Mateu 16:1-28
16 Jino vaFwaliseu navaSatuse vapandamine kuli Yesu, kaha hakusaka ngwavo vamweseke, vamulombele avasolwele chinjikizo chakufuma mwilu.+
2 Ikiye avakumbulwile ngwenyi: “Omu kweji kutokanga, enu mweji kwambanga ngwenu, ‘Kwilu kunachi, mwomwo lilu linachilana,’
3 kaha nachimene mweji kwambanga ngwenu, ‘Lelo nakupwa chishika navula, mwomwo kwilu kuli nakufwinda mavwi numba tuhu lilu linachilana.’ Enu mwatachikiza kulumbununa omu lili nakusoloka lilu, oloze munakuhona kulumbununa chinjikizo chakwijivilaho lwola luno.
4 Chisemunwino chakuhuka chavaka-ukoji* cheji kusakanga lika kumona chinjikizo, oloze kaveshi kuchisolwela chinjikizo chekako,+ shina chinjikizo chaYona kaha.”+ Kufumaho, avasezele nakuya.
5 Jino tumbaji vazaukile nakuya musali, oloze vavulyamine kumbata jimbolo.+
6 Yesu ambile kuli vakiko ngwenyi: “Tonenunga, zangamenu nachimbalwila chavaFwaliseu navaSatuse.”+
7 Ngocho vaputukile kulihanjikisa mwavomwavo ngwavo: “Etu katwambachile jimbolo najimweko.”
8 Yesu hakutachikiza chuma kana, ambile ngwenyi, “Enu vaka-lufwelelo lwalundende, ikaze muli nakulihanjikishila mwenumwenu ngwenu kamweshi najimboloko?
9 Kumana noholyapwa kanda lika mutachikize tahi? Uno kamweshi nakwanuka jize jimbolo jitanu valile vatu 5,000, namitonga yayivulu yize mwakungulwile nyi?+
10 Uno kamweshi nakwanuka jize jimbolo 7 valyanga vatu 4,000 namitonga yayinene yize mwakungululangako nyi?+
11 Uno munahonena ika kwijiva ngwenu ami kangwapwanga nakumilweza vyamboloko? Oloze zangamenu nachimbalwila chavaFwaliseu navaSatuse.”+
12 Aha hakiko chavalumbunukilile jino ngwavo Yesu kapwile nakuhanjika ngwenyi vazangame nachimbalwila chamboloko, oloze vazangame nakunangula chavaFwaliseu navaSatuse.
13 Omu Yesu ahetele kungalila yaKesaliya Fwilipi, ehwile tumbaji twenyi ngwenyi: “Uno vatu vali nakwamba ngwavo Mwanamutu ikiye iya?”+
14 Vakiko vambile ngwavo: “Vamwe ngwavo Yowano Muka-kumbapachisa,+ veka ngwavo Elija,+ veka nawa ngwavo Yelemiya, chipwe umwe wavapolofweto.”
15 Ikiye ambile kuli vakiko ngwenyi: “Nyi enu ngwenu ami yami iya?”
16 Shimona Petulu akumbulwile ngwenyi: “Ove yove Kulishitu,+ MwanaKalunga ou ayoya.”+
17 Kaha Yesu ambile kuli ikiye ngwenyi: “Wawahilila ove Shimona mwanaYona, mwomwo kavakusolwelelecho kuli mutuko,* oloze vanakusolwelacho kuli Tata uze ali mwilu.+
18 Kaha nawa nangwamba kuli ove ngwami: Ove yove Petulu,+ kaha halilolwa+ lino nangukatungilaho chikungulwilo chami, kaha vikolo vyaFuka* kavyeshi kukachifungululako.
19 Nangukakuhana jisapi jaWangana wamelu, kaha cheshocho naukakasa hamavu nachikapwa chakukasa lyehi namwilu nawa, kaha cheshocho naukakasununa hamavu nachikapwa chakukasununa lyehi namwilu nawa.”
20 Jino ahuhumwine tumbaji twenyi ngwenyi kanda valweza mutu numba umweko ngwavo ikiye Kulishitu.+
21 Kufuma vene halwola luze, Yesu aputukile kulweza tumbaji twenyi ngwenyi atela kuya kuYelusalema nakukamuyanjisa mujijila jajivulu kuli vakulwane navapilishitu vavakulwane navaka-kusoneka, nakumujiha, kaha halikumbi lyamuchitatu navakamusangula.+
22 Petulu hakwivwa ngocho, amutwalile kupenge nakuputuka kumutenukila ngwenyi: “Litetele ove Mwata. Vyuma kana kavyeshi kukakusolokelako.”+
23 Oloze ikiye anyingulukile nakwamba kuli Petulu ngwenyi: “Ove Satana, hita kunyima yami! Unapu uchimbunji chakunguhukanyisa, mwomwo ove kawashinganyeka mwaya vishinganyeka vyaKalungako, oloze mwaya vishinganyeka vyavatu.”+
24 Yesu ambile jino kuli tumbaji twenyi ngwenyi: “Kachi nge mutu mwasaka kungukavangiza, alikane ivene nakumbata chitondo chenyi chakuyanjishila,* kaha angukavangizenga lika.+
25 Mwomwo weshowo mwasaka kulwila mwono wenyi mwakaujimbalisa, oloze weshowo mwajimbalisa mwono wenyi mwomwo yayami mwakauwana.+
26 Nganyo mukaze mwawanyinaho mutu kachi nge mwaheta kaye kosena, oloze mwatokesa mwono wenyi?+ Chipwe chuma mukaze mutu mwahana chakutambasana namwono wenyi?+
27 Mwomwo Mwanamutu mwakeza navangelo jenyi hamwe muupahu waIse, numba jino akashishishilemo mutu himutu kweseka navilinga vyenyi.+
28 Chamuchano vene nangwamba kuli enu ngwami, hali ava vanemana hano, hali vamwe kaveshi kukafwako kuvanga chatete vanamono Mwanamutu ali nakwiza muWangana wenyi.”+
Kwinyikila Chamwishi
^ Chipwe “chavatu vakuzeneka kushishika.”
^ Hela., “kunyama namanyingako.”
^ Chipwe “vyaHetese,” kulumbununa fuka yavatu vosena. Tala Mukana waMazu.
^ Tala Mukana waMazu.
