Mateu 2:1-23
2 Jino omu alingile Yesu nasemuka lyehi kuMbetelema+ yakuYuleya hamakumbi amwangana Helote,*+ kuYelusalema kwejile vaka-kuzachisa vatanganyika* kufuma kuMututuko.
2 Vambile ngwavo: “Mwangana wavaYuleya+ ou nasemuka ali kulihi? Twamonanga tanganyika yenyi omu twapwanga kuMututuko, shikaho tuneza mangana tulifukule kuli ikiye.”
3 Hakwivwa ngocho, Mwangana Helote alizakaminyine chikuma hohamwe navaka-Yelusalema vosena.
4 Kahomu akungulwile vapilishitu vavakulwane vosena navaka-kusoneka javatu, avehwile ejive okwo vambile ngwavo mwakasemukila Kulishitu.*
5 Kaha vambile kuli ikiye ngwavo: “KuMbetelema+ yakuYuleya, mwomwo omu mukiko vasoneka kuhichila muli kapolofweto ngwavo:
6 ‘Ove Mbetelema wakulifuchi lyaYuta, kaweshi unganda yayindende chikumako havanguvulu vamuYuta, mwomwo muli ove namukalovoka nguvulu uze mwakafunganga vatu jami vaIsalele.’”+
7 Jino Helote asanyikile mukusweka vaka-kuzachisa vatanganyika, nakuvehula kanawa lwola asolokele uze tanganyika.
8 Kaha hakuvatuma kuMbetelema, ambile kuli vakiko ngwenyi: “Yenu mukamutondetonde kanawa ou mwana, kahomu namukamuwana, mukeze mukangulweze mangana nayami nawa ngukaye nakulifukula kuli ikiye.”
9 Omu vakumishile kwivwilila kumazu amwangana, vakatukile nakuya, kaha uze tanganyika vamwene omu vapwile kuMututuko+ atetekelele kulutwe lwavo palanga nomu emanyine haze apwile uze mwana.
10 Hakumumona uze tanganyika, vawahililile chikuma.
11 Kahomu vengilile muzuvo vamwene uze mwana ali nanaye Maliya, kaha vafukamine nakulifukula kuli ikiye. Kaha vafukunwine muze mwapwile vikumba vyavo nakumuhana mawana aulu, nalavona, namila.
12 Jino hakuwana nge Kalunga avahuhumwine muchilota+ ngwenyi kanda vakinduluka cheka kuli Heloteko, ngocho vazachishile jila yeka hakuhiluka kungalila yavo.
13 Omu valingile vanafumuko lyehi, kangelo kaYehova* alisolwele kuli Yosefwe muchilota,+ kaha ambile ngwenyi: “Katuka, mbata ou mwana nanaye uchinyine kuEjipitu, kaha katwame kuze palanga nomu nangukakulweza ngwami kinduluka, mwomwo Helote kalinwomu atondetonde ou mwana nakumujiha.”
14 Ngocho Yosefwe akatukile naufuku, ambachile uze mwana nanaye, kaha ayile kuEjipitu.
15 Atwaminenga kuze palanga nomu afwile Helote. Echi chateselemo mazu aze ahanjikile Yehova* kuhichila muli kapolofweto ngwenyi: “Ngwamusanyikile ou mwanami afume muEjipitu.”+
16 Jino omu Helote amwene ngwenyi vaze vaka-kuzachisa vatanganyika vanamumbembejeka, evwile matoto chikuma, kaha atumine vatu vajihe vana vamalunga vosena vaze vapwile muMbetelema namujingalila josena jize jahachileko, kuputukila kuvana vamyaka yivali nakuneha mwishi, kweseka nalwola lwahichilemo kufuma haze vamulwezele vyakusoloka chatanganyika kuli vaka-kuzachisa vatanganyika.+
17 Echi chateselemo jino mazu vahanjikile kuhichila muli kapolofweto Yelemiya ngwavo:
18 “KuLama kwevwakanyine lizu, kwevwakanyine kulila, najimbimbi chikuma. Lakele+ ikiye apwile nakulila vana venyi, kaha kasakile kumuvendejekako, mwomwo vana venyi vauchi jino.”+
19 Omu alingile Helote nafu lyehi, kangelo kaYehova* asolokele kuli Yosefwe muchilota muEjipitu.+
20 Ambile kuli ikiye ngwenyi: “Katuka, mbata ou mwana nanaye uyenga kulifuchi lyaIsalele, mwomwo vaze vapwile nakutondatonda mwono wayou mwana vanafu lyehi.”
21 Ngocho akatukile, ambachile uze mwana nanaye nakwingila mulifuchi lyaIsalele.
22 Oloze hakwivwa ngwavo Alekelau naswane ise Helote nakupwa mwangana waYuleya, evwile woma wakuya kuze. Kaha hakuwana nge naKalunga amuhuhumwine muchilota,+ ngocho ayile jino kungalila yaNgalileya.+
23 Jino hakuheta kuze, atwamine munganda vavuluka ngwavo Nazaleta,+ mangana mazu aze vahanjikile kuhichila muli vapolofweto atesemo, ngwavo: “Navakamuvuluka ngwavo muka-Nazaleta.”*+
Kwinyikila Chamwishi
^ Tala Mukana waMazu.
^ Chipwe “vaka-kulinga visava.”
^ Chipwe “Meshiya; Ou Vawavisa.”
^ Tala Chihande A5.
^ Tala Chihande A5.
^ Tala Chihande A5.
^ Kafwe lyafuma kulizu lyachiHepeleu ngwavo, “kusoka.”
