Mateu 12:1-50
-
Yesu ikiye “Mwata waSambata” (1-8)
-
Lunga wakusoseka livoko navamuka (9-14)
-
Ngamba yaKalunga uze Vazanga (15-21)
-
Vandemone navavalovola nashipilitu yajila (22-30)
-
Shili navazeneka kukonekela (31, 32)
-
Mutondo vautachikijila kumihako yawo (33-37)
-
Chinjikizo chaYona (38-42)
-
Omu mwakinduluka shipilitu wamupi (43-45)
-
Naye yaYesu navandumbwenyi (46-50)
12 Halwola luze, Yesu ahichile mumande atiliku haSambata. Tumbaji twenyi vevwile zala, kaha vaputukile kuhela tumitwe twatiliku nakulya.+
2 Omu vaFwaliseu vamwene chuma kana vambile kuli ikiye ngwavo: “Tala! Tumbaji twove vali nakulinga chuma chize kavetavisa kulinga haSambatako.”+
3 Ambile kuli vakiko ngwenyi: “Uno kanda mutangengaho lyehi muze alingile Ndavichi navatu vaze apwile navo omu vevwile zalako nyi?+
4 Engilile muzuvo yaKalunga nakulya jize jimbolo jakutumbika kumeso aKalunga*+ jize katelelele kulyako, chipwe vaze apwile navo, shina vapilishitu kaha.+
5 Nyi kanda mutangengaho lyehi muJishimbi ngwavo, hajiSambata vapilishitu mutembele veji kujilululanga Sambata, oloze kaveshi kupwa namulongako nyi?+
6 Oloze nangumilweza ngwami, hano hali ou ahambakana tembele.+
7 Shikaho, kachi nge mwatachikizanga mwalumbunukila mazu awa ngwavo, ‘Ami ngunasake keke+ keshi vimuna vakuvatulako,’+ kachi kamwahanyine mulonga vatu ava vakuzeneka mulongako.
8 Mwomwo Mwanamutu ikiye Mwata waSambata.”+
9 Omu afumine kuchihela chize, ayile nakwingila musunangonga yavo,
10 kaha mwapwile lunga wakusoseka livoko.+ Ngocho hakusaka vawanyine Yesu mulonga, vamwihwile ngwavo, “Uno vachitavisa kuka mutu haSambata tahi?”+
11 Ikiye ambile kuli vakiko ngwenyi: “Mutu muka hali enu ali namukoko umwe, kaha kachi nge mukoko kana mwaholokela muwina haSambata, mwazeneka kumukwata nakumufumisamo?+
12 Shikaho, mutu alema chikuma kuhambakana mukoko. Ngocho vachitavisa kulinga chuma chamwenemwene haSambata.”
13 Jino ambile kuli uze lunga ngwenyi: “Olola livoko lyove.” Alyolwele, kaha lyalumukile cheka kupwa lyalambwe ngana mwalivoko likwavo.
14 Oloze vaFwaliseu valovokele nakumutwama punga mangana ngwavo vamujihe.
15 Jino Yesu hakutachikiza chuma kana, afumine kuze. Vatu vavavulu nawa vamukavile,+ kaha avokile vosena,
16 oloze avakanjile ngwenyi kanda navamujimbula kuvatuko+
17 mangana mazu vahanjikile kuhichila muli kapolofweto Isaya atesemo, akwamba ngwavo:
18 “Talenu! Ngamba yami+ ou ngwasakwile, ou ngwazanga, ou ngweji* kwivwilanga kuwaha.+ Nangukamuhana shipilitu yami,+ kaha mwakasolola muchapwa chiyulo chakwoloka kuli vaka-mafuchi.
19 Keshi kukakokojola,+ chipwe kukateta mitetoko, chipwe mutu kwivwa lizu lyenyi mujijilako.
20 Keshi kukachika lihongo lyakufunyukako, keshi kukajima wanda uze uli nakufwinda wishiko,+ palanga nomu mwakaneha chiyulo chakwoloka.
21 Chikupu vene, lutalililo lwavaka-mafuchi nalukapendamina halijina lyenyi.”+
22 Jino vamunehelelele mutu uze apwile nandemone uze nawa apwile naupuputa naumama, kaha amukile, ngocho uze kamama ahanjikile nakumona.
23 Kaha mayongomena osena alikomokelele nakuputuka kwamba ngwavo: “Uno ou keshi MwanaNdavichiko nyi?”
24 Oloze vaFwaliseu hakwivwa ngocho, vambile ngwavo: “Ou lunga keshi kulovola vandemone nangolo jekako, shina nangolo jaMbelezembule,* muka-kuyula vandemone.”+
25 Hakutachikiza vishinganyeka vyavo, ambile kuli vakiko ngwenyi: “Weshowo wangana naulimbalaka uvene weji kunonganga, kaha yeshoyo nganda chipwe zuvo nayilimbalaka ivene kayeshi kuzamako.
26 Chochimwe nawa, kachi nge Satana ali nakulovola Satana, kaha nalifumbukila ivene. Kahaze wangana wenyi nauzama ngachilihi?
27 Cheka nawa, kachi nge ami ngweji kulovolanga vandemone nangolo jaMbelezembule, nyi vana venu veji kulovolanga vandemone nangolo jeya? Shikaho vana venu navakapwila vaka-kumisopesa.
