Mijimbu 1 11:1-47
11 Kutwala muze vaIsalele vosena valikungulwilile kuli Ndavichi kuHevelone,+ kaha vamwambile ngwavo: “Tala! Etu twapwa tuvausoko wove vahalinyinga.+
2 Kunyima omu Saulu apwile mwangana wetu, ove yove wapwile nakutwaminyina vaIsalele kujijita.*+ Yehova Kalunga kove ambile kuli ove ngwenyi, ‘Naukafunganga vatu jami vaIsalele, kaha naukapwa utwamina yavo.’”+
3 Shikaho, vakulwane javaIsalele vosena vejile kuli mwangana kuHevelone, kaha Ndavichi alikashile navo chivwasano kumeso aYehova. Kufumaho, vamuwavishile apwenga mwangana wavaIsalele,+ kweseka namazu ahanjikile Yehova kuhichila muli Samwele.+
4 Jino Ndavichi navaIsalele vosena vayile kuYelusalema, kuYevuse+ kuze vatwaminenga vaYevuse.+
5 VaYevuse vahulamishile Ndavichi ngwavo: “Ove kaweshi kahasa kwiza kunoko.”+ Oloze Ndavichi atambwile nganda yakukola yaZeyone+ yize vavulukilenga jino ngwavo Nganda yaNdavichi.+
6 Ngocho Ndavichi ambile ngwenyi: “Weshowo mwalivanga kulukuka vaYevuse mwapwa kapitau* kaha nawa chilolo.” Kaha Yowave+ mwanaZeluwiya ikiye alivangile kuya nakuvalukuka, ngocho apwile kapitau.
7 Kufumaho Ndavichi atwaminenga jino munganda kaneyi yakukola. Shikaho vayivulukililenga ngwavo Nganda yaNdavichi.
8 Ndavichi aputukile kutunga jikembwe najizuvo kuMulundu* swi nakuvihela vyeka vyajingilikileko. Kaha Yowave atungulwile nganda yosena.
9 Ngocho Ndavichi azaminenga lika,+ kaha Yehova Kalunga wamayongomena apwilenga naikiye.
10 Ndavichi apwile natupitau twavaka-kwasa jita vangolo. Malunga kana hohamwe navaIsalele vosena vakiko vamukundwijilenga chikuma mangana apwenga mwangana kweseka namuze Yehova ashikile vaIsalele.+
11 Awa akiko majina avatu jaNdavichi vaka-kwasa jita vangolo: Yashoveyame+ mwanakaHakamonyi uze apwile kapitau kavaka-kwasa jita vangolo vatatu.+ Yashoveyame ajihile vatu 300 nalikunga halwola lwolumwe.+
12 Muhato wenyi apwile Eleyaza+ mwanaNdoto kaAhowa. Eleyaza+ apwile hali vaka-kwasa jita vangolo vatatu.
13 Apwile naNdavichi kuPasa-ndamime+ kuze valikungulwilile vaFwilishite mangana valwenga jita. Kuchihela kana kwapwile wande uze wapwile nambale yayivulu chikuma. Jino vaIsalele vachinyine mwomwo yavaFwilishite.
14 Oloze ikiye omikile nakwimana mukachi kauze wande, kaha aukingile. Ajihile vaFwilishite, ngocho Yehova alwilile vaIsalele.+
15 Jino likumbi limwe, tupitau vatatu vafumine hatupitau 30 nakuya kulilolwa, kuwina wakusendeveka wakuAtulame+ kuze apwile Ndavichi. Kaha maswalale javaFwilishite vatungile chilombo chavo muChinema* chaLefwaime.+
16 Halwola kana Ndavichi apwile kuchihela chachikalu kuheta, kaha maswalale javaFwilishite vapwile muMbetelema.
17 Ngocho Ndavichi ahanjikile vyuma afwililile mumuchima wenyi ngwenyi: “Nachiwaha kachi nge nangunwako meya amulishima lyakuchikolo chaMbetelema.”+
18 Shikaho vaze tupitau vatatu vayile, valitakile muchilombo chavaFwilishite, kaha vaswichile meya mulishima lyakuchikolo chaMbetelema nakumunehela Ndavichi. Oloze ikiye akanyine kuwanwa, awamwangilile hamavu kumeso aYehova.
19 Ambile ngwenyi: “Kacheshi chakutamo kumeso aKalunga kami ami kunwa awa meyako. Kutala nachipwa chakutamo kuli ami kunwa manyinga avava malunga vahakanga myono yavo muponde nyi?+ Malunga kana vahakanga myono yavo muponde hakuya nakuswita awa meya.” Ngocho akanyine kunwa aze meya. Evi vikiko vyuma valingile vaze vatu jaNdavichi vaka-kwasa jita vangolo vatatu.
