Mateu 26:1-75
-
Vapilishitu navajina kujiha Yesu (1-5)
-
Yesu navamuhingunwina maji alivumba lyamwaza (6-13)
-
Paseka yamakumishilo, Yesu navamusolola (14-25)
-
Kulinga Kulya chaMwata chaChingoloshi (26-30)
-
Navavuluka chimweza ngwavo Petulu mwakakana Yesu (31-35)
-
Yesu mwalomba muNgetesemane (36-46)
-
Yesu navamukwata (47-56)
-
Navamusopesa kuli vaka-Sunendeline (57-68)
-
Petulu mwakana Yesu (69-75)
26 Jino omu Yesu akumishile kuhanjika vyuma vyosena evi, ambile kuli tumbaji twenyi ngwenyi:
2 “Munatachikiza ngwenu kunasale makumbi avali kuchilika chaPaseka,+ kaha Mwanamutu navamuhana kuvatu mangana vamusukike hachitondo.”+
3 Jino vakulwane javatu navapilishitu vavakulwane valikungulwile hamwe muchipango chakapilishitu wakulitulaho uze vavuluka ngwavo, Kayafwase,+
4 kaha vatwamine Yesu punga+ vamukwate kuzachisa makuli* mangana vamujihe.
5 Oloze vambilenga ngwavo, “Hachiwanyinonyi chiku, kuchina vatu navakatula liuya.”
6 Shimbu Yesu apwile kuMbetane muzuvo yaShimona muka-mbumba,+
7 pwevo umwe uze apwile nasaji yaalambashite* yamaji alivumba lyamwaza andando yayinene chikuma, apandamine kuli Yesu nakuputuka kuwahingunwina hamutwe wenyi omu apwile nakulya.*
8 Tumbaji hakumona chuma kana, vevwile kupihya nakwamba ngwavo: “Ika yakuwenyekela ngana?
9 Mwomwo kachi vanawalanjisa jimbongo jajivulu nakujihana vaka-kuhutwa.”
10 Yesu hakwijiva vyuma vapwile nakuhanjika, ambile kuli vakiko ngwenyi: “Ika muli nakusaka kwivwishila ou pwevo kupihya? Nangulingila chuma chamwenemwene.
11 Mwomwo enu namupwanga navaka-kuhutwa shimbu yosena,+ oloze kamweshi kupwanga nayami shimbu yosenako.+
12 Mwomwo ou pwevo hakuhingunwina maji awa alivumba lyamwaza hamujimba wami, nawahishila chimweza vyakungufunda.+
13 Chamuchano vene nangwamba kuli enu ngwami, kweshokwo navakambulwila ou mujimbu wamwaza mukaye kosena, chuma nalingi ou pwevo nachikiko navakachivulukanga mangana vakamwanukilengaho.”+
14 Umwe hali vaze 12 uze vavuluka ngwavo, Yuta Isakalyote,+ ayile kuli vapilishitu vavakulwane+
15 nakwamba ngwenyi: “Namunguhana ika mangana ngumusolole kuli enu?”+ Vakiko vamufwelelesele kumuhana jimbongo japalata 30.+
16 Shikaho kufuma vene haze atondelenga lika kuwana lwola lwamwaza lwakumusolola kuli vakiko.
17 Halikumbi lyatete lyaChiwanyino chaJimbolo Jakuzeneka Chimbalwila,+ tumbaji vejile kuli Yesu nakwamba ngwavo: “Kulihi unasake ngwove tukuwahishile mangana ulileko Paseka?”+
18 Ambile ngwenyi: “Yenu munganda kuli Nganji-kananga, kaha kambenu kuli ikiye ngwenu, ‘Muka-kunangula nambe ngwenyi: “Lwola lwami vatongola luli hakamwihi. Nangulingila Paseka natumbaji twami kuzuvo yove.”’”
19 Kaha tumbaji valingile nge muze avalwezele Yesu. Vawahishile vyaPaseka.
20 Omu kwatokele,+ asendavalile kumesa natumbaji twenyi 12.+
21 Omu vapwile nakulya, ambile ngwenyi: “Chamuchano vene nangwamba kuli enu ngwami, umwe hali enu mwangusolola kuli vaka-kole.”+
22 Vakiko vanyengetelele chikuma hakwivwa ngocho, kaha mutu himutu aputukile kumwihula ngwenyi: “Ove Mwata, yami tahi?”
23 Ikiye akumbulwile ngwenyi: “Ou vene ali nakutata halilonga limwe nayami, ikiye mwangusolola.+
24 Mwanamutu mwaya vene nge muze vasoneka hali ikiye, oloze lamba+ kuli mutu uze mwasolola Mwanamutu kuli vaka-kole.+ Mutu kana kachi chawahile kuli ikiye kuhona kusemuka.”+
25 Kaha Yuta uze apwile kwakamwihi nakumusolola kuli vaka-kole, ambile ngwenyi: “Ove Lapi, yami tahi?” Yesu ambile kuli ikiye ngwenyi, “Ove ivene unambemo lyehi.”
