Mako 8:1-38
8 Hamakumbi aze, kwapwile cheka liyongomena lyalinene lize kalyapwile navyakulyako. Ngocho Yesu asanyikile tumbaji twenyi nakwamba kuli vakiko ngwenyi:
2 “Liyongomena ngunalivwila keke,+ mwomwo vanatwame nayami makumbi atatu, kaha kavalile vyakulyako.+
3 Kachi nge nanguvasuula vayenga nazala kumembo avo, navafwa chizava mujila, mwomwo vamwe vanafumu kwakusuku chikuma.”
4 Oloze tumbaji twenyi vamukumbulwile ngwavo: “Kulihize mutu mwahasa kuwana jimbolo jakulisa vatu vapwaha kuchihela kuno kwakuhona vatu?”
5 Hakwivwa ngocho, avehwile ngwenyi: “Muli najimbolo jingahi?” Vakiko vamukumbulwile ngwavo: “Tuli najimbolo 7.”+
6 Ngocho alwezele lize liyongomena lisendavale hamavu. Kaha ambachile jize jimbolo 7, alombele, ajipuzwile, nakuputuka kujihana kuli tumbaji twenyi vajipangile kuvatu, kaha vajipangilile kuliyongomena.+
7 Vapwile nawa natuvaishi tumwe twatundende. Kahomu alingile natukisula lyehi, avalwezele nawa vatupangijile kuvatu.
8 Ngocho vosena valile, vekuchile, kaha vakungulwile vihanda vize vyasalileho, vazalishile mitonga yayinene 7 yato.+
9 Vaze valile vapwile kafwe malunga 4,000. Kufumaho avasuwile vayenga.
10 Hahaze vene engilile muwato natumbaji twenyi, kaha vejile kungalila yaNdamanuta.+
11 Jino vaFwaliseu vejile, vaputukile kulipula nenyi jipami. Kaha hakusaka ngwavo vamweseke,+ vasakile ngwavo avasolwele chinjikizo chakufuma mwilu.
12 Ngocho alishimwokele chikuma mushipilitu yenyi nakwamba ngwenyi: “Mwomwo ika chisemunwino chino chili nakusakila kumona chinjikizo?+ Chamuchano vene nangwamba ngwami, chisemunwino chino kaveshi kuchisolwela chinjikizoko.”+
13 Kufumaho, avasezele, engilile cheka muwato nakuya musali.
14 Oloze tumbaji vavulyamine kumbata jimbolo. Kavapwile navyakulya vyeka muwatoko shina mbolo yimwe kaha.+
15 Jino avahuhumwine ngwenyi: “Tonenunga, zangamenu nachimbalwila chavaFwaliseu nachimbalwila chaHelote.”+
16 Ngocho vaputukile kulipula jipami mwavomwavo mwomwo kavambachile jimboloko.
17 Yesu hakutachikiza chuma kana, ambile kuli vakiko ngwenyi: “Ikaze muli nakulipulila jipami ngwenu kamweshi najimboloko? Kumana noholyapwa kanda munangakane nakumona mwalumbunukila manganako nyi? Uno michima yenu kanda yichimone lika mwalumbunukila vyuma tahi?
18 ‘Enu meso muli nawo, uno kamweshi nakumonako nyi? Matwitwi nawa muli nawo, uno kamweshi nakwivwako nyi?’ Uno enu kamweshi nakwanuka
19 omu ngwapuzwile jize jimbolo jitanu+ nakujihana malunga 5,000 nyi? Mwakungulwile mitonga yingahi yakuzala yavihanda vyajimbolo vize vyasalileho?” Vakiko vamukumbulwile ngwavo: “Mitonga 12.”+
20 “Kahomu ngwapuzwilanga vaze malunga 4,000 jize jimbolo 7, mwakungululanga mitonga yayinene yakuzala yingahi yavihanda vyajimbolo vize vyasalangaho?” Vakiko vamukumbulwile ngwavo: “Mitonga 7.”+
21 Jino ambile kuli vakiko ngwenyi: “Noholyapwa kanda lika mumone mwalumbunukila manganako nyi?”
22 Kaha vahetele kuMbetesayita. Jino vatu vanehelele Yesu kapuputa, kaha vamulembelelele ngwavo amukwate.+
23 Ngocho akwachile kulivoko lyauze kapuputa nakumutwala kusali yalimbo. Kahomu alingile namufwijila lyehi maleji hameso,+ amunangikile mavoko nakumwihula ngwenyi: “Uli nakumona vimwe tahi?”
24 Uze mutu andwile meso enyi nakwamba ngwenyi: “Nguli nakumona vatu, oloze vali nakusoloka nge mitondo yize yili nakutambwojoka.”
25 Jino anangikile cheka mavoko hameso ayauze mutu, kaha uze mutu amwene jino kanawa. Meso enyi vawokile, kaha apwile nakumona kanawa vyuma vyosena.
26 Ngocho amusuwile ayenga kwimbo lyenyi, nakwamba ngwenyi: “Kanda nawingila mwimboko.”
27 Yesu natumbaji twenyi vayile jino kumembo akuKesaliya Fwilipi. Kaha aputukile kwihula tumbaji twenyi mujila ngwenyi: “Uno vatu vali nakwamba ngwavo ami yami iya?”+
28 Vakiko vambile kuli ikiye ngwavo: “Vamwe ngwavo Yowano Muka-kumbapachisa,+ veka ngwavo Elija,+ veka nawa ngwavo umwe wavapolofweto.”
29 Kaha avehwile ngwenyi: “Nyi enu ngwenu ami yami iya?” Petulu akumbulwile ngwenyi: “Ove yove Kulishitu.”+
30 Hakwivwa ngocho, avakanjile ngwenyi kanda navalweza mutu numba umwe vyaikiyeko.+
31 Kaha nawa aputukile kuvanangula ngwenyi Mwanamutu atela kuhita muvihuli vyavivulu nakumukana kuli vakulwane, navapilishitu vavakulwane, navaka-kusoneka, nakumujiha,+ kahomu namukahita makumbi atatu mwakasanguka.+
32 Mazu awa apwile nakuwahanjika hatoma. Oloze Petulu amutwalile kupenge nakuputuka kumutenukila.+
33 Yesu anyingulukile, atalile tumbaji twenyi, kaha atenukilile Petulu ngwenyi: “Ove Satana, hita kunyima yami! Mwomwo ove kawashinganyeka mwaya vishinganyeka vyaKalungako, oloze mwaya vishinganyeka vyavatu.”+
34 Jino Yesu asanyikile lize liyongomena natumbaji twenyi nakwamba kuli vakiko ngwenyi: “Kachi nge mutu mwasaka kungukavangiza, alikane ivene nakumbata chitondo chenyi chakuyanjishila,* kaha angukavangizenga lika.+
35 Mwomwo weshowo mwasaka kulwila mwono wenyi mwakaujimbalisa, oloze weshowo mwajimbalisa mwono wenyi mwomwo yayami kaha nawa mwomwo yamujimbu wamwaza, mwakaulwila.+
36 Nganyo mukaze mwawanyinaho mutu kachi nge mwaheta kaye kosena, oloze mwatokesa mwono wenyi?+
37 Chuma mukaze mutu mwahana chakutambasana namwono wenyi?+
38 Mwomwo weshowo mwangwivwila sonyi ami namazu ami muchisemunwino chino chavaka-ukoji* nashili, naMwanamutu nawa mwakamwivwila sonyi+ omu mwakeza muupahu waIse navangelo vajila.”+
