Mako 6:1-56
6 Jino Yesu afumine kuze nakwiza mungalila yakwimbo lyenyi,+ kaha tumbaji twenyi vamukavile.
2 Omu yahetele Sambata, aputukile kunangula musunangonga, kaha vatu vavavulu vaze vapwile nakumwivwilila valikomokelele nakwamba ngwavo: “Ou mutu evi vyuma naviwane kulihi?+ Kaha awa mangana vanamuhanyinawo ika? Uno ali nakuhasa ngachilihi kuzata milimo yangolo ngana?+
3 Uno ou keshi muka-kusonga maliva,+ mwanaMaliya,+ kaha nawa ndumbwaYakova,+ naYosefwe, naYuta, naShimonako+ nyi? Uno vandumbwenyi vamapwevo kumana keshi ava tuli navoko nyi?” Ngocho vaputukile kuhukana mwomwo yaikiye.
4 Oloze Yesu ambile kuli vakiko ngwenyi: “Kapolofweto vamuvumbika kweka, keshi mungalila afuma chipwe muli vausoko wenyi chipwe muzuvo yenyiko.”+
5 Kaha kazachile milimo yangolo kuzeko, shina kunangika kaha mavoko enyi hali vaka-kuviza vavandende nakuvoka.
6 Alikomokelele chikupu mwomwo kavapwile nalufweleloko. Kaha ayile nakutambwojoka mumembo amungalila yize nakunangula vatu.+
7 Jino asanyikile vaze 12, kaha aputukile kuvatuma vavali vavali,+ nakuvahana ngolo jakufungulula vashipilitu vavapi.+
8 Avalwezele nawa ngwenyi kanda navambata vyuma vimwe haungeji wavoko, shina mukombo kaha. Ngwenyi kanda navambata mbolo, chipwe lipakumuna lyavyakulya, chipwe jimbongo* muvikapa vyavoko,+
9 oloze vavwale mendelo, kaha kanda navavwala nawa uvwalo uvaliko.*
10 Ambile nawa kuli vakiko ngwenyi: “Mweshomwo muzuvo namwingila, twamenu vene muze palanga nomu namukafuma muchihela kana.+
11 Kaha kweshokwo kuchihela navakana kumitambula, chipwe kumivwilila, hakufuma kuze, kalitotomonenu lukungu kumahinji enu mangana chikapwe unjiho kuli vakiko.”+
12 Ngocho vakatukile nakuya nakwambulula ngwavo vatu vapihilile nakwalumuka.+
13 Kaha valowelenga vandemone vavavulu,+ nakukwita maji vaka-kuviza vavavulu nakuvoka.
14 Jino Mwangana Helote evwile chuma kanechi, mwomwo lijina lyaYesu lyafumakanyine chikuma, kaha vatu vapwile nakwamba ngwavo: “Yowano Muka-kumbapachisa vanamusangula kuvafu, shikaho ali nakuzachila milimo yangolo yipwaha.”+
15 Oloze veka vapwile nakwamba ngwavo: “Elija.” Kaha veka nawa ngwavo: “Kapolofweto, ngana mwavapolofweto vakushikulu.”+
16 Oloze omu Helote evwile chuma kana, ambile ngwenyi: “Yowano uze ngwatapile mutwe, ikiye vanasangula.”
17 Mwomwo Helote ivene ikiye atumine vatu nakukwata Yowano, kaha amukashile nakumuhaka mukamenga mwomwo yaHelochiya uze apwile pwevo lyandumbwenyi Fwilipu uze ambachile ikiye Helote.+
18 Mwomwo Yowano ambilenga lika kuli Helote ngwenyi: “Jishimbi kajetavisa ove kumbata pwevo lyandumbwoveko.”+
19 Jino Helochiya alaminyine Yowano koko, kaha asakilenga ngwenyi amujihe, oloze kahashileko.
20 Helote evwilenga Yowano woma, mwomwo atachikijile ngwenyi apwile lunga wakwoloka kaha nawa wajila,+ ngocho apwilenga nakumulama kanawa. Hakwivwa vyuma apwilenga nakuhanjika, kejivile mwakulingilako, oloze evwilenga kuwaha kumwivwilila.
21 Oloze Helochiya awanyine lwola lwakulinga vyuma ashinganyekele omu Helote awahishilile vilolo jenyi, natupitau twamaswalale vavakulwane, navakulwane vavalemu vakuNgalileya+ kulya chachingoloshi halikumbi lyakwanuka kusemuka chenyi.+
22 Kaha mwanaHelochiya wapwevo ejile mukachi nakukina, kaha evwishile Helote kuwaha navaze nawa apwile nakulya navo vyakulya.* Jino mwangana ambile kuli uze mwanapwevo ngwenyi: “Ngulombe cheshocho unasake, kaha nangukuhanacho.”
23 Alishingile kuli ikiye ngwenyi: “Cheshocho naungulomba nangukuhanacho, chipwe vene chimbwa chawangana wami.”
24 Uze mwanapwevo alovokele, ayile nakwihula naye ngwenyi: “Chuma muka ngwatela kulomba?” Naye ambile ngwenyi: “Mutwe waYowano Muka-kumbapachisa.”
25 Hahaze vene engilile nakuya washiwashi kuli mwangana nakumulomba ngwenyi: “Ngunasake unguhane oholyapwa mutwe waYowano Muka-kumbapachisa halilonga.”+
26 Numba tuhu chuma kana chalingishile mwangana anyengetele, oloze kasakile kuleununa chuma chize amulombeleko, mwomwo yalushingo alishingile navangeji jenyi vaze vejile.*
27 Ngocho hahaze vene mwangana atumine liswalale muka-kumulama anehe mutwe waYowano. Kaha ayile nakutapa mutwe waYowano mukamenga.
