Mateu 7:1-29
7 “Litwaminenu kusopesanga vakwenu,+ kuchina nayenu navakamisopesa,
2 mwomwo kusopesa chize muli nakusopesanga vakwenu, chikiko navakamisopesa nayenu nawa.+ Kaha chesekelo chize muli nakwesekelanga nacho vakwenu, chikiko navakamyesekela nacho nayenu nawa.+
3 Ikaze weji kutalilanga chiswaswa chili muliso lyandumbwove, oloze lisoko lili muliso lyove kaweshi kulimonako?+
4 Chipwe nawamba ngachilihize kuli ndumbwove ngwove, ‘Ngwitavise ngukufumise chiswaswa chili muliso lyove,’ okunyi muliso lyove muli lisoko?
5 Ove muka-kulyonga! Vangila kulifumisa lisoko lili muliso lyove, numbanyi umone kanawa mwakufumishila chiswaswa chili muliso lyandumbwove.
6 “Kanda namuhana chuma chajila kuli vatuwako, chipwe kumbila jipela jenu kuli vanguluko,+ kuchina navajilyatangila namahinji avo, nakumyalumukila nakumitanya.
7 “Lombenunga lika, kaha navakamihana.+ Tondenunga lika, kaha namukawana. Ngongomwezenunga lika, kaha navakamisokolwela.+
8 Mwomwo weshowo mwalombanga mwatambula,+ kaha weshowo mwatondanga mwawana, kaha weshowo mwangongomwezanga navamusokolwela.
9 Chikupu vene, mutu muka muli enu, nge mwanenyi mwamulomba mbolo, kaha ikiye himwamuhana lilolwa?
10 Chipwe nge mwamulomba ishi, kaha ikiye himwamuhana linoka?
11 Shikaho kachi nge enu, numba tuhu mwapwa muvakuhuka, oloze munatachikiza mwakuhanyina mawana amwaza kuli vana venu, kahanyi Senu uze ali mwilu mwahambakanamo chikuma kuhana vyuma vyamwaza+ kuli vaze navamulombavyo.+
12 “Shikaho vyuma vyosena namusaka ngwenu vatu vamilingile, nayenu nawa valingilenuvyo.+ Mwomwo omu mukiko vene mwaya Jishimbi naMazu aVapolofweto.+
13 “Ingililenu kuchikolo chachindende,+ mwomwo chikolo chachinene najila yakuhweka vili nakutwala kukunonga, kaha vaze vali nakuyamo vanapu vavavulu.
14 Oloze chikolo chachindende najila yakupalakanya vili nakutwala kukuyoya, kaha ava vali nakuyiwana vanapu vavandende kaha.+
15 “Zangamenunga navapolofweto vamakuli+ vaze veji kwizanga kuli enu oku vanalifwiki malambu amikoko,+ oloze mukachi vapwa tungunge vazala.+
16 Kumihako yavo kukiko vene namuvatachikijila kanawa. Kutala vatu veji kwahanga mihako yamivinyo kumingonga chipwe jikuyu kumituvapoko tahi?+
17 Chochimwe nawa, mutondo wamwaza weji kwimanga mihako yamwenemwene, oloze mutondo wakupola weji kwimanga mihako yamokomoko.+
18 Mutondo wamwaza kaweshi kwima mihako yamokomokoko. Kaha mutondo wakupola nawa kaweshi kwima mihako yamwenemweneko.+
19 Weshowo mutondo kaweshi kwima mihako yamwenemweneko veji kuutetanga nakuumbila mukakahya.+
20 Chikupu vene, kumihako yavo kukiko namutachikijila kanawa vatu kana.+
21 “Keshi nge vosena vaze vali nakwamba kuli ami ngwavo, ‘Ove Mwata, Ove Mwata,’ navakengila muWangana wameluko, shina vaze kaha vali nakulinga mwaya muchima waTata uze ali mwilu.+
22 Vavavulu navakamba kuli ami halikumbi lize ngwavo: ‘Ove Mwata, Ove Mwata,+ kutala katwapolofwetele mulijina lyove, nakulovola vandemone mulijina lyove, nakuzata milimo yangolo yayivulu mulijina lyoveko numba?’+
23 Kaha hahaze vene nangukamba kuli vakiko ngwami: ‘Ami kangwamitachikizako! Fumenu kuli ami, enu vaka-kulinga upapwoki!’+
24 “Shikaho weshowo mwevwa awa mazu ami nakuwakavangizanga, mwapwa nge lunga wakuzangama uze atungilile zuvo yenyi halilolwa.+
25 Kaha vula yanokele, livaji lyejile, peho yahuhwile nakuliveta hazuvo yize, oloze kayashiukileko mwomwo vayitungilile halilolwa.
26 Kaha nawa weshowo mwevwa awa mazu ami nakuhona kuwakavangizanga, mwapwa nge lunga wakuhulama uze atungilile zuvo yenyi hausekeseke.+
27 Kaha vula yanokele, livaji lyejile, peho yahuhwile nakuliveta hazuvo yize,+ kaha yashiukile. Kushiuka chayo chapihile chikuma.”
28 Omu Yesu akumishile kuhanjika evi vihande, aze mayongomena alikomokelele chikuma mujila anangwililengamo,+
29 mwomwo apwile nakuvanangula nge mutu ukwechi ngolo,+ keshi ngana mwavaka-kusoneka javoko.
