Mako 7:1-37
7 Jino vaFwaliseu navaka-kusoneka vamwe vaze vafumine kuYelusalema vaungile kuli ikiye.+
2 Kaha vamwene tumbaji twenyi vamwe vali nakulya namavoko avo akujiluluka, kulumbununa, kulya chakuzeneka kusana kumavoko.*
3 (Mwomwo vaFwaliseu navaYuleya vosena kaveshi kulyako kuvanga vanasane kumavoko avo kuheta nakuminguza mwomwo yakulinjilila kuvisemwa vyavakakuluka javo.
4 Kaha nawa nge vanafumu kuchilanjilo, kaveshi kulyako kuvanga vanasane. Kuli visemwa vyeka nawa vyavivulu vize vatambula nakuvilinjilila, vyakufwana nge kumbwichika jipasa namilondo navitenga vyaunengu mumeya.)+
5 Ngocho ava vaFwaliseu navaka-kusoneka vamwihwile ngwavo: “Mwomwo ika tumbaji twove kaveshi kukavangiza visemwa vyavakakuluka jetuko, oloze veji kulyanga namavoko avo akujiluluka?”+
6 Ikiye ambile kuli vakiko ngwenyi: “Isaya apolofwetele kanawa vyayenu vaka-kulyonga, kweseka namuze vasoneka ngwavo, ‘Vatu kana ava veji kunguvumbikanga kaha namivumbo yavo, oloze michima yavo yili kwakusuku nayami.+
7 Kulemesa veji kungulemesanga cheji kuyanga mwamokomoko, mwomwo veji kunangulanga jishimbi javatu kupwa nge himazu aKalunga.’+
8 Enu mweji kusezanga Jishimbi jaKalunga nakulinjilila kuvisemwa vyavatu.”+
9 Kaha nawa ambile kuli vakiko ngwenyi: “Enu mweji kuleununanga Jishimbi jaKalunga mukuzangama mangana mulamenga visemwa vyenu.+
10 Chakutalilaho, Mose ambile ngwenyi, ‘Vumbikenunga masenu namanenu,’+ kaha nawa ngwenyi, ‘Ou mwasaula ise chipwe naye vamujihe.’+
11 Oloze enu mweji kwambanga ngwenu, ‘Kachi nge mutu mwamba kuli ise chipwe kuli naye ngwenyi: “Cheshocho nguli nacho chize chatela kachi kukunganyalisa chinapu kolovane (kulumbununa, wana wakuhana Kalunga),”’
12 enu kamweshi kwitavisa mutu kana kulingila ise chipwe naye chuma numba chimweko.+
13 Ngocho mweji kuzeyesanga mazu aKalunga mwomwo yavisemwa vyenu vize munaliselanga.+ Kaha mweji kulinganga navyuma vyeka vyavivulu vyakufwana ngana.”+
14 Jino asanyikile cheka liyongomena nakwamba kuli vakiko ngwenyi: “Ngwivwililenu enu muvosena mangana mumone munalumbunukila ano mazu.+
15 Chuma nachingila mukanwa kamutu keshi chikiko cheji kumujilululangako. Oloze vyuma vize vyeji kulovokanga mukanwa kamutu vikiko vyeji kumujilululanga.”+
16 *——
17 Jino omu engilile muzuvo nakuseza lize liyongomena, tumbaji twenyi vaputukile kumwihula havifwanyisa kana.+
18 Ngocho ambile kuli vakiko ngwenyi: “Kumana kamwanangakanyine chiwenya vakikoko nyi? Uno kamwejiva ngwenu chuma nachingila mukanwa kamutu keshi chikiko cheji kumujilululanga,
19 hakuwana nge kacheshi kwingila mumuchima wenyiko oloze cheji kwingilanga mujimo lyenyi nakuya muchimbushuko nyi?” Ngocho asolwele ngwenyi vyakulya vyosena vyapwa vitoma.
