Mateu 9:1-38
9 Ngocho engilile muwato, azaukile nakukinduluka cheka munganda yenyi.+
2 Jino vatu vamwe vamunehelele lunga muka-kalepa oku nasavala hakahela. Yesu hakumona lufwelelo lwavo, ambile kuli uze muka-kalepa ngwenyi: “Ove mwanami, likolezeze. Jishili jove vanakukonekelajo.”+
3 Kaha vaka-kusoneka vamwe valihanjikishile mwavomwavo ngwavo: “Ou lunga ali nakusaula Kalunga.”
4 Jino Yesu hakutachikiza vishinganyeka vyavo, ambile ngwenyi: “Ikaze muli nakushinganyekela vyuma vyavipi mumichima yenu?+
5 Chachashi chimwe chilihi, kwamba ngwami, ‘Jishili jove vanakukonekelajo,’ nyi kwamba ngwami, ‘Katuka utambuke’?+
6 Shikaho hakusaka mutachikize ngwenu Mwanamutu ali nangolo hano hamavu jakukonekela jishili—” kaha ambile kuli uze muka-kalepa ngwenyi: “Katuka, mbata kahela kove, yakonga kwimbo lyove.”+
7 Ngocho akatukile, ayile kwimbo lyenyi.
8 Omu mayongomena amwene chuma kanechi, vevwile woma, kaha vamutohwesele Kalunga, uze ahanyine ngolo kana kuli vatu.
9 Omu Yesu apwile nakufuma kuze, amwene lunga umwe natwame kuzuvo yakutelela mitelo. Ou lunga lijina lyenyi apwile ikiye Mateu. Yesu ambile kuli ikiye ngwenyi: “Pwako umuka-kungukavangiza.” Kaha akatukile, amukavangijile.+
10 Kufumaho, omu apwile nakulya vyakulya* muzuvo, vaka-kutambula mitelo navaka-shili vavavulu vejile nakulya vyakulya* hamwe naYesu natumbaji twenyi.+
11 Oloze omu vaFwaliseu vamwene chuma kana, vambile kuli tumbaji twenyi ngwavo: “Mwomwo ika ou muka-kuminangula eji kulilanga hamwe navaka-kutambula mitelo navaka-shili?”+
12 Ikiye hakuvevwa, ambile kuli vakiko ngwenyi: “Vatu vavakangule kaveshi kusakiwa chimbukeko, kuvanga vaka-kuviza kaha.+
13 Ngocho yenunga mukalinangule mwalumbunukila mazu awa: ‘Ami ngunasake keke keshi vimuna vakuvatulako.’+ Mwomwo ami kangwejile nakusanyika vaka-kwolokako, oloze shina vaka-shili.”
14 Jino tumbaji twaYowano vejile kuli ikiye nakumwihula ngwavo: “Mwomwo ika etu navaFwaliseu tweji kulijilikilanga kulya, oloze tumbaji twove kaveshi kulijilika kulyako?”+
15 Yesu hakwivwa ngocho, ambile kuli vakiko ngwenyi: “Uno masepa jamwenyamwenga vatela kulishona shimbu mwenyamwenga+ achili hamwe navakiko numba? Oloze makumbi nawakeza omu navakavatambula+ mwenyamwenga numbanyi vakalijilike kulya.
16 Kakweshi mutu mwatongela chikamba chalihina lyalihya hauvwalo wamwakako, mwomwo nge chize chikamba nachilikoka, kaha nachipula uze uvwalo nakutohwesa chikuma mbelo.+
17 Vatu nawa kaveshi kulongela vinyo vyavihya mujituku jamalambu jamwakako. Kachi nge navalinga ngocho, jituku jamalambu najipulika, kaha vinyo navimwangala, ngocho jituku jamalambu najilyenyeka. Oloze vatu veji kulongelanga vinyo vyavihya mujituku jamalambu jajihya, kaha vyosena vivali navipwa vyalambwe.”
