Mijimbu 1 13:1-14
13 Ndavichi atwamine punga natupitau twamakombakaji, natupitau twamakulukaji, navatwamina vosena.+
2 Kaha Ndavichi ambile kulizavu lyavaIsalele lyosena ngwenyi: “Kachi nge munachimono kupwa chamwaza, kaha nawa chakutamo kuli Yehova Kalunga ketu, kaha tutumenu mazu kuli vandumbwetu veka vaze vali mujingalila javaIsalele josena, nakuli vapilishitu navaLevi vaze vali mujinganda javo+ namuvipapa vyakujinganda kana mangana vezenga kuno.
3 Kaha nawa tuyenu tukambate Chikasha+ chaKalunga ketu.” Mwomwo mumakumbi aSaulu,+ chikasha kana kavachilaminenga kanawako.
4 Lizavu lyosena lyetavilile vyuma kana, mwomwo vatu vosena vavimwene kupwa vyakwoloka.
5 Kaha Ndavichi akungulwile vaIsalele vosena kufuma kukalwiji* waEjipitu swi nakuLevo-hamate,*+ mangana vakambate Chikasha chaKalunga wamuchano kuKilyate-yeyalime.+
6 Ndavichi navaIsalele vosena vayile kuMbala,+ kuKilyate-yeyalime yamuYuta mangana vakambate Chikasha chaKalunga wamuchano Yehova, uze atwama halitanda helu* lyavakeluve.+ Kuchikasha kana kukiko vatu vasanyikililenga halijina lyenyi.
7 Oloze Chikasha chaKalunga wamuchano vachimbachilile mulitemba lyalihya+ kufuma kuzuvo yaAvinatave. Kaha Uza naAhiyo vakiko vatambukishile lize litemba.+
8 Ndavichi navaIsalele vosena vapwile nakukina nakwimba myaso kumeso aYehova natulyalya, navisaji vyeka vyamikole, natungoma,+ najingunga,+ najineta.+
9 Oloze omu vahetele kuchizungwilo chaKitone, vangombe vasakile kuholola Chikasha, ngocho Uza olwele livoko lyenyi nakuchikwachilila.
10 Jino Yehova akwachilile Uza utenu, kaha amuvetele mwomwo yakwolola livoko lyenyi nakukwata Chikasha.+ Ngocho afwililile kuze, kumeso aKalunga.+
11 Oloze Ndavichi apihililile hakuwana nge Yehova azangamishile Uza. Ngocho chihela kana vachivuluka ngwavo Peleze-uza* palanga nakulelo lino.
12 Shikaho Ndavichi evwile Kalunga wamuchano woma, ambile ngwenyi: “Kahaze Chikasha chaKalunga wamuchano nanguchitwala ngachilihi kuzuvo yami?”+
13 Ndavichi katwalile Chikasha muNganda yaNdavichi muze apwileko. Oloze alwezele vatu vachitwale kuzuvo yaOvete-etome wakuNgata.
14 Chikasha chaKalunga wamuchano chatwamine kuzuvo yaOvete-etome tukweji vatatu. Kaha Yehova akiswilenga vaze vakuzuvo yaOvete-etome navyuma vyosena apwile navyo.+
Kwinyikila Chamwishi
^ Chipwe “kufuma kuShihole.”
^ Chipwe “nakuwingililo wakuHamate.”
^ Chipwe pamo, “hakachi.”
^ Ulumbunwiso, “Kukwachila Utenu Uza.”