20 Kaha nawa ambile ngwenyi: “Chuma chize cheji kulovokanga muli mutu chikiko cheji kumujilululanga.+
21 Mwomwo mutulo, mumichima yavatu,+ mukiko mweji kufumanga vishinganyeka vyavipi, namaujila,* nawiji, nakujiha vatu,
22 namakoji, nachipululu, navilinga vyakuhuka, namakuli, navilinga vyakuzunguma,* naliso lyalushiushiu, nakusaula vyuma vyajila, nakulitohwesa, nakukaluhwisa muchima.
23 Vyuma vyavipi vyosenevi vyeji kufumanga mutulo nakujilulula mutu.”
24 Kaha afumine kuze nakuya kungalila yaTule naShitone.+ Jino engilile muzuvo, kaha kasakile mutu numba umwe atachikize okwo apwileko. Oloze kahashile kuliswekako.
25 Kaha kwapwile pwevo ukwechi mwanenyi wapwevo wamundende uze apwile nashipilitu wamupi. Omu evwile Yesu, hahaze vene ejile nakulimbila hamavu kumahinji enyi.+
26 Uze pwevo apwile kaHelase wakuSulofwenyisha,* kaha atwalileho lika nakumulembelela Yesu mangana alovole uze ndemone muli mwanenyi.
27 Oloze Yesu ahanjikile kuli ikiye ngwenyi: “Chatete echa vana vekute, mwomwo kachapwa chakwoloka kumbata kulya chavana nakuchimbila kuli vana vavatuwako.”+
28 Uze pwevo ambile kuli ikiye ngwenyi: “Mukiko vene ove Mwata, oloze navana vavatuwa vaze vali mwishi yamesa veji kulyanga ungululu weji kufumanga kukulya chavana vavandende.”
29 Hakwivwa ngocho, ambile kuli ikiye ngwenyi: “Hakuwana nge unakumbulula ngocho, yakonga, ndemone nalovoka lyehi muli mwanove.”+
30 Ngocho ayile kwimbo lyenyi, awanyine mwanenyi nasavala hakahela, uze ndemone namulovoka lyehi.+
31 Jino omu Yesu afumine kungalila yaTule, apulasanyine muShitone nakuheta kuKalungalwiji waNgalileya palanga namungalila yaNdekapole.*+
32 Vatu vamunehelele kajika matwitwi uze apwile nakalaka,+ kaha vamulembelelele ngwavo amunangike livoko lyenyi.
33 Amufumishile haliyongomena nakuya nenyi kupenge. Kaha engishile minwe mumatwitwi enyi, afwijile maleji, amukwachile halilimi.+
34 Kufumaho atalile mwilu, alishishimwine chikuma nakwamba kuli ikiye ngwenyi: “Efwata,” kulumbununa, “Jikuka.”
35 Kaha matwitwi enyi ajikukile,+ nalilimi lyenyi nawa lize lyapwile nakalaka lyasovokele, kaha aputukile kuhanjika kanawa.
36 Kufumaho, avakanjile ngwenyi kanda navalweza mutu numba umweko.+ Oloze omu avakanjilenga chikuma, hakiko jino vahyanyine kuvilika chuma kana.+
37 Valikomokelele chikuma+ nakwamba ngwavo: “Vyuma vyosena eji kulinganga vyamwaza. Eji kulingisanga natujika matwitwi vevwenga, natumama nawa vahanjike.”+
Kwinyikila Chamwishi
^ Kulumbununa, kulya chakuzeneka kulitomesa kweseka najishimbi.
^ Tala Chihande A3.
^ MuchiHelase, por·neiʹa. Tala Mukana waMazu.
^ Chipwe “navilinga vyakwivwisa sonyi.” MuchiHelase, a·selʹgei·a. Tala Mukana waMazu.
^ Chipwe “wakusemukila kuSulofwenyisha.”
^ Chipwe “namuNgalila yaJinganda 10.”
