Mateu 15:1-39
15 Jino vaFwaliseu navaka-kusoneka vejile kuli Yesu kufuma kuYelusalema,+ nakwamba ngwavo:
2 “Mwomwo ika tumbaji twove kaveshi kukavangiza visemwa vyavakakuluka jetuko? Chakutalilaho, kaveshi kusana kumavoko* hakulya vyakulyako.”+
3 Ikiye avakumbulwile ngwenyi: “Nayenu nawa ikaze mweji kuzombokelanga jishimbi jaKalunga mwomwo yavisemwa vyenu?+
4 Chakutalilaho, Kalunga ambile ngwenyi, ‘Vumbikenunga masenu namanenu,’+ kaha nawa ngwenyi, ‘Ou mwasaula ise chipwe naye vamujihe.’+
5 Oloze enu mweji kwambanga ngwenu, ‘Weshowo mwamba kuli ise chipwe kuli naye ngwenyi: “Cheshocho nguli nacho chize chatela kachi kukunganyalisa, chinapu wana wakuhana Kalunga,”+
6 katela kuvumbika ise numba chachindendeko.’ Ngocho munazeyesa mazu aKalunga mwomwo yavisemwa vyenu.+
7 Enu vaka-kulyonga, Isaya apolofwetele kanawa vyayenu hakwamba ngwenyi:+
8 ‘Vatu kana ava veji kunguvumbikanga kaha namivumbo yavo, oloze michima yavo yili kwakusuku nayami.
9 Kulemesa veji kungulemesanga cheji kuyanga mwamokomoko, mwomwo veji kunangulanga jishimbi javatu kupwa nge himazu aKalunga.’”+
10 Kufumaho, asanyikile lize liyongomena nakwamba kuli vakiko ngwenyi: “Ivwililenu nakumona munalumbunukila ano mazu:+
11 Chuma nachingila mukanwa kamutu keshi chikiko nachimujilululako, oloze chuma chize nachilovoka mukanwa kamutu chikiko nachimujilulula.”+
12 Jino tumbaji vejile nakwamba kuli ikiye ngwavo: “Uno unatachikiza ngwove vaFwaliseu vahukananga hamazu ove wahanjikanga nyi?”+
13 Ikiye avakumbulwile ngwenyi: “Weshowo mutondo vazenekele kutumba kuli Tata wamwilu navakautukula.
14 Vechenu. Vanapu vatwamina vatupuputa. Kachi nge kapuputa mwatwaminyina mukwavo kapuputa, kaha vosena vavali navaholokela muwina.”+
15 Petulu ambile kuli ikiye ngwenyi: “Tulumbunwine kanawa echi chifwanyisa.”
16 Hakwivwa ngocho, Yesu ambile ngwenyi: “Kumana nayenu nawa noholyapwa kanda chimilumbunukileko nyi?+
17 Uno kamwejiva ngwenu cheshocho cheji kwingilanga mukanwa cheji kuhitanga mujimo, kaha hinachiya muchimbushuko tahi?
18 Oloze vyuma vyeji kulovokanga mukanwa vyeji kufumanga mumuchima, kaha vyuma kana vikiko vyeji kujilululanga mutu.+
19 Chakutalilaho, mumuchima mukiko mweji kufumanga vishinganyeka vyavipi,+ nakujiha vatu, namakoji, namaujila,* nawiji, naunjiho wamakuli, nakusaula vyuma vyajila.
20 Evi vikiko vyuma vyeji kujilululanga mutu, oloze kulya chakuzeneka kusana kumavoko* kacheshi kujilulula mutuko.”
21 Omu Yesu afumine kuze, ayile jino kungalila yaTule naShitone.+
22 Jino pwevo umwe wakungalila yaFwenyisha ejile kufuma kungalila kana, kaha atambakanyinenga ngwenyi: “Nguteteleko ove Mwata, ove MwanaNdavichi. Mwanami wapwevo vanamukwate mwamupi kuvandemone.”+
23 Oloze ikiye kamukumbulwile numba lizu limweko. Shikaho, tumbaji twenyi vejile nakumulembelela ngwavo: “Mulweze ayenga, mwomwo chatambakana lika munyima yetu.”
24 Ikiye akumbulwile ngwenyi: “Ami kavangutumine kuya kuli vatu vekako, oloze shina kuli mikoko vakujimbala vakuzuvo yaIsalele kaha.”+
25 Oloze uze pwevo ejile nakulifukula kuli ikiye, ambile ngwenyi: “Ove Mwata, Ngukafweko!”
26 Ikiye akumbulwile ngwenyi: “Kachapwa chakwoloka kumbata kulya chavana nakuchimbila kuli vana vavatuwako.”
27 Uze pwevo ambile ngwenyi: “Mukiko vene ove Mwata, oloze navana vavatuwa vene veji kulyanga ungululu weji kuholokanga kumesa yavakaka javo.”+
28 Jino Yesu amukumbulwile ngwenyi: “Ove pwevo, lufwelelo lwove lwalunene. Chilingiwe vene ngocho kuli ove nganomu unasake.” Kaha uze mwanenyi wapwevo ahindukile kufuma haola vene yize.
29 Omu Yesu afumine kuze, ejile jino kwakamwihi naKalungalwiji waNgalileya.+ Akandukile hapili, kaha atwamine haze.
30 Jino mayongomena amanene apandamine kuli ikiye, vejile navitonji, navaka-kutenguka, natupuputa, natumama, naveka vakufwana ngana. Vavatumbikile kumahinji enyi, kaha avokile.+
31 Ngocho lize liyongomena lyalikomokelele hakumona tumama vali nakuhanjika, vaka-kutenguka vanalikangula, vitonji vali nakutambuka, tupuputa vali nakumona, kaha vamutohwesele Kalunga kaIsalele.+
32 Oloze Yesu asanyikile tumbaji twenyi nakwamba ngwenyi: “Liyongomena ngunalivwila keke,+ mwomwo vanatwame nayami makumbi atatu, kaha kavalile vyakulyako. Ngocho kangweshi nakusaka kuvasuula vayenga nazalako mwomwo vanahase kufwa chizava mujila.”+
33 Oloze tumbaji vambile kuli ikiye ngwavo: “Kulihize natuwana jimbolo jakutamo jakulisa liyongomena lipwaha ngana kuchihela kuno kwakuhona vatu?”+
34 Hakwivwa ngocho, Yesu avehwile ngwenyi: “Muli najimbolo jingahi?” Vakiko vamukumbulwile ngwavo: “Tuli najimbolo 7, natuvaishi tumwe twatundende.”
35 Omu alingile hanalweze lyehi lize liyongomena lisendavale hamavu,
36 ambachile jize jimbolo 7 navaze vaishi. Kahomu alingile nalombo lyehi, apuzwile jize jimbolo nakuputuka kujihana kuli tumbaji, kaha tumbaji vajipangililile nawa kumayongomena.+
37 Vosena valile, vekuchile, kaha vakungulwile vihanda vize vyasalileho, vazalishile mitonga yayinene 7 yato.+
38 Kaha vaze valile vapwile kafwe malunga 4,000, kuhakilako mapwevo navana vavandende.
39 Jino omu alingile hanasuula lyehi aze mayongomena, engilile muwato nakwiza kungalila yaMangatane.+
Kwinyikila Chamwishi
^ Kulumbununa, kaveshi kulitomesa kweseka najishimbiko.
^ MuchiHelase, por·neiʹa. Tala Mukana waMazu.
^ Kulumbununa, kulya chakuzeneka kulitomesa kweseka najishimbi.
