Mateu 24:1-51
24 Omu Yesu apwile nakufuma mutembele, tumbaji twenyi vapandamine kuli ikiye nakumulwekesa jizuvo jatembele.
2 Ikiye ambile kuli vakiko ngwenyi: “Vyuma vyosenevi munavimono nyi? Chamuchano vene nangwamba kuli enu ngwami, hano kaheshi lilolwa limwe nalikasala helu lyalikwavo chakuzeneka kuliholwela hamavuko.”+
3 Jino omu atwamine haPili yaMilive, tumbaji twenyi vapandamine kuli ikiye kwauka wavo nakwamba ngwavo: “Tulweze, uno vyumevi navikasoloka mwaka uka, kaha nawa chinjikizo muka chakukatachikijilaho kupwako chove*+ nachikukulwishi chakatwamino kamyaka yino?”*+
4 Yesu avakumbulwile ngwenyi: “Zangamenu, kanda namuketavila mutu umwe akamihungumwiseko,+
5 mwomwo vavavulu navakeza mulijina lyami nakwamba ngwavo, ‘Yami Kulishitu,’ kaha navakahungumwisa vavavulu.+
6 Namukevwa jijita namijimbu yajijita. Oloze enu kanda namukalizuzukila nawomako, mwomwo vyumevi vyatela kusoloka, oloze kukuma chichili kanda.+
7 “Mwomwo lifuchi limwe nalikafumbukila lifuchi likwavo, kaha wangana umwe naukafumbukila wangana ukwavo,+ kaha kuvihela vyeka navyeka nakukapwa zala,+ namindenda.+
8 Vyosena evi navikapwa kuputuka chaluyando.*
9 “Vatu navakamimwenesanga vihuli+ nakumijihajiha,+ kaha navakamihunga kuli vaka-mafuchi osena mwomwo yalijina lyami.+
10 Kaha nawa vavavulu navakahukana nakukalisolola mwavomwavo kuli vaka-kole nakukalihunga mwavomwavo.
11 Vapolofweto vamakuli vavavulu navakeza, kaha navakahungumwisa vatu vavavulu.+
12 Zangi yavatu vavavulu nayikahola mwomwo yakuvula chaupapwoki.
13 Oloze ou mwakakachila palanga nakusongo navakamulwila.+
14 Kahou mujimbu wamwaza waWangana navakawambulula hamavu hosena, nakupwa unjiho kuli vaka-mafuchi osena,+ numbanyi kukuma chikeze.
15 “Shikaho omu namukamona chuma chakwivwisa unyengwe chakuneha kunongesa chinemana muchihela chajila,+ nge muze achihanjikile kapolofweto Ndanyele, (ou mwatanga anangakane),
16 kaha vaze vali muYuleya vakaputuke kuchinyina kujipili.+
17 Mutu uze ali helu lyazuvo kanda akasulukaho nakumbata vyuma vili muzuvo yenyiko,
18 kaha mutu uze ali kuwande kanda akakinduluka nakumbata uvwalo wenyi waheluko.
19 Lamba kuli mapwevo vaze navakemita majimo nakuli vaze navakapwa navakemba hamakumbi aze!
20 Lombenunga lika mangana lwola namukachina lukazeneke kupwa hangonde yachishika, chipwe halikumbi lyaSambata,
21 mwomwo halwola luze nakukapwa luyando lwalunene,+ luze kanda lusolokengaho lyehi kufuma kukuputuka chakaye palanga nakulelo lino, kaha chipwe kulutwe nawa kalweshi kukasoloka chekako.+
22 Chikupu vene kuvanga makumbi aze vakawakehese, mokomoko kakweshi ukwechi mujimba navakalwilako. Oloze mwomwo yavaze vasakula, aze makumbi navakawakehesa.+
23 “Jino kachi nge mutu mwakamba kuli enu ngwenyi, ‘Talenu! Kulishitu ali kuno,’+ chipwe ngwenyi, ‘Ali kuze!’ enu kanda namuketavilako.+
24 Mwomwo vaKulishitu vamakuli navapolofweto vamakuli+ navakeza, kaha navakalinga vinjikizo vyavinene navyuma vyakukomwesa mangana nge chinahase, vakahungumwise+ navaze vene vasakula.
