Mateu 17:1-27
17 Omu mwahichile makumbi 6, Yesu ambachile Petulu, naYakova nandumbwenyi Yowano nakuya navo helu lyapili yayisuku kwauka wavo.+
2 Kaha alyalumwine mweka kumeso avo. Kumeso enyi kwamunyikile nge likumbi, kaha uvwalo wenyi wahelu wapwile zwalala nge mumunyi.+
3 Jino vamwene Mose naElija vali nakushimutwila nenyi.
4 Kaha Petulu ambile kuli Yesu ngwenyi: “Ove Mwata, nachiwaha etu kutwama vene kuno. Kachi nge unasake, kaha nangutunga jimbalaka jitatu kuno, yimwe yayove, yimwe yaMose, yimwe yaElija.”
5 Shimbu apwile nakuhanjika, livwi litoma lyavafwikile, kaha muze mulivwi mwafumine lizu ngwalyo: “Ou ikiye Mwanami, ou ngwazanga, ou ngwevwila kuwaha.+ Mwivwililenunga.”+
6 Tumbaji hakwivwa ngocho, vevwile woma chikuma, kaha vafukamine chameso hamavu.
7 Jino Yesu apandamine kuli vakiko, kaha avakwachile nakwamba ngwenyi: “Katukenu. Kanda namwivwa womako.”
8 Omu vandwile meso avo, kavamwene mutu numba umweko, shina Yesu kaha.
9 Kahomu vapwile nakushikumuka hapili, Yesu avakanjile ngwenyi: “Echi chakumwenesa munamono kanda namuchilweza mutu numba umweko palanga nomu navakasangula Mwanamutu kuvafu.”+
10 Oloze tumbaji vamwihwile ngwavo: “Mwomwo ika vaka-kusoneka veji kwambilanga ngwavo kuvanga chatete Elija neza?”+
11 Yesu akumbulwile ngwenyi: “Chikupu vene Elija ali nakwiza, kaha mwakakindulwisa cheka vyuma vyosena muze vyapwile.+
12 Oloze nangwamba kuli enu ngwami, Elija eza lyehi, oloze kavamutachikijileko, kaha vamulingile mweshomwo vasakile kumulinga.+ Omu mukiko nawa munavakayanjisa naMwanamutu.”+
13 Kaha tumbaji vamwene jino ngwavo apwile nakuvalweza vyaYowano Muka-kumbapachisa.
14 Omu vejile kuliyongomena,+ mutu umwe apandamine kuli ikiye, afukamine nakwamba ngwenyi:
15 “Ove Mwata, muteteleko mwanami walunga, mwomwo apwa muka-chikonya kaha naviji chikuma. Kakavulu eji kulimbukilanga mukakahya namumeya.+
16 Ngwamunehanga kuli tumbaji twove, oloze kavahashile kumukako.”
17 Yesu akumbulwile ngwenyi: “Enu vaka-chisemunwino chakuhona lufwelelo, chakuhingama,+ nangutwamanga nayenu palanga nakumwaka uka? Nangumyechelela lika palanga nakumwaka uka? Munehe kuno kuli ami.”
18 Jino Yesu atenukilile uze ndemone, kaha amufumine. Ngocho uze kanyike walunga vamukile kufuma haola vene yize.+
19 Jino tumbaji vejile kuli Yesu kupenge nakwamba ngwavo: “Mwomwo ika twahonenanga kulovola uze ndemone?”
20 Ikiye ambile kuli vakiko ngwenyi: “Mwomwo lufwelelo lwenu lwalundende. Chamuchano vene nangwamba kuli enu ngwami, kachi nge muli nalufwelelo lwakweseka hamwe nalinona lyamusetale, munahase kwamba kupili yino ngwenu, ‘Tutuka hano nakuya haze,’ kaha nayitutuka. Nachimwe chauchi nachimikaluhwila kulinga.”+
21 *——
22 Omu Yesu natumbaji twenyi valikungulwilile hamwe muNgalileya, ambile kuli vakiko ngwenyi: “Mwanamutu navakamuhana mumavoko avatu,+
23 kaha navakamujiha. Kuheta halikumbi lyamuchitatu navakamusangula.”+ Ngocho vanyengetelele chikuma.
24 Omu vahetele kuKapelenau, vatu vaze vatambwilenga mutelo wajindalakima* jivali vapandamine kuli Petulu nakwamba ngwavo: “Uno muka-kuminangula keshi kuhana mutelo wajindalakima jivaliko nyi?”+
25 Ikiye ambile ngwenyi: “Eji kuhananga.” Oloze omu engilile muzuvo, Yesu alivangile kuhanjika nenyi ngwenyi: “Ove Shimona, unashinganyeka muka? Uno vamyangana vahamavu veji kutambulanga mitelo yakulisezaseza kuli veya? Uno kuli vana vavo tahi, nyi kuli vatu veka?”
26 Omu Petulu ambile ngwenyi: “Kuli vatu veka,” Yesu ambile kuli ikiye ngwenyi: “Kahanyi vana chikupu vene kaveshi kutela miteloko.
27 Oloze hakusaka tuhone kuvahukanyisa,+ yako ukambile ulovo mukalungalwiji, kaha ukambate ishi wakulivanga kufwa kuulovo. Kahomu naukazununa mukanwa kenyi naukawanamo lumbongo lwachichele lwapalata.* Kalumbate, kavahanelwo kupwa mutelo wayami nayove.”
Kwinyikila Chamwishi
^ Tala Chihande A3.
^ Tala Chihande B14.
^ Hela., “lwaShitata,” luze lwalifwanyine natetalandalakima. Tala Chihande B14.
