Mijimbu 1 10:1-14
-
Kufwa chaSaulu navana venyi (1-14)
10 Jino vaFwilishite valwile jita navaIsalele, kaha vaIsalele vachinyine vaFwilishite. Vavavulu vafwililile haPili yaNgilivowa.+
2 VaFwilishite vatakilikile Saulu navana venyi. Ngocho vajihile vana venyi, Yonatane, naAvinatave, naMalaki-shuwa.+
3 Jino jita yamutohwelele chikuma Saulu, kaha vaka-kwasa mata amanana+ vamuwanyine. Ngocho vamulemekele.
4 Kaha Saulu ambile kuli muka-kumumbachila vitwa vyajita ngwenyi: “Somona poko yove yamukwale ungutuvasane kuchina ava vilima naveza nakunguyanjisa.”+ Oloze uze muka-kumumbachila vitwa vyajita akanyine mwomwo evwile woma chikuma. Ngocho Saulu ambachile poko yenyi yamukwale, kaha alimbukilileko.+
5 Omu muka-kumbata vitwa vyajita amwene Saulu nafu, naikiye alimbukilile kupoko yenyi yamukwale, kaha afwile.
6 Ngocho Saulu navana venyi vatatu vafwile. Vaze vakuzuvo yenyi vosena vafwile halwola lwolumwe.+
7 Omu vaIsalele vosena vaze vapwile muchinema* vamwene malunga vavaIsalele vanachinyi, kaha nawa Saulu navana venyi vanafu, vaputukile kulovoka mujinganda javo nakuchina. Ngocho vaFwilishite vejile nakutwama muze mujinganda.
8 Lichako, omu vaFwilishite vejile nakuzula vatu vaze vajihile, vawanyine Saulu navana venyi vanafwila haPili yaNgilivowa.+
9 Ngocho vazulile Saulu uvwalo navyuma vyenyi vyajita, vamutetele mutwe. Kaha vatumine vatu mulifuchi lyavaFwilishite lyosena mangana vatanjise mujimbu kutulunga twavo+ nakuli vatu.
10 Kufumaho, vahakile vize vyuma vyenyi vyajita muzuvo* yakalunga kavo, kaha mutwe wenyi vaupapalilile muzuvo yakalunga kavo Ndangone.+
11 Omu vatu vosena vamuYaveshe+ muNgileyate vevwile vyuma valingile vaFwilishite kuli Saulu,+
12 vaka-kulwa jita vosena vakatukile, vayile nakumbata mujimba waSaulu namijimba yavana venyi. Vejile nayo kuYaveshe, vafunjile vifuwa vyavo mumutondo waunene muYaveshe.+ Kaha valijilikile kulya hamakumbi 7.
13 Ngocho Saulu afwile mwomwo yakuhona chenyi kushishika kuli Yehova. Kononokele mulizu lyaYehovako,+ kaha nawa akehwile muka-kutahisa vashipilitu+
14 mukutela kwihula Yehova. Shikaho amujihile, kaha ahanyine wangana kuli Ndavichi mwanaYese.+
