Malaki 3:1-18
3 Yehova wamayongomena nambe ngwenyi: “Talenu! Nangukatuma muluwa wami, kaha mwakanguwahishila jila.+ Jino Mwata wamuchano uze muli nakutondatonda mwakeza kutembele yenyi.+ Muluwa walushiko uze mweji kwivwilanga kuwaha, mwakeza. Muluwa kana mwakeza vene.
2 “Iyaze mwakahasa kumika halikumbi mwakeza? Iyaze mwakahasa kwimana omu mwakasoloka? Mwomwo ikiye mwakapwa nge kakahya kamuka-kuheha, nge njapau+ yavaka-kukosa uvwalo.
3 Mwakatwama nge muka-kuheha, nge muka-kutomesa palata,+ kaha mwakatomesa vana vaLevi. Mwakavatomesa nge ulu, mwakavatomesa nge palata. Kaha navakahananga wana kuli Yehova mukwoloka.
4 Kaha wana wavaYuta nawou wavatu vamuYelusalema naukevwisa Yehova kuwaha, nge muze chapwilenga kumakumbi akunyima, nge muze chapwilenga kumyaka yakushikulu.+
5 “Nangukeza kuli enu nakumisopesa. Nangukapwa nguchinjiho wakupayisa vaka-kupanda,+ navaka-ukoji, navaka-kulishinga mwamakuli,+ navaka-kuyanjisa vangamba javo vaze vanakambe,+ navaka-kuyanjisa vatuliwe navana vakuzeneka masevo.*+ Nangukapayisa nawa vaze veji kukananga kukafwa vamwiza.+ Vosena ava vanakane kungwivwa woma.” Omu mukiko mwanambe Yehova wamayongomena.
6 “Mwomwo ami yami Yehova, kaha kangwalumukako.*+ Enu munapu muvana vaYakova, kaha kamwakumineko.
7 Kufuma vene kumakumbi avakakuluka jenu, munasezenga jindongi jami, munakanenga kujilama.+ Kindulukenu kuli ami, kaha ami nawa nangukinduluka kuli enu.”+ Omu mukiko mwanambe Yehova wamayongomena.
Oloze enu munambe ngwenu: “Uno natukinduluka ngachilihi kuli ove?”
8 “Kutala mutu nahase kwiva vyuma vyaKalunga nyi? Oloze enu muli nakungwiva.”
Kaha enu munambe ngwenu: “Uno tuli nakukwiva ngachilihi?”
“Muli nakungwiva kuvize vyakusokesa mumakumi namawana.
9 Munapu muvakwangula,* mwomwo muli nakungwiva, muvosena mulifuchi muli nakungwiva.
10 Nehenu vyakusokesa mumakumi vyosena muzuvo yakulamina vyuma+ mangana muzuvo yami mupwenga vyakulya.+ Ngwesekenu muchuma echi mumone numba nge kangweshi kumisokolwela vikolo vyamwilu+ nakumihingunwina jikisu palanga nomu namuhona mwakujitambwila.”+ Omu mukiko mwanambe Yehova wamayongomena.
11 Yehova wamayongomena nambe ngwenyi: “Nangukatenukila vaze veji kulyanga* jimbuto jenu, kaha kaveshi kukenyeka cheka jimbuto jamumande enuko. Mivinyo yenu nawa nayikemanga mihako.”+
12 Yehova wamayongomena nambe ngwenyi: “Vaka-mafuchi osena navakamivuluka ngwavo muvakuwahilila,+ mwomwo namukapwanga mulifuchi lyakwivwisa kuwaha.”
13 Yehova nambe ngwenyi: “Mazu munahanjikanga kuli ami amapi chikuma.”
Oloze enu munambe ngwenu: “Uno mazu muka amapi tunahanjikanga kuli ove?”+
14 “Munambenga ngwenu, ‘Kuzachila Kalunga kacheshi nanganyoko.+ Uno tunanganyala vyuma mukaze hakulamanga jindongi jaYehova wamayongomena nakutambukanga nakulinyisa kumeso enyi?
15 Vatu vakazamuzamu tuli nakuvamona vali nakuwahilila. Kaha vaka-kulinga vyuma vyavipi nawa tuli nakuvamona vali nakufukila.+ Veji kwesekanga Kalunga, oloze navyuma vyavipi vyeji kuvawananga vyauchi.’”
16 Halwola kana, vaze vevwilenga Yehova woma valihanjikishilenga mutu himutu nasepa lyenyi. Kaha Yehova atengelekele matwitwi enyi nakwivwilila. Mukanda wakwanukilaho vausonekelele kumeso enyi.+ Vasonekelemo vaze vevwilenga Yehova woma navaze vashinganyekelenga halijina lyenyi.*+
17 Yehova wamayongomena nambe ngwenyi: “Ava navakapwa vatu jami+ halikumbi lize nangukavalingisa kupwa luheto lwami lwakulipwila.*+ Nangukavatetela nge muze lunga mwatetela mwanenyi uze eji kumwononokanga.+
18 Kaha namukamona chihandwa chatwama hali muka-kwoloka namuka-kuhuka,+ nahali ou eji kuzachilanga Kalunga nayou azeneka kumuzachila.”
Kwinyikila Chamwishi
^ Chipwe “navanginga.”
^ Chipwe “kangwalumukileko.”
^ Chipwe pamo, “Muli nakungwangula.”
^ Pamo vali nakuvuluka tututu.
^ Chipwe pamo, “navaze vamwenenga lijina lyenyi kupwa lyalilemu.”
^ Chipwe “luheto lwami lwalulemu.”