28 Anehele uze mutwe halilonga nakuuhana kuli mwanapwevo, kaha uze mwanapwevo auhanyine kuli naye.
29 Omu tumbaji twaYowano vevwile chuma kana, vejile nakumbata mujimba wenyi nakuufunda muchimbumbe.*
30 Jino vaposetolo valikungulwilile kuli Yesu, vamwambulilile vyuma vyosena valingile navize vanangwile.+
31 Kaha ambile kuli vakiko ngwenyi: “Tuyenu kwauka wetu kupenge mukanoke chindende.”+ Mwomwo kwapwile vatu vavavulu, ava vali nakwiza ava vali nakuya, kaha kavapwile nalwola lwakuhwima chipwe vene lwakulyako.
32 Ngocho vengilile muwato nakuya kuchihela kwakuhona vatu kwauka wavo.+
33 Oloze vatu vavamwene vali nakuya, kaha vavavulu vatachikijile, ngocho vatu vosena vakufuma kujinganda josena vayile jimbushi hamahinji nakulivanga kuheta kuze.
34 Yesu hakulovoka muwato, amwene liyongomena lyalinene, kaha avevwililile keke+ mwomwo vapwile nge mikoko vakuzeneka kafunga.+ Kaha aputukile kuvanangula vyuma vyavivulu.+
35 Omu lyahungulukile likumbi, tumbaji twenyi vejile kuli ikiye nakwamba ngwavo: “Kuno kuchihela kakweshi vatuko, kaha nawa kunatoko lyehi.+
36 Shikaho suula ava vatu vayenga mumembo mangana vakalilanjile vyakulya valyenga.”+
37 Ikiye ambile kuli vakiko ngwenyi: “Vahanenu vyakulya.” Hakwivwa ngocho, vambile kuli ikiye ngwavo: “Uno tuyenga nakulanda jimbolo jajindenali* 200 nakujihana kuvatu valyenga tahi?”+
38 Ikiye ambile kuli vakiko ngwenyi: “Muli najimbolo jingahi? Yenu mujitale!” Omu valingile hivanajimono lyehi, vambile ngwavo: “Jitanu, navaishi vavali.”+
39 Kaha alwezele vatu vosena vasendavale mumazavu mazavu hamwila ututa.+
40 Vasendavalile mumazavu mazavu, awa avatu 100, akwavo avatu 50.
41 Ambachile jino jize jimbolo jitanu navaze vaishi vavali, kaha atalile mwilu, alombele.+ Apuzwile jize jimbolo nakuputuka kujihana kuli tumbaji mangana vajipangile vatu, kaha apundwojwele vaze vaishi vavali nakuhana vatu vosena.
42 Ngocho vosena valile, vekuchile,
43 kaha vakungulwile vihanda vyajimbolo vyasalileho, vazalishile mitonga 12 yato, chakuzeneka kulavilako vaishi.+
44 Vaze valile jize jimbolo vapwile malunga 5,000.
45 Hahaze vene alwezele tumbaji twenyi vengile muwato mangana vatetekeleko musali chakutalisa kuMbetesayita, shimbu ikiye mwachisuula lize liyongomena.+
46 Oloze omu alingile hanalisalisa lyehi navo, ayile kupili nakulomba.+
47 Omu kwalingile hikunatoko lyehi, wato wapwile hakachi kakalungalwiji, oloze ikiye apwile uka wenyi kutunda.+
48 Jino omu avamwene vali nakupindasana chikuma hakuvuwa mwomwo yapeho yize yapwile nakuvapekumuna, kafwe hachilo chamuchiwana,* ejile kwakamwihi navakiko oku ali nakutambuka hakalungalwiji. Oloze asakile kuvahambakana.
49 Hakumumona ali nakutambuka hakalungalwiji, vashinganyekele ngwavo: “Chipukupuku!” Kaha vatetumukile.
50 Vosena vamumwene, kaha vevwile woma. Oloze hahaze vene ambile kuli vakiko ngwenyi: “Likolezezenu. Yami. Kanda namwivwa womako.”+
51 Jino engilile muwato muze vapwile, kaha yize peho yatulile. Hakumona chuma kana, valikomokelele chikuma
52 mwomwo kavalinangwile vimwe kuchuma chakukomwesa alingile chajimboloko. Michima yavo nawa yahonene kumona mwalumbunukilile vyuma.
53 Jino omu valingile hivanazauka lyehi, vahetele kutunda muNgenesaleta, kaha vasulikile wato hakamwihi.+
54 Omu valovokele muwato, vatu vamutachikijile.
55 Vayile jimbushi mwahita ngalila yize yosena nakuputuka kumbachila hatuhela vaze vapwile nakuviza nakuvatwala kuze apwile Yesu.
56 Kaha kweshokwo engilile, chipwe mumembo chipwe mujinganda, vapwilenga nakumunehela vaka-kuviza kuvilanjilo, nakumulembelela ngwavo vakwate kaha kujizombo jauvwalo wenyi wahelu.+ Kaha vosena vaze vakwachileko vahindukile.
Kwinyikila Chamwishi
^ Hela., “chipwe unengu.”
^ Chipwe “uvwalo ukwavoko.”
^ Chipwe “navaze nawa asendavalile navo kumesa.”
^ Chipwe “navaze asendavalile navo kumesa.”
^ Chipwe “muchimbumbe chakwanukila.”
^ Tala Chihande B14.
^ Kafwe kufuma na 3:00 yaufuku nakuheta kafwe ku 6:00 hakututuka chalikumbi.
