Oloze omu alingile navalovolamo lyehi vosena, ambachile ise yayauze mwana, nanaye navaze apwile navo, kaha engilile muze apwile uze mwana.
41 Akwachile kulivoko lyauze mwana nakwamba kuli ikiye ngwenyi: “Talita kumi,” kulumbununa ngwavo: “Ove mwanapwevo, nangwamba kuli ove ngwami, katuka!”+
42 Hahaze vene uze mwanapwevo akatukile nakuputuka kutambuka. (Apwile namyaka yakusemuka 12.) Hahaze vene visemi jenyi vawahililile chikuma.
43 Oloze Yesu avakanjilenga mapapa kakavulu ngwenyi kanda nakupwa mutu atela kutachikiza chuma kanako,+ kaha avalwezele vahane uze mwanapwevo vyakulya alyenga.
Kwinyikila Chamwishi
^ Chipwe “kuvimbumbe vyakwanukila.”
^ Tala Chihande A5.
^ Chipwe “muNgalila yaJinganda 10.”
^ Chipwe “ali hakamwihi nakufwa.”
^ Chipwe “Ou pwevo vamwivwishilenga kukola chikuma.”
