Mijimbu 1 14:1-17
14 Hilame+ mwangana waTule atumine valuwa kuli Ndavichi. Amutuminyine nawa vitondo vyamushitale, navaka-kwola malolwa,* navaka-kusonga, mangana vatungile Ndavichi zuvo.*+
2 Ngocho Ndavichi atachikijile jino ngwenyi Yehova namuzamisa kupwa mwangana wavaIsalele+ hakuwana nge azezwile wangana wenyi mwomwo yavatu jenyi vaIsalele.+
3 Ndavichi ambachile mapwevo+ vakwavo muYelusalema. Kaha asemene cheka vana vamalunga navava vamapwevo.+
4 Ava vakiko vana vaze Ndavichi asemenene muYelusalema:+ Shamuwa, naShovave, naNatane,+ naSolomone,+
5 naIvihale, naElishuwa, naElepelete,
6 naNonga, naNefwenge, naYafwiya,
7 naElishama, naMbeliyata, naElifwelete.
8 Omu vaFwilishite vevwile ngwavo Ndavichi+ vanamuwavisa kupwa mwangana wavaIsalele vosena,+ vaFwilishite vosena vejile nakumutondatonda. Kahomu Ndavichi evwile mujimbu kana, ayile akalwe navo jita.
9 Kaha vaFwilishite vejile, valukukile vatu vaze vatwaminenga muChinema* chaLefwaime.+
10 Jino Ndavichi ehwile Kalunga ngwenyi: “Uno nguyenga nakulwa jita navaFwilishite tahi? Kutala naunguhanavo mulivoko lyami nyi?” Yehova amukumbulwile ngwenyi: “Yakonga, nangukuhanavo mulivoko lyove.”+
11 Ngocho Ndavichi ayile kuMbale-pelajime,+ ajihile vaFwilishite kuze. Kaha ambile ngwenyi: “Kalunga wamuchano nalivange kulutwe lwami kwijiva nge muta walivaji, kaha nanongesa vaka-kole jami.” Shikaho valukilile chize chihela ngwavo Mbale-pelajime.*
12 VaFwilishite vasezele tulunga twavo kuze. Kaha Ndavichi alwezele vatu jenyi vavoche, ngocho vavochele.+
13 Kutwala muze vaFwilishite vejile cheka, valukukile vatu vaze vatwaminenga muchinema.*+
14 Ndavichi ehwile cheka Kalunga wamuchano, oloze amwambile ngwenyi: “Kanda nauvejilila kulutweko. Vahichile kunyima mangana ufuminyine kuviputa vyambeka uvalukuke.+
15 Kahomu nawivwa chivumo chajishindo helu lyaviputa kana, valukuke mwomwo Kalunga wamuchano natetekela kulutwe lwove mangana ajihe maswalale javaFwilishite.”+
16 Ngocho Ndavichi alingile nge muze amulwezele+ Kalunga wamuchano, kaha vajihile vaFwilishite kufuma kuNgiveyone swi nakuNgezele.+
17 Shikaho Ndavichi ayile puho kumafuchi osena, kaha Yehova alingishile vaka-mafuchi osena vamwivwe woma.+
Kwinyikila Chamwishi
^ Chipwe “navaka-kutunga jikembwe.”
^ Chipwe “nganda.”
^ Chipwe “muChana.”
^ Ulumbunwiso, “Mwata Wakupuzwojola.”
^ Chipwe “muchana.”
