Malaki 2:1-17
2 “Enu vapilishitu, elu lukiko lushimbi ngunamihane.+
2 Kachi nge namukana kulukavangiza nakuluhaka muchima mangana mutohwese lijina lyami, kaha nangukamitumina changu.+ Jikisu jenu nangukajalumuna kupwa vyangu.+ Ngunajalumuna lyehi kupwa vyangu, mwomwo lushimbi lwami kamweshi nakuluhaka muchimako.” Omu mukiko mwanambe Yehova wamayongomena.
3 “Talenu! Mbuto munakuu nangukajenyeka* mwomwo yayenu.+ Nangukamishila tuji twavimuna vakuviwanyino vyenu kumeso. Kaha navakamitwala kuvishita vyatuji.
4 Ngocho namukatachikiza ngwenu ngunamihane elu lushimbi mangana lushiko luze ngwalishikile navaLevi lutwaleho lika.”+ Omu mukiko mwanambe Yehova wamayongomena.
5 “Lushiko lwami ngwalishikile navakiko lwapwile lwakuvahana kuyoya nakuneha kuunda mangana vangwivwenga woma. Vangwivwilenga woma, vevwilenga woma lijina lyami.
6 Jishimbi* jamuchano japwilenga mutunwa twavo,+ kaha kavahanjikilenga vyuma vyavipiko. Vatambukilenga nayami mukuunda namukwoloka,+ kaha vakafwile vavavulu vafume kuupi.
7 Mwomwo vapilishitu vatela kulama chinyingi chaKalunga, kaha vatu vatela kwihula vapilishitu vavalweze mwaya jishimbi,*+ mwomwo vapwa valuwa jaYehova wamayongomena.
8 “Oloze enu munapyapumuka mujila. Munalingisa vatu vavavulu vahukane kujishimbi.*+ Munenyeka lushiko luze ngwalishikile navaLevi.”+ Omu mukiko mwanambe Yehova wamayongomena.
9 “Ngocho nangukamilingisa vakamilumbilise kuli vatu nakuminyisa, mwomwo kamwalamine jijila jamiko, oloze munatalenga vatu kumeso hakuvasopesa najishimbi.”+
10 “Uno katweshi nasetu umweko numba?+ Kutala kavatutengele kuli Kalunga umweko numba? Nyi ikaze tweji kulimbembejekelanga mwetumwetu+ nakujilulula lushiko lwavakakuluka jetu?
11 VaYuta vanambembejeka, vanalingi vyuma vyakwivwisa unyengwe muIsalele namuYelusalema. Mwomwo vaYuta vanalumbilisa kujila* chaYehova+ chize azanga. Kaha vanambate mapwevo vaka-kulemesa tulunga veka kupwa mapwevo javo.+
12 Veshovo vatwama mujimbalaka jaYakova vaze veji kulinganga chumechi, Yehova mwakavanongesa, numba tuhu veji kuhananga Yehova wamayongomena wana.”+
13 “Kuli chuma chikwavo* nawa mweji kulinganga, chize cheji kulingisanga lijiko lyaYehova lyakulumbila lizale namasoji, nakulila, nakulishona. Chuma kana chikiko cheji kumulingisanga azeneke kuhaka muchima kuwana wenu, chipwe kuwivwila kuwaha.+
14 Kaha mutu himutu eji kwambanga ngwenyi, ‘Mwomwo ika?’ Mwomwo Yehova napu chinjiho mukachi kove napwevo wahaukweze wove uze unambembejeka, numba tuhu napu mukwenu, kaha nawa pwevo lyove uze walishikile nenyi lushiko.+
15 Oloze kwapwile vamwe vaze vazenekele kulinga chuma kana, mwomwo vapwile nashipilitu yaKalunga. Uno chuma muka vapwile nakufwila? Vapwile nakufwila kupwa navana* vaKalunga. Shikaho lamenunga michima yenu, kanda namumbembejekanga mapwevo vahaukweze wenuko.
16 Mwomwo ami ngwahunga* kulilukulula.”+ Omu mukiko mwanambe Yehova Kalunga kaIsalele. “Ngwahunga nawa vaze veji kulinganga ulyanyi.” Omu mukiko mwanambe Yehova wamayongomena. “Shikaho lamenunga michima yenu, kanda namumbembejekanga mapwevo vahaukweze wenuko.+
17 “Munevwisa Yehova kupihya namazu enu muli nakuhanjika.+ Oloze mweji kwambanga ngwenu, ‘Uno tunamwivwisa ngachilihi kupihya?’ Munamwivwisa kupihya hakwamba ngwenu, ‘Weshowo eji kulinganga vyuma vyavipi napu wamwaza kumeso aYehova, kaha eji kumwivwilanga kuwaha.’+ Munamwivwisa nawa kupihya hakwamba ngwenu, ‘Uno Kalunga wachiyulo ali kulihize?’”
Kwinyikila Chamwishi
^ Hepe., “nangukajitenukila.”
^ Chipwe “Jindongi.”
^ Chipwe “jindongi.”
^ Chipwe pamo, “vahukane mwomwo yajindongi jenu.”
^ Chipwe pamo, “vanalumbilisa chihela chajila.”
^ Hepe., “chamuchivali.”
^ Hepe., “nambuto.”
^ Hepe., “Mwomwo ikiye ahunga.”