26 Omu vatwalileho lika nakulya, Yesu anonele mbolo, kahomu akumishile kulomba, ayipuzwile,+ ayihanyine kuli tumbaji, kaha ambile ngwenyi, “Tambulenu, lyenu. Eyi yinemanyinako mujimba wami.”+
27 Kaha nawa, anonele lupasa, alombele, kaha aluhanyine kuli vakiko nakwamba ngwenyi: “Nwenumo muvosena,+
28 mwomwo elu lunemanyinako ‘manyinga+ ami alushiko,’+ aze nawamwangala mangana vakonekele jishili+ javatu vavavulu.+
29 Oloze nangumilweza ngwami: Kufuma vene oholili, kangweshi kunwa cheka vinyo kaneviko palanga nakulikumbi lize nangukanwa vinyo vyavihya nayenu hamwe muWangana waTata.”+
30 Omu vakumishile kwimba myaso yakwalisa* Kalunga, valovokele nakuya kuPili yaMilive.+
31 Jino Yesu ambile kuli vakiko ngwenyi: “Enu muvosena namuhukana naufuku uno mwomwo yayami, mwomwo vasoneka ngwavo: ‘Nanguveta kafunga, kaha utanga wamikoko naulimwanga.’+
32 Oloze omu nangukalinga hivanangusangula lyehi, nangukatetekela kuya kuNgalileya.”+
33 Oloze Petulu amukumbulwile ngwenyi: “Numba nge vakwetu vosena navahukana mwomwo yayove, oloze ami kangweshi kuhukanako.”+
34 Yesu ambile kuli ikiye ngwenyi: “Chamuchano vene nangwamba kuli ove ngwami, ufuku vene uno, shimbu kanda ndemba atambike, naungukana mapapa katatu.”+
35 Petulu ambile kuli ikiye ngwenyi: “Numba nge kufwa, nangufwila hamwe nayove, ami kangweshi kukukanako.”+ Natumbaji vakwavo vosena nawa vahanjikile mwomumwe.
36 Jino Yesu ejile navo kuchihela vavuluka ngwavo Ngetesemane,+ kaha ambile kuli tumbaji ngwenyi: “Twamenu hano, shimbu nanguya kuze nakulomba.”+
37 Ambachile Petulu navana vaZevete vavali nakuya navo, kaha aputukile kunyengetela nakulyonyinga chikuma mumuchima wenyi.+
38 Jino ambile kuli vakiko ngwenyi: “Nguli* nakulyonyinga chikuma kwijiva kufwa kaha. Salenu hano, tonenunga nayami hamwe.”+
39 Kahomu ayile chindende kulutwe, afukamine chameso hamavu nakulomba ngwenyi:+ “Ove Tata, kachi nge chinahase, echa lupasa+ kanelu lunguhite. Oloze keshi omu munayi muchima wayamiko, shina omu munayi muchima wayove.”+
40 Omu akindulukile kuli tumbaji twenyi nakuwana vali mutulo, ambile kuli Petulu ngwenyi: “Uno munahono kutona ola yimwe nayami hamweko nyi?+
41 Tonenunga,+ lombenunga lika+ kuchina namwingila mucheseko.+ Shipilitu yinasake vene, oloze mujimba unazeye.”+
42 Ayile cheka kamuchivali, kaha alombele ngwenyi: “Ove Tata, kachi nge elu lupasa kalweshi kuhasa kuhitako, oloze kuvanga ngulunwe, kaha mwaya muchima wove mulingiwe.”+
43 Omu ejile cheka awanyine vali mutulo mwomwo meso avo alemene natulo.
44 Ngocho avasezele, ayile cheka nakulomba kamuchitatu nakuhanjika cheka hachuma chochimwe.
45 Jino akindulukile kuli tumbaji nakwamba kuli vakiko ngwenyi: “Shimbu yakufwana ngana yino enu munasavala nakunoka! Talenu! Ola yinapandama kwakamwihi mangana Mwanamutu vamuhane mumavoko avaka-shili.
46 Katukenu, tuyenu. Talenu! Muka-kungusolola napandama kwakamwihi.”
47 Shimbu apwile nakuhanjika, Yuta, umwe wavaze 12 ejile naliyongomena lyalinene lize lyafumine kuli vapilishitu vavakulwane navakulwane javatu.+ Vambachile jipoko jamikwale najimbwechi.
48 Jino muka-kumusolola avalwezele chimweza chinjikizo ngwenyi: “Weshowo nangusweswenya, ikiye vene. Mukasenu.”
49 Kaha ayile swi nakuli Yesu nakwamba ngwenyi: “Mwoyo wove, ove Lapi!” Kaha amusweswenyele.
50 Oloze Yesu ambile kuli ikiye ngwenyi: “E lunga, unakave ika kuno?”+ Kaha vapandamine kuli Yesu, vamukwachile nakumukasa.