20 Avishai+ ndumbwaYowave+ apwile kapitau kavaka-kwasa jita veka vangolo vatatu. Avishai ajihile vatu 300 nalikunga, kaha ayile puho ngana mwavaze vaka-kwasa jita vangolo vatatu.+
21 Apwile wamulemu chikuma kuhambakana ava vakwavo vavali, kaha nawa apwile kapitau kavo. Oloze katesekele hamwe ulemu navaze vaka-kwasa jita vangolo vatatu vakulivangako.
22 Mbenaya+ mwanaYehoyata apwile wakuhamuka chikuma.* Azachile milimo yayivulu chikuma muKavazele.+ Ajihile vana vaAlyele wakuMowave vavali. Engilile nawa muwina wameya nakujiha ndumba oku mbundu yili nakunoka.+
23 Ajihile nawa kaEjipitu umwe wakutaluka chikuma uze asuwile jikuvite jitanu.*+ Numba tuhu ou kaEjipitu apwile nalikunga lyalinene mulivoko lyenyi kwijiva nge mwalachi wavaka-kutunga mahina,+ oloze Mbenaya ejile kuli ikiye nambwechi nakumunyanga likunga, kaha amujihishile lize likunga lyenyi.+
24 Evi vikiko vyuma alingile Mbenaya mwanaYehoyata. Kaha ayile puho ngana mwavaze vaka-kwasa jita vangolo vatatu.
25 Numba tuhu apwile wamulemu chikuma kuhambakana vaze vaka-kwasa jita vangolo 30, oloze katesekele hamwe ulemu navaze vaka-kwasa jita vangolo vatatuko.+ Chipwe ngocho, Ndavichi amutongwele kupwa mukulwane wavaka-kumulama.
26 Vaka-kwasa jita vangolo vaze vapwile hamazavu amaswalale vapwile Asahele+ ndumbwaYowave, naElehanane mwanaNdoto wakuMbetelema,+
27 naShamote wakuHalole, naHeleze wakuPelone,
28 naIla+ mwanaIkeshe wakuTekowa, naAviyezele+ wakuAnatote,
29 naShivekai+ wakuHusha, nakaAhowa Ilai,
30 naMahalai+ wakuNetofwa, naHelete+ mwanaMbana wakuNetofwa,
31 naItai mwanaLivai wakuNgiveya yavaMbenjamine,+ naMbenaya wakuPilatone,
32 naHitai wakuvana vatulwiji* vaNgashe,+ naAviyele wakuAlava,
33 naAzamavete wakuMbahulime, naEliyava wakuShalavone,
34 navana vaHasheme wakuNgizone, naYonatane mwanakaHalale Shange,
35 naAhiyame mwanakaHalale Sakale, naElifwale mwanaUle,
36 naHefwele wakuMekela, naAhiya wakuPelone,
37 naHezelo wakuKalamele, naNalai mwanaEzevai,
38 naYowele ndumbwaNatane, naMivihale mwanaHangali,
39 naZeleke kaAmone, naNahalai wakuMbelote uze ambachililenga Yowave mwanaZeluwiya vitwa vyajita,
40 naIla kaYetele, naNgaleve kaYetele,
41 naUliya+ kaHete, naZavate mwanaAlai,
42 naAchina mwanakaLuvene Shiza, uze apwile twamina yavaLuvene navatu 30 vaze apwile navo,
43 naHanane mwanaMaka, naYoshafwate wakuMichina,
44 naUjiya wakuAshatalote, naShama naYeyele vaze vapwile vana vaHotame wakuAlowele,
45 naYechayele mwanaShimili, nandumbwenyi Yoha wakuChize,
46 naElyele wakuMahave, naYelivai naYoshaviya vaze vapwile vana vaElenama, nakaMowave Ichima,
47 naElyele, naOvete, naYashele wakuMezova.
Kwinyikila Chamwishi
^ Hepe., “yove walowelenga vaIsalele nakuvengisanga cheka.”
^ Hepe., “twamina.”
^ Chipwe “kuMilo.” Milo hilizu lyachiHepeleu lyalumbununa “kuzala.”
^ Chipwe “muChana.”
^ Hepe., “apwile mwanachingazule.”
^ Asuhwile kafwe jimita 2.23. Tala Chihande B14.
^ Tala Mukana waMazu.
