Mateu 11:1-30
11 Jino omu Yesu akumishile kuhana jindongi tumbaji twenyi 12, akatukile kufuma kuze nakuya nakwambulula nakunangula mujinganda jeka.+
2 Oloze Yowano uze apwile mukamenga+ hakwivwa milimo yaKulishitu, atumineko tumbaji twenyi+
3 vakamuhulise ngwavo: “Ove yove Uze vambile ngwavo ali nakwiza tahi, nyi twatela kutalililako weka?”+
4 Yesu avakumbulwile ngwenyi: “Kindulukenu mukamwambulile Yowano vyuma muli nakwivwa nakumona:+
5 Tupuputa vali nakumona,+ vitonji vali nakutambuka, vaka-mbumba+ vali nakuvatomesa, tujika matwitwi vali nakwivwa, vafu vali nakuvasangula, kaha vaka-kuhutwa vali nakuvambulila mujimbu wamwaza.+
6 Awahilila ou ahona kuwana chuma chimwe muli ami chakumuhukanyisa.”+
7 Kahomu tumbaji twaYowano vayile, Yesu aputukile kuhanjika hali Yowano kumayongomena ngwenyi: “Uno mwayile mupambo mangana mukatale ika?+ Uno mwayile nakutala lihongo lyakupekwomwoka napeho tahi?+
8 Nyi mwayile nakutala ika? Mwayile nakutala mutu uze avwalilenga uvwalo wamahina asenena* tahi? Vaze veji kuvwalanga uvwalo wamahina asenena vali mujizuvo javamyangana.
9 Nyi ikaze mwayilililemo? Mwayile nakutala kapolofweto tahi? Nangumilweza ngwami, ounyi nahambakana nakapolofweto.+
10 Ou ikiye vene uze vavuluka muvisoneka ngwavo: ‘Talenu! Nangukatuma muluwa wami kulutwe lwove,* ikiye mwakakuwahishila jila.’+
11 Chamuchano vene nangwamba kuli enu ngwami, hali vaze vasemuka kuli mapwevo kaheshi weka wakuhambakana Yowano Muka-kumbapachisako, oloze mutu wamundende muWangana wamelu napu wamunene kumuhambakana ikiye.+
12 Kufuma kumakumbi aYowano Muka-kumbapachisa nakuneha noholili, Wangana wamelu ukiko vatu vakilikichila mangana vauwane, kaha vaze vali nakukilikita naluzema vali nakuuwana.+
13 Mwomwo Jishimbi naMazu aVapolofweto vyosena vyapolofwetelenga palanga nakuli Yowano,+
14 kaha kachi nge munasake kuchitavila, ou ikiye vene ‘Elija uze mwakeza.’+
15 Ou ali namatwitwi evwilile.
16 “Uno chisemunwino chino nanguchifwanyisa kuli veya?+ Chinafwane nge vana vavandende vanatwame kuvilanjilo, vaze vali nakulitambakana navakwavo
17 ngwavo: ‘Twamimbilanga jipanda, oloze enu kamwakinangako. Twalilanga jimbimbi, oloze enu kamwalyonyingangako.’
18 Chochimwe nawa, Yowano ejile, kalilengako, kanwinengako, oloze vatu ngwavo, ‘Ali nandemone.’
19 Kaha Mwanamutu neza, ali nakulya nakunwa,+ vatu nawa ngwavo, ‘Talenu! Mutu kana afwa hakulya nahakunwa vinyo, apwa sepa lyavaka-kutambula mitelo navaka-shili.’+ Numba ngocho, mangana eji kulijimbulanga kupwa akwoloka kumilimo yawo.”+
20 Jino aputukile kusaula jinganda jize alingililemo milimo yenyi yangolo yayivulu, mwomwo vatu vamujinganda kana kavapihililile nakwalumukako. Ambile ngwenyi:
21 “Lamba kuli ove Kolajine! Lamba kuli ove Mbetesayita! Mwomwo kachi milimo yangolo yize vanalingila muli enu yikiko valingililile muTule naShitone, kachi vatu vamujinganda kana vapihililile nakwalumuka nakuvwala vikeleyi nakutwama muuto.+
22 Shikaho nangwamba kuli enu ngwami, kuzangamisa navakamizangamisa enu haLikumbi lyaKusopesa nachikatohwa chikuma kuhambakana chaTule naShitone.+
23 Kaha ove nawa Kapelenau,+ kutala navakakuzezula mbwe nakwilu numba? Naukashikumuka muFuka,*+ mwomwo kachi milimo yangolo yize vanalingila muli ove yikiko valingilile muSotome, kachi eyi nganda kuyichili nakulikumbi lyalelo.
24 Oloze nangwamba kuli ove ngwami, kuzangamisa navakakuzangamisa ove haLikumbi lyaKusopesa nachikatohwa chikuma kuhambakana chalifuchi lyaSotome.”+
25 Halwola luze, Yesu ambile ngwenyi: “Ove Tata, Mwata wamelu namavu, ngunakwalisa kumeso avatu, mwomwo vyumevi unaviswekela vaka-mangana navaze vananguka, oloze unavisolola kuli vana vavandende.+
26 Ove Tata, mwomwo omu mukiko wevwila kuwaha.
27 Vyuma vyosena vananguhanevyo kuli Tata,+ kaha kakweshi mutu amutachikiza kanawa Mwanako shina Tata kaha.+ Kaha nawa kakweshi mutu amutachikiza kanawa Tatako shina Mwana kaha, naweshowo nawa navazanga kumusolwelayo kuli Mwana.+
28 Twayenu kuli ami enu muvosena muli nakufulyangila nakulemuwa naviteli, kaha ami nangumihizumuna.
29 Mbatenu toka yami nakulinangula kuli ami, mwomwo ami ngumuvwovu, nguwakulikehesa mumuchima,+ kaha namupwa vakuhizumuka.
30 Mwomwo toka yami yayashi kumbata, kaha chiteli chami chachilelu.”
Kwinyikila Chamwishi
^ Chipwe “uvwalo wamwaza.”
^ Hela., “kumeso ove.”
^ Chipwe “muHetese,” kulumbununa fuka yavatu vosena. Tala Mukana waMazu.
