Mateu 13:1-58
-
VIFWANYISA VYAWANGANA (1-52)
-
Muka-kukuva (1-9)
-
Ovyo Yesu azachishililenga vifwanyisa (10-17)
-
Mwalumbununa chifwanyisa chamuka-kukuva (18-23)
-
Tiliku namwila (24-30)
-
Linona lyamusetale nachimbalwila (31-33)
-
Kunangula navifwanyisa nachitesamo upolofweto (34, 35)
-
Mwalumbununa chifwanyisa chatiliku namwila (36-43)
-
Luheto lwakusweka napela yamwenemwene (44-46)
-
Lyoji lyachikokela (47-50)
-
Vyuma vyavihya navyevi vyamwaka (51, 52)
-
-
Yesu navamukana mungalila yakwimbo lyenyi (53-58)
13 Halikumbi lize, Yesu afumine kuze kuzuvo, kaha ayile nakutwama kukalungalwiji.
2 Jino mayongomena amanene ejile kuli ikiye, ngocho Yesu engilile muwato, kaha atwaminemo. Aze mayongomena osena emanyine kutunda.+
3 Jino avalwezele vyuma vyavivulu navifwanyisa+ ngwenyi: “Ivwenu! Muka-kukuva ayile nakukuva mbuto.+
4 Kahomu apwile nakukuva, mbuto jimwe jaholokelele kujila, kaha tujila vejile, vajilile.+
5 Jikwavo jaholokelele hamalolwa haze kahapwile mavu amavuluko, kaha nakushimbula chiku jasokele, mwomwo kahapwile mavu amavuluko.+
6 Oloze omu lyatutukile likumbi, javaukile, kaha jomine chau mwomwo kajapwile namijiko.
7 Jikwavo nawa jaholokelele hamingonga, kaha yize mingonga yakolele nakujikivisa.+
8 Jikwavo jaholokelele hamavu amwaza, kaha japutukile kwima mihako, eji 100, jikwavo 60, jeka 30.+
9 Ou ali namatwitwi evwilile.”+
10 Jino tumbaji vejile nakumwihula ngwavo: “Mwomwo ika uli nakuhanjikila navifwanyisa kuli vakiko?”+
11 Ikiye akumbulwile ngwenyi: “Enu vanamihane mangana akutachikiza mwalumbunukila vyuma vyajila vyakusweka+ vyaWangana wamelu, oloze vakiko kavavahanyinewoko.
12 Mwomwo weshowo ali navyo, navamuwezelako vikwavo kaha mwapwa navyavivulu, oloze weshowo keshi navyoko, nachize ali nacho navamutambulacho.+
13 Shikaho nguli nakuhanjikila kuli vakiko navifwanyisa, mwomwo vali nakutala, oloze kaveshi nakumonako, vali nakwivwilila, oloze kaveshi nakwivwa chipwe kumona mwalumbunukila manganako.+
14 Upolofweto waIsaya uli nakutesamo hali vakiko, wakwamba ngwavo: ‘Kwivwa namwivwa vene, oloze kamweshi kumona chikupu mwalumbunukila vyumako, kaha kutala namutala vene, oloze kamweshi kumonako.+
15 Mwomwo michima yavatu ava yinambumbula, kwivwa vanevu namatwitwi avo, oloze vanaliula, kaha nawa vanalalavika meso avo mangana vahone kumona, mangana vahone kwivwa, vahone kumona namichima yavo mwalumbunukila vyuma, nakwalumuka mangana ami nguvoke.’+
16 “Oloze awahilila meso enu mwomwo eji kumonanga, namatwitwi enu nawa mwomwo eji kwivwanga.+
17 Mwomwo chamuchano vene nangwamba kuli enu ngwami, vapolofweto navaka-kwoloka vavavulu vasakile kumona vyumevi muli nakumona enu, oloze kavavimweneko,+ vasakile kwivwa vyumevi muli nakwivwa enu, oloze kavavivwileko.