18 Shimbu apwile nakuvalweza vyumevi, muka-kuyula umwe ejile nakulifukula kuli ikiye, nakwamba ngwenyi: “Oholili mwanami wapwevo pamo nakufwa nafu lyehi, oloze tuyenga umunangike livoko lyove, kaha mwayoya cheka.”+
19 Jino Yesu akatukile natumbaji twenyi nakumukavangiza.
20 Kaha pwevo umwe uze apwile namusongo wakuhita manyinga+ hamyaka 12, ejile munyima yenyi nakukwata kujizombo jauvwalo wenyi wahelu,+
21 mwomwo apwilenga nakulyamba ngwenyi: “Kachi nge nangukwata kaha kuuvwalo wenyi wahelu, nanguhinduka.”
22 Yesu alumukile, kaha hakumona uze pwevo, ambile ngwenyi: “Ove mwanami, likolezeze. Lufwelelo lwove lunakuhindula.”+ Kaha kufuma haola vene yize, uze pwevo ahindukile kumusongo wenyi.+
23 Jino Yesu engilile muzuvo yayauze muka-kuyula, kaha hakumona vaka-kwimba jipanda nalizavu lyavatu vaze vapwile nakuneha liuya,+
24 ambile ngwenyi: “Lovokenumo, mwomwo ou kanyike wapwevo kafwileko, nasavala kaha tulo.”+ Hakwivwa ngocho vaputukile kumuseha nakumupopolola.
25 Kahomu alingile nalovolamo lyehi lize lizavu lyavatu, engililemo nakumukwata kulivoko,+ kaha uze kanyike wapwevo akatukile.+
26 Ngocho mujimbu wachuma alingile watanjile mungalila yize yosena.
27 Omu Yesu apwile nakufuma kuze, tupuputa vavali+ vamukavile oku vali nakutambakana ngwavo: “Tuteteleko, ove MwanaNdavichi.”
28 Omu alingile hanengila lyehi muzuvo, vaze tupuputa vejile kuli ikiye, kaha Yesu avehwile ngwenyi: “Kutala muli nalufwelelo ngwenu ngunahase kulinga chuma kanechi nyi?”+ Vamukumbulwile ngwavo: “Eyo, ove Mwata.”
29 Jino avakwachile hameso avo+ nakuvamba ngwenyi: “Chilingiwe vene ngocho kweseka nalufwelelo lwenu.”
30 Ngocho meso avo atonene. Jino Yesu avahuhumwine ngwenyi: “Kanda nakupwa mutu umwe atela kwijiva chuma kanechiko.”+
31 Oloze omu valovokele haweluka, vatanjishile mujimbu wakuvuluka ikiye mungalila yize yosena.
32 Jino omu valingile hinavakatuka, vatu vamunehelele lunga wakamama uze apwile nandemone.+
33 Kahomu alingile hanalovola lyehi uze ndemone, uze lunga wakamama ahanjikile.+ Ngocho mayongomena alikomokelele nakwamba ngwavo: “MuIsalele kanda musolokengaho lyehi chuma changanako.”+
34 Oloze vaFwaliseu vambile ngwavo: “Ou mutu eji kulovolanga vandemone nangolo jakufuma kuli muka-kuyula vandemone.”+
35 Jino Yesu akatukile nakuya mujinganda josena namumembo osena, nakunangula vatu mujisunangonga javo, nakwambulula mujimbu wamwaza waWangana, nakuka misongo yosena nakuviza chosena vavijilenga vatu.+
36 Omu amwene mayongomena avatu, avevwilile keke,+ mwomwo vayanjile nakulimwanga nge mikoko vakuzeneka kafunga.+
37 Jino ambile kuli tumbaji twenyi ngwenyi: “Mulimo wakwaha unatoho, oloze vaka-kuzata vanapu vavandende.+
38 Shikaho mulombenu Mwenyamulimo wakwaha mangana atume vaka-kuzata vayenga mumulimo wenyi wakwaha.”+
