Mako 9:1-50
-
Yesu mwalyalumuna mweka (1-13)
-
Kanyike wandemone navamuka (14-29)
-
Vyuma vyosena vyapwa vyavyashi kuli mutu uze ali nalufwelelo (23)
-
-
Navavuluka cheka chimweza kufwa chaYesu (30-32)
-
Tumbaji navalipula jipami hali ou wamulemu (33-37)
-
Weshowo keshi nakutwimanyina nakoleko napu wetu (38-41)
-
Vimbunji vyakuhukanyisa (42-48)
-
“Pwenunga namungwa muli enu” (49, 50)
9 Kaha nawa, ambile kuli vakiko ngwenyi: “Chamuchano vene nangwamba kuli enu ngwami, hali ava vanemana hano hali vamwe kaveshi kukafwako kuvanga chatete vanamono Wangana waKalunga vanauzamisa lyehi.”+
2 Kahomu mwahichile makumbi 6, Yesu ambachile Petulu, naYakova, naYowano nakuya navo helu lyapili yayisuku kwauka wavo. Kaha alyalumwine mweka kumeso avo.+
3 Uvwalo wenyi wahelu wavyakumine vyakuvyaku, watomene to, kaha kakweshi muka-kutomesa uvwalo hano hamavu nahase kutomesa uvwalo nganako.
4 Jino vamwene Elija naMose vali nakushimutwila naYesu.
5 Kaha Petulu ambile kuli Yesu ngwenyi: “Ove Lapi, nachiwaha etu kutwama vene kuno. Ngocho twitavise tutunge jimbalaka jitatu, yimwe yayove, yimwe yaMose, yimwe yaElija.”
6 Petulu kejivile vyakuhanjikako, mwomwo vevwile woma chikuma.
7 Kaha kwejile livwi, lyavafwikile, kaha muze mulivwi mwafumine lizu+ ngwalyo: “Ou ikiye Mwanami, ou ngwazanga.+ Mwivwililenunga.”+
8 Hahaze vene vatalile kwosena, kaha kavamwene mutu numba umweko, shina Yesu kaha.
9 Omu vapwile nakushikumuka hapili, Yesu avakanjile ngwenyi kanda navambulula chuma vamonanga kumutu numba umweko+ palanga nomu mwakalinga Mwanamutu hanasanguka lyehi kuvafu.+
10 Kaha mazu kana vawalaminyine kumichima yavo,* oloze vashimutwilile mwavomwavo mwalumbunukilile chihande chakusanguka kuvafu.
11 Jino vaputukile kumwihula ngwavo: “Mwomwo ika vaka-kusoneka veji kwambilanga ngwavo kuvanga chatete Elija+ neza?”+
12 Ikiye avakumbulwile ngwenyi: “Elija mwalivanga kwiza nakukindulwisa cheka vyuma vyosena muze vyapwile.+ Oloze mwomwo ika vasonekela kutalisa kuli Mwanamutu ngwavo atela kuhita muvihuli vyavivulu+ nakumumona kupwa wamokomoko?+
13 Oloze nangwamba kuli enu ngwami, Elija+ eza lyehi, kaha vamulingile mweshomwo vasakile kumulinga, ngana muze vasonekele vyaikiye.”+
14 Jino omu vahetele kuli vakwavo tumbaji, vamwene liyongomena lyalinene linavajingilika, kaha vaka-kusoneka vali nakulipula navo jipami.+
15 Omu liyongomena lyosena lyamumwene, valikomokelele, kaha valahilile kuli ikiye nakumumeneka.
16 Ngocho avehwile ngwenyi: “Vyuma muka muli nakulipula navo jipami?”
17 Kaha mutu umwe haliyongomena amukumbulwile ngwenyi: “Ove Muka-kunangula, ngwakunehelanga mwanami walunga, mwomwo ali nashipilitu waumama.+
18 Heshoho mwamukwachila, eji kumumbilanga hamavu, kaha eji kutupulanga lifulu kukanwa nakulingenjunga kumazo, kaha nangolo jeji kumukumanga. Ngwalwezanga tumbaji twove mangana vamulovole, oloze kavahasangako.”
19 Kaha avakumbulwile ngwenyi: “Enu vaka-chisemunwino chakuhona lufwelelo,+ nangutwamanga nayenu palanga nakumwaka uka? Nangumyechelela lika palanga nakumwaka uka? Munehe kuli ami.”+
20 Ngocho vanehele uze mwana walunga kuli ikiye. Oloze uze shipilitu hakumona Yesu hahaze vene atunyishile uze mwana. Kahomu alingile nalimbuka lyehi hamavu, alyalangile nakutupula lifulu kukanwa.
21 Kaha Yesu ehwile ise yayauze mwana ngwenyi: “Chuma kanechi chinalingiwanga kuli ikiye hamyaka yingahi?” Ikiye ambile ngwenyi: “Kufuma vene kuunyike wenyi,
22 kaha kakavulu eji kumumbilanga mukakahya namumeya mangana amunongese. Oloze kachi nge unahase kulingako chuma chimwe, twivwileko keke nakutukafwa.”