28 Oloze nge ami ngweji kulovolanga vandemone nashipilitu yaKalunga, kaha Wangana waKalunga uneza chikupu chakuzeneka enu kutachikiza.+
29 Cheka nawa, uno mutu mwahasa ngachilihi kwingila muzuvo yamutu wangolo nakupukula vikumba vyenyi nge kanda avangile kukasa mutu kana? Kuvanga nalingi ngocho numbanyi apupe zuvo yenyi.
30 Weshowo keshi kuli amiko napu muka-kole wami, kaha weshowo keshi kukungulwila hamwe nayamiko eji kumwanganga.+
31 “Shikaho nangwamba kuli enu ngwami, vatu navakavakonekela jishili javo josena nakusaula chosena chakusaula vyuma vyajila, oloze veshovo navasaula shipilitu kaveshi kukavakonekelako.+
32 Chakutalilaho, weshowo mwahanjika lizu lyalipi hali Mwanamutu, navakamukonekela,+ oloze weshowo mwahanjika vyavipi hali shipilitu yajila, kaveshi kukamukonekelako, chipwe mukatwamino kamyaka yino,* chipwe kamyaka yize nayikezaho.+
33 “Enu yenu mweji kulingisanga mutondo uwahe namihako yawo nawa yiwahe, chipwe kulingisa mutondo upole namihako yawo yipole, mwomwo mutondo vautachikijila kumihako yawo.+
34 Enu vana vaviyenge,+ namuhasa ngachilihi kuhanjika vyuma vyamwaza, okunyi mwapwa muvakuhuka? Mwomwo kanwa keji kuhanjikanga vyuma vinavulu mumuchima.+
35 Mutu wamwaza eji kulovolanga vyuma vyamwaza kuluheto lwamwaza lwamumuchima wenyi, kaha mutu wamupi eji kulovolanga vyuma vyavipi kuluheto lwalupi lwamumuchima wenyi.+
36 Nangumilweza ngwami vatu navakalyambulula+ haLikumbi lyaKusopesa hamazu amokomoko osena veji kuhanjikanga.
37 Mwomwo hamazu ove hakiko navakakuvulukila kwoloka, kaha hamazu ove hakiko nawa navakakuwanyina namulonga.”
38 Jino vaka-kusoneka navaFwaliseu vamwe vamukumbulwile ngwavo: “Ove Muka-kunangula, tuli nakusaka utusolwele chinjikizo.”+
39 Oloze ikiye avakumbulwile ngwenyi: “Chisemunwino chakuhuka chavaka-ukoji* cheji kusakanga lika kumona chinjikizo, oloze kaveshi kuchisolwela chinjikizo chekako, shina chinjikizo chakapolofweto Yona kaha.+
40 Mwomwo ngana muze Yona apwile mujimo lyayauze ishi wamunene makumbi atatu, namusana naufuku,+ mukiko nawa mwakapwa naMwanamutu kwishi yamavu makumbi atatu, namusana naufuku.+
41 Vatu vakuNyineve navakasanguka mulwola lwakusopesa hohamwe nachisemunwino chino, kaha chisemunwino chino navakachipayisa, mwomwo vatu vakuNyineve vapihililile nakwalumuka omu Yona avambulilile.+ Oloze hano hali ou ahambakana Yona.+
42 Mwangana wapwevo wakusulo navakamusangula mulwola lwakusopesa hohamwe nachisemunwino chino, kaha mwakachipayisa, mwomwo ikiye afumine kujisongo jamavu nakwiza nakwivwilila mangana aSolomone.+ Oloze hano hali ou ahambakana Solomone.+
43 “Omu shipilitu wamupi eji kulovokanga muli mutu, eji kuhitangana muvihela vyakuzeneka meya nakutonda chihela chakunokela, oloze keshi kuchiwanako.+
44 Kaha eji kwambanga ngwenyi, ‘Nangukinduluka cheka muzuvo yami muze ngwalovokanga.’ Jino hakuheta kuze eji kuwananga muzuvo mwamokomoko, oloze mwakukomba, mwakuwahisa kanawa.
45 Kaha eji kuyanga nakumbata vashipilitu veka 7 vakumuhambakana ikiye kuhuka nakwiza navo. Kahomu veji kwingilanga muli mutu, veji kutwamanga vene muze. Ngocho katwamino kamutu kana keji kupihyanga chikuma kuhambakana kaze kakulivanga.+ Omu mukiko munachikapwa nawa chisemunwino chino chakuhuka.”
46 Shimbu apwile nakuhanjika kumayongomena, naye navandumbwenyi+ vemanyine kuweluka, vasakile vahanjike nenyi.+
47 Jino mutu umwe ambile kuli ikiye ngwenyi: “Tala! Noko navandumbwove vanemana kuweluka, vali nakusaka kuhanjika nayove.”
48 Ikiye akumbulwile uze apwile nakumulweza ngwenyi: “Iya napu mama, veya vanapu vandumbwami?”
49 Olwele livoko lyenyi nakwinyika tumbaji twenyi, kaha ambile ngwenyi: “Tala! Mama navandumbwami ava.+
50 Mwomwo weshowo eji kulinganga mwaya muchima waTata ou ali mwilu, ikiye ndumbwami walunga, ikiye ndumbwami wapwevo, ikiye mama.”+
Kwinyikila Chamwishi
^ Chipwe “jimbolo jakuhana Kalunga.”
^ Chipwe “ou mwono wami weji.”
^ Lijina kana lyatalisa kuli Satana.
^ Tala Mukana waMazu.
^ Chipwe “chavatu vakuzeneka kushishika.”