51 Oloze umwe hali vaze vapwile naYesu asolomwene poko yenyi yamukwale nakusepula litwitwi lyandungo yakapilishitu wakulitulaho.+
52 Kaha Yesu ambile kuli ikiye ngwenyi: “Kindulwisa poko yove yamukwale muchindalo chayo,+ mwomwo vosena vaze navakwata poko yamukwale navakanonga kupoko yamukwale.+
53 Unashinganyeka ngwove kangweshi kuhasa kulembelela Tata angutumine mayongomena akuhambakana 12 avangelo oholyapwako tahi?+
54 Nge nachipwa ngocho, nyi Visoneka vyakwamba ngwavyo vyuma vyatela kulingiwa vene ngana navitesamo ngachilihi?”
55 Jino Yesu ambile kuliyongomena ngwenyi: “Munejila ika najipoko jamikwale najimbwechi kwijiva nge muneza nakukwata chihwanga? Ngunatwamenga mutembele hakumbi hakumbi nakunangula,+ oloze kamwangukashileko.+
56 Oloze vyosena evi vinasoloka mangana vyuma vasoneka vapolofweto* vitesemo.”+ Kaha tumbaji vosena vamusezele, vachinyine.+
57 Jino vaze vakashile Yesu vamutwalile kuli kapilishitu wakulitulaho Kayafwase,+ kuze valikungulwilile vaka-kusoneka navakulwane.+
58 Oloze Petulu apwile nakumukavangijila hakasuku swi nakuchipango chakapilishitu wakulitulaho. Kahomu engilile mukachi, atwamine hamwe navaka-kuzata kuzuvo mangana amone vyuma navisoloka.+
59 Jino vapilishitu vavakulwane navaka-Sunendeline vosena vapwile nakutondatonda unjiho wamakuli wakuvangijikila Yesu mangana vamujihe.+
60 Oloze kavauwanyineko, numba tuhu kwejile vinjiho vamakuli vavavulu.+ Kutwala muze, kwejile vinjiho vavali.
61 Vambile ngwavo: “Ou mutu ambile ngwenyi, ‘Ngunahase kushiula tembele yaKalunga nakuyitunga cheka mumakumbi atatu.’”+
62 Hakwivwa ngocho, kapilishitu wakulitulaho emanyine nakwamba kuli ikiye ngwenyi: “Uno kaweshi kuvakumbululako nyi? Kawevwile ou unjiho vali nakukuvangijikila ava malungako tahi?”+
63 Oloze Yesu aholele kulu.+ Ngocho kapilishitu wakulitulaho ambile kuli ikiye ngwenyi: “Ngunakushingisa Kalunga ou ayoya ngwami, tulweze numba nge ove yove Kulishitu MwanaKalunga!”+
64 Yesu ambile kuli ikiye ngwenyi: “Ove ivene unambemo lyehi. Oloze nangwamba kuli enu ngwami: Kufuma vene oholili namukamona Mwanamutu+ natwame kulivoko lyachilyo lyangolo,+ ali nakwiza hamavwi amwilu.”+
65 Jino kapilishitu wakulitulaho apihililile nakupula uvwalo wenyi wahelu nakwamba ngwenyi: “Nasaula Kalunga! Ikaze natusakila cheka vinjiho veka? Ivwenu! Ngwetu munevu jino omu nasaula Kalunga.
66 Munashinganyeka muka?” Vakiko vakumbulwile ngwavo: “Atela kufwa.”+
67 Kaha vamufwijilile maleji kumeso+ nakumulukula jikonyi.+ Veka vamuvetele jimbanda kumeso+
68 nakwamba ngwavo: “Polofweta twivwenga, ove Kulishitu. Ou nakuvete iya?”
69 Jino Petulu atwamine muweluka muchipango, kaha ngamba wapwevo umwe ejile kuli ikiye nakwamba ngwenyi: “Nayove nawa wapwanga naYesu muka-Ngalileya!”+
70 Oloze ikiye alihamikile kumeso avo vosena ngwenyi: “Ovyo uli nakuhanjika ami kangwavitachikijileko.”
71 Omu alovokele nakuya kukapete kakuwingililo, pwevo weka amwijivile. Kaha alwezele vaze vapwile kuze ngwenyi: “Ou mutu apwanga naYesu wakuNazaleta.”+
72 Alihamikile cheka nakulishinga ngwenyi: “Mutu kana ami kangwamutachikizako!”
73 Omu hahichile katando kakandende, vaze vemanyine kuze vejile kuli Petulu, vambile kuli ikiye ngwavo: “Pundu vene nayove nawa unapunga hamwe navo, mwomwo hanjikiso yove yikiko yinakusolola.”
74 Jino aputukile kulyangula nakulishinga ngwenyi: “Mutu kana ami kangwamutachikizako!” Hahaze vene ndemba atambikile.
75 Kaha Petulu anukile mazu ahanjikile Yesu ngwenyi: “Shimbu kanda ndemba atambike, naungukana mapapa katatu.”+ Kaha alovokele kuweluka, alilile chikuma.
Kwinyikila Chamwishi
^ Chipwe “kuzachisa tufuta.”
^ Alambashite yapwile saji yalilolwa.
^ Chipwe “omu asendavalile kumesa.”
^ Chipwe “kwimba jisamu jakwalisa.”
^ Chipwe “Mwono wami uli.”
^ Chipwe “mangana visoneka vyavapolofweto.”
