Malaki 1:1-14
1 Awa akiko mazu alupi:
Yehova ahanjikile kuli vaIsalele kuhichila muli Malaki* ngwenyi:
2 Yehova nambe ngwenyi: “Ami ngunamizangenga.”+
Oloze enu munambe ngwenu: “Uno unatuzangenga ngachilihi?”
Kaha Yehova nambe ngwenyi: “Uno Esau kapwile ndumbwaYakovako nyi?+ Oloze ngwazangile Yakova,
3 Esau ngwamuhungile.+ Kaha ngwenyekele jipili jenyi,+ luheto lwenyi ngwaluhanyine kuli vamyumbwe mupambo.”+
4 “Numba tuhu vaEtome vanambe ngwavo, ‘Vanatunongesa, oloze natukinduluka nakutungulula jingundu,’ Yehova wamayongomena nambe ngwenyi, ‘Namukatunga, oloze ami nangukapuzula. Chihela kana navakachivuluka ngwavo “ngalila yavilinga vyavipi,” kaha vakiko navakavavuluka ngwavo, “vatu vaze nahungu Yehova haya myaka yosena.”+
5 Namukamona chuma kana nameso enu, kaha namukamba ngwenu: “Yehova vamutohwesenga mungalila yavaIsalele.”’”
6 “Yehova wamayongomena nambe kuli enu vapilishitu muli nakulumbilisa lijina lyenyi+ ngwenyi: ‘Mwana eji kuvumbikanga ise,+ ngamba eji kuvumbikanga kaka yenyi. Jino nge ami ngusenu,+ kaha kunguvumbika chili halihize?+ Kachi nge ngukaka yenu, kaha kungwivwa woma* chili halihize?’
“‘Oloze enu munambe ngwenu: “Lijina lyove tunalilumbilisa ngachilihi?”’
7 “‘Munalilumbilisa hakuhana vyakulya* vize vinapihi halijiko lyami lyakulumbila.’
“‘Kaha munambe ngwenu: “Uno tuli nakukupihisa ngachilihi?”’
“‘Hakwamba ngwenu: “Mesa yaYehova+ vatela kuyilumbilisa.”
8 Omu mweji kunehanga vimuna vakutuvika meso kupwa wana, mweji kwambanga ngwenu: “Kachapihileko.” Omu mweji kunehanga nawa vimuna vakumbilikita chipwe vakuviza, mweji kwambanga ngwenu: “Kachapihileko.”’”+
“Achesekenu kuvahana kuli nguvulu yenu. Kutala mwamivwila kuwaha chipwe kumitambula nalikoji nyi?” Omu mukiko mwanambe Yehova wamayongomena.
9 “Achimulembelelenu Kalunga mangana atwivwile uselewa. Kutala mwamitambula nalikoji hakumuhana mawana kana nyi?” Omu mukiko mwanambe Yehova wamayongomena.
10 Yehova wamayongomena nambe ngwenyi: “Iya hali enu eji kulisuulanga kusoka kuvikolo?*+ Mwomwo enu kamweshi kuwika nalijiko lyami lyakulumbila chakuzeneka fwetoko.+ Kangwamizangileko, kaha kangweshi nakwivwila kuwaha wana wakufuma kumavoko enuko.”+
11 Yehova wamayongomena nambe ngwenyi: “Kufuma kumututuko nakutwala kumulauko lijina lyami nalikatohwa muli vaka-mafuchi.+ Lijina lyami navakalilumbilanga vimuna vakuvatula nakulihanyina mawana kuvihela vyosena, kupwa wana utoma. Mwomwo lijina lyami nalikatohwa muli vaka-mafuchi.+
12 “Oloze muli nakujilulula lijina lyami*+ hakwamba ngwenu: ‘Mesa yaYehova yinapihi, kaha mawana aliho, navyakulya viliho vinapu vyakulumbilisa.’+
13 Mweji kwambanga nawa ngwenu, ‘Vinatufutwisa kumichima,’ kaha mweji kuvihumbikanga nakatangalakaji.” Omu mukiko mwanambe Yehova wamayongomena. “Mweji kunehanga vimuna vakwiva, vakumbilikita, navava vakuviza. Mweji kunehanga vyuma kanevi kupwa wana. Kutala ngunahase kutambula vyuma kanevi numba?”+ Omu mukiko mwanambe Yehova.
14 Yehova wamayongomena nambe ngwenyi: “Mutu uze mwalishika lushiko nakuhana Yehova chimuna uze ali nakatenga, okunyi ali nachimuna wachilunga walambwe hautanga wenyi, apwenga wakwangula. Mwomwo ami nguMwangana wamunene,+ kaha lijina lyami navalivwanga woma muli vaka-mafuchi.”+
Kwinyikila Chamwishi
^ Ulumbunwiso, “Muluwa Wami.”
^ Chipwe “kaha kungulemesa.”
^ Hepe., “hakuhana mbolo.”
^ Pamo mulimo wakusoka kuvikolo vyatembele.
^ Chipwe pamo, “Oloze muli nakungujilulula.”