25 Ivwenu! Ami ngunamihuhumwina chimweza.
26 Shikaho kachi nge vatu navamba kuli enu ngwavo, ‘Talenu! Ali mupambo,’ enu kanda kukayamoko, ‘Talenu! Ali mukapete kamukachi,’ enu kanda kuketavilako.+
27 Mwomwo nge omu muveso weji kuvesanga kufuma kumututuko nakumunyika zwalala mbwe nakumulauko, ngocho nakupwako* chaMwanamutu mukiko vene munachikapwa.+
28 Kweshokwo kuli mujimba wakufwa, kukiko veji kukungulukilanga vangonga.+
29 “Omu nawakalinga makumbi aze aluyando anakumu, likumbi nalikelava wi,+ kaha kakweji keshi kukalovola myeji yenyiko, vatanganyika navakahosomoka mwilu, kaha ngolo jamelu najikalinyika.+
30 Chinjikizo chaMwanamutu nachikasoloka jino mwilu, kaha vatu vakumiyachi yahamavu yosena navakalyonyinga,+ kaha navakamona Mwanamutu+ ali nakwiza hamavwi amwilu nangolo naupahu waunene.+
31 Jino mwakatuma vangelo jenyi naluneta lwakutezuka chikuma, kaha navakakungulwila hamwe vatu jenyi asakula kufuma kumitamba yiwana,* kufuma kusongosongo yamelu mbwe nakusongosongo yikwavo.+
32 “Jino linangulenu chishina chino kuchifwanyisa chamukuyu: Omu weji kusokanga mitango yayihya nakusokolokela mafwo, mweji kutachikizanga ngwenu ngonde yanonga yili kwakamwihi.+
33 Nayenu nawa omu namukamona vyuma vyosena evi, katachikizenu ngwenu ali kwakamwihi, kuvikolo.+
34 Chamuchano vene nangwamba kuli enu ngwami, chisemunwino chino kacheshi kuhitako kuvanga vyuma vyosena evi vinasoloka.
35 Melu namavu navikahita, oloze mazu ami kaweshi kukahitako.+
36 “Kutalisa kulikumbi lize naola yize kakweshi mutu umwe natachikizako,+ chipwe vangelo vamwilu, chipwe Mwana, shina Tata+ kaha.
37 Mwomwo ngana muze chapwile hamakumbi aNowa,+ ngocho nakupwako* chaMwanamutu mukiko vene munachikapwa.+
38 Mwomwo ngana muze vatu vapwile mumakumbi aze shimbu kanda Livaji, valilenga, vanwinenga, malunga vambachilenga mapwevo, mapwevo vavasombweselenga, palanga nakulikumbi lize engilile Nowa muwato,+
39 kaha kavahakileko manganako palanga nomu lyejile Livaji nakuvakomba vosena,+ ngocho nakupwako chaMwanamutu nawa mukiko vene munachikapwa.
40 Jino muwande namukapwa malunga vavali. Umwe navakamumbata, mukwavo navakamuseza.
41 Kaha kulilolwa lyakuchekesa unga nakukapwa mapwevo vavali nakucheka unga. Umwe navakamumbata, mukwavo navakamuseza.+
42 Shikaho tonenunga, mwomwo kamwatachikijile likumbi mweza Mwata wenuko.+
43 “Oloze tachikizenu chumechi: Kachi nge mwenyazuvo mwejiva hachilo ocho mweza mwiji,*+ kachi mwatona nakuzeneka kwechelela zuvo yenyi vayipupe.+
44 Shikaho nayenu nawa pwenunga vakulizanga,+ mwomwo Mwanamutu mweza haola yize kamwashinganyekele ngwenu yikiko mwezako.
45 “Iyaze chikupu napu ndungo wakushishika wakuzangama,* uze vatongwele kuli kaka yenyi kumulamina vaka-kuzata kuzuvo yenyi, avahanenga kulya chavo halwola lwakutamo?+
46 Awahilila ndungo uze nge kaka yenyi hakwiza mwamuwana ali nakulinga ngocho.+
47 Chamuchano vene nangwamba kuli enu ngwami, mwamutongola amulaminenga vyuma vyenyi vyosena.
48 “Oloze kachi nge uze ndungo wamupi mwalyamba mumuchima wenyi ngwenyi, ‘Kaka yami nashimbula,’+
49 kaha himwaputuka kuveta vakwavo vandungo, nakulya nakunwa navaka-kupenda,
50 jino kaka yayauze ndungo omu mwakeza halikumbi lize kamufwelelele ngwenyi mwezako, nahaola yize katachikijileko,+
51 mwakamuzangamisa chikuma nakumutongwela kumuhaka kuchihela chimwe navaka-kulyonga. Kwakuze vene kumwakapwanga nakulila nakulingenjunga kumazo.+
Kwinyikila Chamwishi
^ Tala Mukana waMazu.
^ Tala Mukana waMazu.
^ Chipwe “kuputuka chamisongo yakusema.”
^ Tala Mukana waMazu.
^ Hela., “kujipeho jiwana.”
^ Tala Mukana waMazu.
^ Chipwe “halwola mweza mwiji naufuku.”
^ Chipwe “wamangana.”