23 Yesu ambile kuli ikiye ngwenyi: “Mwomwo ika unambila ngwove, ‘Kachi nge unahase’? Pundu vene, vyuma vyosena vyapwa vyavyashi kuli mutu uze ali nalufwelelo.”+
24 Hahaze vene ise yayauze mwana atambakanyine ngwenyi: “Lufwelelo nguli nalwo! Ngukafwe oho ngunazeneka lufwelelo!”+
25 Yesu hakumona jino ngwenyi liyongomena lili nakulahila kuli vakiko, atenukilile uze shipilitu wamupi ngwenyi: “Ove shipilitu waumama, ove unamujiki matwitwi, nangukwamba ngwami, mulovoke, kanda ukamwingila chekako.”+
26 Kahomu alingile uze mwana natetumuka lyehi nalizu lyakukanguka nakutunya chikuma, uze shipilitu alovokele, kaha uze mwana afwile zazauta, ngocho vatu vavavulu vapwile nakwamba ngwavo: “Nafu!”
27 Oloze Yesu amukwachile kulivoko nakumukatula, kaha akatukile.
28 Kahomu Yesu engilile muzuvo, tumbaji twenyi vamwihwile kwauka wavo ngwavo: “Mwomwo ika twahonenanga kulovola uze ndemone?”+
29 Ikiye ambile kuli vakiko ngwenyi: “Ndemone wamuyachou nahase kulovoka kuvanga kaha nakulomba.”
30 Jino vafumine kuze nakupulasana muNgalileya, oloze kasakile mutu numba umwe atachikize chuma kanechiko.
31 Mwomwo apwile nakunangula tumbaji twenyi nakuvalweza ngwenyi: “Mwanamutu navakamuhana mumavoko avatu, kaha navakamujiha.+ Numba tuhu navakamujiha, oloze mwakasanguka omu namukahita makumbi atatu.”+
32 Oloze vakiko kavamwene mwalumbunukilile mazu enyiko, kaha vevwile woma wakumwihula.
33 Jino vejile kuKapelenau. Kahomu apwile muzuvo, avehwile ngwenyi: “Vyuma muka mwapwanga nakulipula jipami mujila?”+
34 Vakiko vaholele kulu, mwomwo mujila vapwile nakulipula jipami mwavomwavo vawane iya wamulemu.
35 Ngocho atwamine nakusanyika vaze 12 nakwamba kuli vakiko ngwenyi: “Kachi nge mutu umwe nasake ngwenyi apwenga watete, kaha apwenga wakukuminyina kuli vosena, kaha nawa apwenga muka-kuzachila vosena.”+
36 Jino ambachile mwana wamundende, amwimikile mukachi kavo, kaha amukwachile nakwamba kuli vakiko ngwenyi:
37 “Weshowo mwatambula mwana wamundende nganou+ mwomwo yalijina lyami, nangutambula nayami nawa. Kaha weshowo mwangutambula ami, katambwile ami kahako, oloze nauze nawa angutumine.”+
38 Yowano ambile kuli ikiye ngwenyi: “Ove Muka-kunangula, twamonanga mutu umwe ali nakulovola vandemone mulijina lyove, kaha twesekanga kumukanda, mwomwo kapwanga nakutukavangizako.”+
39 Oloze Yesu ambile ngwenyi: “Kanda kweseka kumukandako, mwomwo kakweshi mutu mwazata mulimo wangolo mulijina lyami, kufumaho mwahanjika mazu amapi hali amiko.
40 Mwomwo weshowo keshi nakutwimanyina nakoleko napu wetu.+
41 Weshowo mwamihana lupasa lwameya akunwa mwomwo munapu muvatu vaKulishitu,+ chamuchano vene nangumilweza ngwami, keshi kukatokesa fweto yenyiko.+
42 Oloze weshowo mwahukanyisa umwe hali ava vavandende vaze vali nalufwelelo, nachiwaha kachi nge navamukashilila lilolwa lyakuchekesa unga mushingo nge lize eji kunyengumunanga chimbulu, nakumumbila mukalungalwiji.+
43 “Kachi nge livoko lyove lili nakukuhukanyisa, livatuleko. Chinawahe kuli ove kutambula kuyoya nakutenguka chove kuhambakana kuya namavoko ove avali muNgehena,* mukakahya kaze navahona kujima.+
44 *——
45 Kachi nge lihinji lyove lili nakukuhukanyisa, livatuleko. Chinawahe kuli ove kutambula kuyoya nautonji wove kuhambakana kukumbila namahinji ove avali muNgehena.*+
46 *——
47 Kaha kachi nge liso lyove lili nakukuhukanyisa, limbile.+ Chinawahe kuli ove kwingila muWangana waKalunga naliso limwe kuhambakana kukumbila nameso ove avali muNgehena,*+
48 muze mavunu kaveshi kufwako, kaha nawa kakahya kakeshi kujimako.+
49 “Mwomwo mutu himutu vatela kumulakumwina mungwa wakakahya.+
50 Mungwa wapwa wamwenemwene, oloze kachi nge mungwa nausamuka, kaha ngolo jawo namujikindulwisa cheka naka?+ Pwenunga namungwa muli enu,+ kaha twamenunga mukuunda navakwenu.”+
Kwinyikila Chamwishi
^ Chipwe pamo, “Kaha chihande kana vachilamine.”
^ Tala Mukana waMazu.
^ Tala Chihande A3.
^ Tala Mukana waMazu.
^ Tala Chihande A3.
^ Tala Mukana waMazu.
