Mateu 27:1-66
27 Jino lichako nachimene, vapilishitu vavakulwane vosena navakulwane javatu vatwamine Yesu punga mangana vamujihe.+
2 Omu valingile vanamukase lyehi, vamumbachile nakumutwala kuli nguvulu Pilatu.+
3 Jino Yuta uze amusolwele, hakumona Yesu vanamutongwela kufwa, evwile vangu kumuchima, kaha akindulwishile jimbongo japalata 30 kuli vakulwane navapilishitu vavakulwane.+
4 Ambile ngwenyi: “Ngwalinganga shili hakusolola mutu wakuzeneka mulonga* kuli vaka-kole.” Vakiko vambile ngwavo: “Owo mulonga weyaze? Owo mulonga wove.”*
5 Ngocho ambilile jize jimbongo japalata mutembele nakuya. Kufumaho ayile nakulisukika.+
6 Oloze vapilishitu vavakulwane vanonele jize jimbongo japalata nakwamba ngwavo: “Jimbongo kana kavajitavisa kujihaka muchihela chajila chakulamina luhetoko, mwomwo jinapu jimbongo jamanyinga.”*
7 Omu vakumishile kuliwoyongola, jize jimbongo vajilanjile chipapa chavaka-kutenga vyuma vyaunonga mangana vafundengaho vangeji.
8 Shikaho chipapa chize vachivulukila ngwavo, Chipapa chaManyinga+ nakulikumbi lyalelo.
9 Jino mazu aze vahanjikile kuhichila muli kapolofweto Yelemiya ateselemo, akwamba ngwavo: “Vambachile jize jimbongo japalata 30, ndando vatomene kulandulula uze mutu, uze vana vaIsalele vamwe vatomene ndando yakumulandulwilaho.
10 Kaha vajilanjile chipapa chavaka-kutenga vyuma vyaunonga, nganomu angulwezele Yehova.”*+
11 Jino Yesu emanyine kumeso anguvulu, kaha nguvulu amwihwile ngwenyi: “Ove yove Mwangana wavaYuleya tahi?” Yesu akumbulwile ngwenyi: “Ove ivene unambemo lyehi.”+
12 Oloze omu vakulwane navapilishitu vavakulwane vapwile nakumuvangijikila, ikiye kakumbulwileko.+
13 Jino Pilatu ambile kuli ikiye ngwenyi: “Uno evi vyuma vyavivulu ngana vali nakukuvulukila kawavivwileko tahi?”
14 Oloze ikiye kamukumbulwile numba lizu limweko, ngocho nguvulu alikomokelele chikuma.
15 Jino hachiwanyino hichiwanyino, nguvulu apwilenga nakukasununa weshowo funge vasakilenga vatu.+
16 Kaha halwola luze vapwile nafunge wakuhuka chikuma, uze vavulukilenga ngwavo Mbalapa.
17 Kahomu vakungulukile hamwe, Pilatu ambile kuli vakiko ngwenyi: “Umwe ulihi namusaka ngwenu ngumikasunwine, Mbalapa tahi, nyi Yesu ou vavuluka ngwavo Kulishitu?”
18 Mwomwo Pilatu ejivile ngwenyi Yesu vamuhanyine kuli ikiye mwomwo vamwivwilile lushiushiu.
19 Kaha nawa, omu atwamine hachitwamo chakusopela, pwevo lyenyi atumine mazu kuli ikiye ngwenyi: “Kanda ulinga chuma chimwe hali ou mutu wakwolokako, mwomwo lelo ngunaloto chilota chachipi mwomwo yaikiye.”
20 Oloze vapilishitu vavakulwane navakulwane vakunywile aze mayongomena mangana valombe vavahane Mbalapa,+ oloze Yesu vamujihe.+
21 Jino nguvulu ambile kuli vakiko ngwenyi: “Umwe ulihi hali ava vatu vavali namusaka ngwenu ngumikasunwine?” Vakiko vambile ngwavo: “Mbalapa.”