18 “Jino ivwenu mwalumbunukila chifwanyisa chamutu uze akuvile mbuto.+
19 Kujila kuze vanakuu mbuto, ou ikiye vene uze mwevwa mazu aWangana, oloze mwahona kumona omu alumbunukila, kaha uze wakuhuka+ himweza nakuhukula awa vanakuu mumuchima wenyi.+
20 Kaha hamalolwa haze vanakuu mbuto, ou ikiye vene uze ali nakwivwa mazu, kaha nakushimbula chiku himwawetavila nakuwahilila.+
21 Oloze muli ikiye kamweshi mijiko, kaha mwatwalaho hatando yayindende, jino omu nakwiza vihuli chipwe luyanjisa mwomwo yamazu, nakushimbula chiku himwahukana.
22 Kaha hamingonga haze vanakuu mbuto, ou ikiye vene uze ali nakwivwa mazu, oloze kulizakamina hakatwamino kamyaka yino,*+ naluheto luze lwatwama nangolo jakutangisa navikivisa mazu, kaha himwahona kwima mihako.+
23 Kaha hamavu amwaza haze vanakuu mbuto, ou ikiye vene uze ali nakwivwa mazu nakumona omu alumbunukila, ikiye uze mwemanga nakulovola mihako, umwe 100, mukwavo 60, weka 30.”+
24 Avalwezele chifwanyisa chikwavo nawa ngwenyi: “Wangana wamelu unafwane nge mutu uze akuvile mbuto jamwenemwene muwande wenyi.
25 Shimbu vapwile vatu mutulo, muka-kole wenyi ejile nakukuva mwila* mutiliku, kaha himwaya.
26 Omu jasokele mbuto nakulovola mitwe, namwila nawa wasolokele.
27 Kaha vandungo jayauze mwenyazuvo vejile nakwamba kuli ikiye ngwavo, ‘Ove Mwata, uno muwande wove kawakuvilemo mbuto jamwenemweneko tahi? Nyi ou mwila nawa unafumu kulihi?’
28 Ikiye ambile kuli vakiko ngwenyi, ‘Muka-kole ikiye nalingi chuma kana.’+ Kaha vaze vandungo vambile kuli ikiye ngwavo, ‘Uno musaka tuyenga nakuuvunyamo tahi?’
29 Oloze ikiye ambile ngwenyi, ‘Nduma, kuchina hakuvunya mwila namuvunyila kumwe natiliku.
30 Vyechenu vyosena vivali vikulile hamwe palanga nahakwaha, kaha hangonde yakwaha nangukalweza vaka-kwaha ngwami: Vangilenu kuvunya mwila muukasekase mikuta nakuwocha. Kufumaho kungululenu tiliku muyihake muchisete chami.’”+
31 Avalwezele chifwanyisa chikwavo nawa ngwenyi: “Wangana wamelu unafwane nge linona lyamusetale, lize mutu ambachile nakutumba muwande wenyi.+
32 Eli linona lyapwa lyalipululu hambuto jikwavo josena. Oloze nge linakulu lyehi, lyeji kupwanga lyalinene havisakwola vyosena nakupwa mutondo, kaha tujila vakutuka mwilu veji kwizanga nakutwama hamitango yawo.”
33 Avalwezele chifwanyisa chikwavo nawa ngwenyi: “Wangana wamelu unafwane nge chimbalwila chize pwevo ambachile nakuchingasana naunga wakutesa muvyesekelo vyavinene vitatu, palanga nomu wafutunukile wosena.”+
34 Vyuma vyosena evi Yesu avihanjikile navifwanyisa kumayongomena. Chikupu vene, kahanjikilenga kuli vakiko chakuzeneka chifwanyisako,+
35 mangana mazu vahanjikile kuhichila muli kapolofweto atesemo, akwamba ngwavo: “Nangulokolola mukanwa kami nakuhanjika vifwanyisa. Nanguvilika vyuma vinapunga vyakusweka kufuma kushikulu.”*+
36 Jino omu alingile hanasuula lyehi aze mayongomena, ikiye engilile muzuvo. Kaha tumbaji twenyi vejile kuli ikiye nakwamba ngwavo: “Tulumbunwine mwaya chifwanyisa chamwila wamuwande.”
37 Ikiye akumbulwile ngwenyi: “Muka-kukuva mbuto jamwenemwene ikiye Mwanamutu,
38 wande ukiko kaye.+ Kaha mbuto jamwenemwene, vakiko vana vaWangana, oloze mwila, vakiko vana vayauze wakuhuka,+
39 kaha muka-kole uze aukuvile ikiye Liyavolo. Lwola lwakwaha lukiko chikukulwishi chakatwamino kamyaka yino,* kaha vaka-kwaha vakiko vangelo.