22 Pilatu ambile kuli vakiko ngwenyi: “Nyi Yesu ou vavuluka ngwavo Kulishitu ngumulinge muka?” Vosena vambile ngwavo: “Vamupapalile hachitondo!”+
23 Kaha ambile ngwenyi: “Mwomwo ika? Chuma muka chachipi nalingi?” Oloze vakiko vatambakanyine lika chikuma ngwavo: “Vamupapalile hachitondo!”+
24 Pilatu hakumona ngwenyi mazu ahanjikile kawakafwileko, oloze liuya lyapwile nakutohwelako lika, ambachile meya, asanyine kumavoko enyi hameso aliyongomena nakwamba ngwenyi: “Ami kangweshi namulonga wamanyinga ayou mutuko. Mulonga kana uli hali enu vavene.”
25 Hakwivwa ngocho, vatu vosena vakumbulwile ngwavo: “Mulonga wamanyinga enyi upwenga tuhu hali etu nahali vana vetu.”+
26 Ngocho avakasunwinyine Mbalapa, oloze avetesele Yesu vikote,+ kaha amuhanyine kuli maswalale vamupapalile hachitondo.+
27 Jino maswalale janguvulu vambachile Yesu nakumutwala muzuvo yanguvulu, kaha vamukungulwilile lizavu lyamaswalale lyosena.+
28 Vamuzulile, vamuvwikile chikuto chichila.+
29 Vavinjile muchama wamingonga nakumuvwikawo kumutwe, nakumuhana lihongo akwate mulivoko lyenyi lyachilyo. Vamufukaminyine nakumuhenda ngwavo: “Mwoyo wove,* ove Mwangana wavaYuleya!”
30 Kaha vamufwijilile maleji,+ vamutambwile lize lihongo nakuputuka kumuvetalyo mumutwe.
31 Omu vakumishile kumuhenda, vamuzulile chize chikuto nakumuvwika cheka uvwalo wenyi wahelu, kaha vamutwalile vakapapalile hachitondo.+
32 Omu vapwile nakuya vawanyine mutu wakuKulene, lijina lyenyi Shimona. Ou mutu vamushinjilile ambate chitondo chakuyanjishila* Yesu.+
33 Kahomu vahetele kuchihela vavuluka ngwavo Ngolongota, kulumbununa, Chihela chaChikola,+
34 vamuhanyine vinyo vyakufutula nanyangwa ngwavo anwenga.+ Oloze omu amakilileko, akanyine kuvinwa.
35 Omu valingile hivanamupapalila lyehi hachitondo, valipangilile uvwalo wenyi wahelu kuzachisa tutachikijilo,+
36 kaha vatwamine vene kuze nakumulama.
37 Helu lyamutwe wenyi nawa vahakileho katachikijilo kaze vasonekele mulonga vamuhanyine ngwavo: “Ou Ikiye Yesu Mwangana WavaYuleya.”+
38 Jino vamupapalilile navihwanga vavali havitondo, umwe kulivoko lyenyi lyachilyo kaha mukwavo kuchimoswe.+
39 Kaha vaze vahichilenga mujila vapwile nakumusaula,+ vanyengesele mitwe+
40 nakwamba ngwavo: “Ove wambile kushiula tembele nakuyitunga mumakumbi atatu,+ lilwile ove ivene. Kachi nge uMwanaKalunga, kaha suluka oho hachitondo chakuyanjishila.”*+
41 Vapilishitu vavakulwane, navaka-kusoneka, navakulwane navakiko vaputukile kumuhenda ngwavo:+
42 “Alwilile veka, oloze ivene keshi kuhasa kulilwilako. Ikiye Mwangana waIsalele.+ Asuluke jino hachitondo chakuyanjishila,* kaha natumwitavila.
43 Nafwelela Kalunga, ngocho Kalunga amuyovole jino kachi nge amusaka,+ mwomwo ambilenga ngwenyi, ‘Ami nguMwanaKalunga.’”+
44 Navaze vihwanga vapapalilile havitondo hamwe naikiye, vapwile nakumusaula.+
45 Kufuma haola yakusokesa 6* milima yafwikile lifuchi lize lyosena palanga nakuola yakusokesa 9.*+
46 Jino kafwe haola yakusokesa 9, Yesu atambakanyine nalizu lyakukanguka ngwenyi: “Eli, Eli, lama savakatanyi?” kulumbununa ngwenyi, “Ove Kalunga kami, ove Kalunga kami, mwomwo ika unangusezela?”+
47 Vatu vamwe vaze vemanyine kuze hakwivwa ngocho, vaputukile kwamba ngwavo: “Ou mutu ali nakusanyika Elija.”+
48 Kaha hahaze vene minavo umwe alahile nakumbata chiponja,* achizovesele navinyo vingangamina, achihakile kulihongo, kaha amuhanyine anwenga.+
49 Oloze vakwavo vambile ngwavo: “Mweche! Mana tutale numba nge Elija mweza nakumulwila.”
50 Yesu atambakanyine cheka nalizu lyakukanguka, kaha echele shipilitu yenyi.*+
51 Kaha lihina lyamuchihela chajila+ lyapulikile havali,+ kufumisa kwilu mbwe nakwishi.+ Mavu andendele, malolwa nawa apulikile.
52 Kaha vimbumbe* vyasokolokele, ngocho mijimba yayivulu yavaka-kujila vaze vasavalile tulo yatutukile,
53 kaha yasolokele kuvatu vavavulu. (Omu Yesu alingile nasanguka lyehi, vatu vaze vafumine muvimbumbe vengilile munganda yajila).
54 Oloze omu kapitau kamaswalale navaze apwile navo nakulama Yesu vamwene uze mundenda navyuma vize vyapwile nakusoloka, vevwile woma mateli nakwamba ngwavo: “Pundu vene ou apwanga MwanaKalunga.”+
55 Jino kwapwile nawa mapwevo vavavulu vaze vapwile hahasuku nakutala vyuma navisoloka. Ava mapwevo vakavilenga Yesu kufuma kuNgalileya mangana vamuzachilenga.+
56 Hali vakiko hapwile Maliya Mangatala, naMaliya nevo yaYakova naYose, nanevo yavana vaZevete.+
57 Omu lyalingile likumbi linahunguluka lyehi, kwejile muka-luheto wakuAlimateya uze nawa apwile kambaji kaYesu. Lijina lyenyi apwile ikiye Yosefwe.+
58 Ou lunga ayile kuli Pilatu nakulomba mujimba waYesu,+ kaha Pilatu avalwezele vamuhanewo.+
59 Yosefwe ambachile uze mujimba, auvungilile halihina lyamwaza litoma,+
60 kaha ausavalikile muchimbumbe chenyi* chachihya+ chize atotele mulilolwa. Kahomu akumishile kushindumwina lilolwa lyalinene kuchikolo chachimbumbe,* akatukile nakuya.
61 Oloze Maliya Mangatala nauze Maliya mukwavo vapwile lika kuze, vatwamine kulutwe lwafuka.+
62 Lichako, kufuma haLikumbi lyaKulongesa Vyuma,+ vapilishitu vavakulwane navaFwaliseu valikungulwilile kuli Pilatu
63 nakwamba ngwavo: “Ove mwata, tunanuka vyuma ahanjikile uze muka-kuhungumwisa vatu omu apwile wamutonyi ngwenyi, ‘Omu namukahita makumbi atatu navakangusangula.’+
64 Shikaho hana lushimbi mangana fuka yize vayikinge kanawa palanga nakulikumbi lyamuchitatu, kuchina tumbaji twenyi naveza nakumwiva+ nakulweza vatu ngwavo, ‘Vanamusangula lyehi kuvafu.’ Kaha makuli kana awa akukuminyina nawasweza chikuma kuhambakana akulivanga.”
65 Pilatu ambile kuli vakiko ngwenyi: “Mbatenu vaka-kulama. Yenunga mukakinge fuka kweseka nomu namuhashila.”
66 Ngocho vayile, kaha yize fuka vayikingile hakulamika katachikijilo kulilolwa lize, nakuhakako vaka-kulama.
Kwinyikila Chamwishi
^ Hela., “hakusolola manyinga akuzeneka mulonga.”
^ Chipwe “Owo ukalu wove.”
^ Hela., “mwomwo yinapu ndando yamanyinga.”
^ Tala Chihande A5.
^ Chipwe “Vulye.”
^ Tala Mukana waMazu.
^ Tala Mukana waMazu.
^ Tala Mukana waMazu.
^ Kafwe 12:00 yamusana.
^ Kafwe 15:00.
^ Echi hichuma chachivwovu chakufwana nge mupelo.
^ Chipwe “kaha afwile.”
^ Chipwe “vimbumbe vyakwanukila.”
^ Chipwe “muchimbumbe chenyi chakwanukila.”
^ Chipwe “chachimbumbe chakwanukila.”