40 Shikaho, nganomu navavunya mwila nakuwocha nakakahya, mukiko vene munachikapwa nahachikukulwishi chakatwamino kamyaka yino.*+
41 Mwanamutu mwakatuma vangelo jenyi, kaha muWangana wenyi navakafumisamo vyuma vyakuhukanyisa vyosena, navatu vaze vali nakulinganga upapwoki,
42 kaha navakavambila mulilungu lyakakahya.+ Mwamuze vene munavakapwanga nakulila nakulingenjunga kumazo.
43 Halwola luze, vaka-kwoloka navakamunyika zwalala nge likumbi+ muWangana waSevo. Ou ali namatwitwi evwilile.
44 “Wangana wamelu unafwane nge luheto luze lwaswama muchipapa, luze mutu awanyine nakulusweka. Kaha mwomwo yakuwahilila chikuma, ayile nakulandulula vyuma vyosena apwile navyo nakulanda chize chipapa.+
45 “Cheka nawa, Wangana wamelu unafwane nge muka-kusekasana wakutambwojoka uze ayile nakutondatonda jipela jamwenemwene.
46 Omu awanyine pela yimwe yandando yayinene chikuma, hahaze vene ayile nakulanjisa vyuma vyenyi vyosena apwile navyo nakuyilanda.+
47 “Cheka nawa, Wangana wamelu unafwane nge lyoji lyachikokela lize vafuchile mukalungalwiji nakukungulwilamo vaishi vamiyachi yosena.
48 Omu lyazalile, valikokelele kutunda, kaha vatwamine nakusakula vaishi vamwenemwene+ nakuvahaka mumitonga, oloze vaze vamokomoko+ vavambilile.
49 Omu mukiko vene munachikapwa nahachikukulwishi chakatwamino kamyaka yino.* Vangelo navakaya nakuhandununa vaka-kuhuka kuli vaka-kwoloka,
50 kaha vaka-kuhuka navakavambila mulilungu lyakakahya. Mwamuze vene munavakapwanga nakulila nakulingenjunga kumazo.
51 “Kutala munamono munalumbunukila vyuma vyosenevi tahi?” Vambile kuli ikiye ngwavo: “Eyo.”
52 Jino ambile kuli vakiko ngwenyi: “Nge chili ngocho, kaha weshowo muka-kunangula vatu uze vanangula vyaWangana wamelu, nafwane nge mutu, mwenyazuvo uze eji kulovolanga vyuma vyavihya navyuma vyamwaka muzuvo yenyi yakulamina luheto.”
53 Omu Yesu akumishile kuhanjika evi vifwanyisa, afumine kuze nakuya.
54 Kahomu ahetele mungalila yakwimbo lyenyi,+ aputukile kuvanangula musunangonga yavo, ngocho vakiko valikomokelele nakwamba ngwavo: “Ou mutu nawane kulihi awa mangana neyi milimo yangolo?+
55 Uno ou keshi mwana wayauze muka-kusonga malivako nyi?+ Uno naye keshi Maliyako nyi? Uno vandumbwenyi vamalunga keshi vaYakova, naYosefwe, naShimona, naYutako nyi?+
56 Uno vandumbwenyi vamapwevo vosena kumana keshi ava tuli navoko nyi? Nyi evi vyuma vyosena naviwane kulihi?”+
57 Ngocho vaputukile kuhukana mwomwo yaikiye.+ Oloze Yesu ambile kuli vakiko ngwenyi: “Kapolofweto vamuvumbika kweka, keshi mungalila afuma chipwe muzuvo yenyiko.”+
58 Kaha kalingile milimo yangolo yayivulu kuzeko, mwomwo kavapwile nalufweleloko.
Kwinyikila Chamwishi
^ Tala Mukana waMazu.
^ Muyachi wamwila wakulifwana natiliku, oloze watwama nausungu.
^ Chipwe pamo, “kufuma kukwala chihela chakaye.”
^ Tala Mukana waMazu.
^ Tala Mukana waMazu.
^ Tala Mukana waMazu.
