Mijimbu 1 16:1-43
16 Jino vanehele chize Chikasha chaKalunga wamuchano, kaha vachihakile mumbalaka yize achijikilile Ndavichi.+ Kufumaho, vahanyine mawana akulumba namawana akusolola kuunda kumeso aKalunga wamuchano.+
2 Omu Ndavichi akumishile kuhana mawana akulumba+ namawana akusolola kuunda,+ akiswile vatu mulijina lyaYehova.
3 Kaha nawa ambachile jimbolo jamujingulule, navindanda vyamihako yamukoma, navindanda vyamihako yamivinyo yaumu, avipangilile vaIsalele vosena, malunga namapwevo.
4 Kufumaho atongwele vaLevi vamwe vazachilenga kuChikasha chaYehova,+ mangana vahane kavumbi* Yehova Kalunga kaIsalele, nakumusakwilila, nakumwalisa.
5 Asafwe+ ikiye apwile twamina yavo, kaha muhato wenyi apwile Zekaliya. Kwapwile nawa Yeyele, naShemilamote, naYehyele, naMachichiya, naElyave, naMbenaya, naOvete-etome, naYeyele.+ Ava vakiko vembilenga visaji vyamikole natulyalya,+ kaha Asafwe ikiye embilenga jingunga.+
6 Kapilishitu Mbenaya nakapilishitu Yahajele vakiko vembilenga jineta lwola lwosena kuchikasha chalushiko lwaKalunga wamuchano.
7 Eli likiko lyapwile likumbi lyakulivanga lize Ndavichi asonekele mwaso wakusakwilila Yehova nakulweza Asafwe+ navandumbwenyi vembenga mwaso kana ngwavo:
8 “Musakwililenu Yehova,+ musanyikenu halijina lyenyi,Lwezenu vatu veka naveka milimo yenyi.+
9 Mwimbilenu, mwimbilenu myaso,+Shinganyekenu* hamilimo yenyi yakukomwesa yosena.+
10 Lisashilenu halijina lyenyi lyajila.+Michima yavaze vali nakutondatonda Yehova yiwahilile.+
11 Tondetondenu Yehova+ nangolo jenyi.Sakasakenu uselewa wenyi lwola lwosena.+
12 Anukenu milimo yakukomwesa nalingi,+Anukenu vyuma vyenyi vyakukomwesa namazu enyi akuyula nahanjika,
13 Enu vaka-tanga* yangamba yenyi Isalele,+Enu vana vaYakova, enu vatu jenyi asakula.+
14 Ikiye Yehova Kalunga ketu.+Mazu enyi akuyula ali kumavu kwosena.+
15 Anukenunga lushiko lwenyi haya myaka yosena,Anukenunga lushiko luze alishikile* havisemunwino likombakaji,+
16 Lushiko luze ashikile Apalahama,+Nalushingo luze alishingile kuli Isaka,+
17 Lushiko luze azamishile kupwa hilushimbi kuli Yakova,+Kupwa lushiko lwahaya myaka yosena kuli Isalele,
18 Ngwenyi, ‘Nangukakuhana lifuchi lyaKanane+Kupwa chazano chauswana wove.’+
19 Ahanjikile mazu awa halwola vapwile vavandende,Halwola vapwile vavandende chikuma, omu vapwile vamwiza mulifuchi.+
20 Vakimbwojokelenga kufuma kulifuchi limwe nakuya kulifuchi likwavo,Kufuma kuwangana umwe nakuya kuwangana ukwavo.+
21 Ketavishile mutu numba umwe avayanjiseko,+Ahanjikilile vamyangana+ mwomwo yavakiko,
22 Ngwenyi, ‘Kanda namukwata ava vami ngwawavisako,Kanda namulinga chuma chachipi kuli vapolofweto jamiko.’+
23 Enu mwatwama hamavu muvosena, imbilenu Yehova.Vilikenunga ulwilo wenyi hakumbi hakumbi.+
24 Ambululenu upahu wenyi muli vaka-mafuchi,Ambululenu milimo yenyi yakukomwesa muli vatu veka naveka vosena.
25 Mwomwo Yehova apwa wamunene, kaha atamo kumwalisa.Apwa wakwivwisa woma chikuma kuhambakana tulunga veka vosena.+
26 Tulunga twavatu veka naveka vosena vapwa vamokomoko,+Oloze Yehova ikiye atengele melu.+
27 Ukelenga* naluvaji vili kumeso enyi.+Ngolo nakuwahilila vili muchihela chenyi atwama.+
28 Enu jitanga javatu veka naveka, vumbikenu Yehova,Vumbikenu Yehova mwomwo yaupahu wenyi nangolo jenyi.+
29 Mutohwesenu Yehova mwomwo yalijina lyenyi.+Nehenu wana, twayenu kumeso enyi.+
Lifukulenu kuli* Yehova muuvwalo wajila.*+
30 Enu mwatwama hamavu muvosena, chikimenu kumeso enyi.Mavu azama mbe. Kaha kaveshi kuhasa kuwaswenyesako.*+
31 Melu awahilile, mavu nawa asambwojoke.+Ambululenu muli vaka-mafuchi ngwenu: ‘Yehova napu Mwangana.’+
32 Kalungalwiji navyuma vyosena vyatwamamo vililime.Vipapa navyuma vyosena vyatwamamo viwahilile.
33 Mitondo yamumusenge nawa yitwenga jingunda kumeso aYehova,Mwomwo ali nakwiza* nakusopesa vaka-mavu.
34 Musakwililenunga Yehova, mwomwo apwa wamwaza.+Zangi yenyi yakwilila kuyatwama haya myaka yosena.+
35 Ambenu ngwenu, ‘Ove Kalunga muka-kutulwila, tulwile,+Tukungulule kufuma kumafuchi eka nakutupululula,Mangana twalisenga lijina lyove lyajila,+Tulisambenga hakukwalisa.+
36 Yehova Kalunga kaIsalele vamwalisengaHaya myaka yosena.’”*
Vatu vosena vambile ngwavo, “Amene!”* Kaha vamwalishile Yehova.
37 Kufumaho, Ndavichi asezele Asafwe+ navandumbwenyi kuze kuchikasha chalushiko lwaYehova mangana vazachilenga kuze kuChikasha+ lwola lwosena. Omu mukiko valingilenga hakumbi hakumbi.+
38 Ovete-etome navandumbwenyi 68, naOvete-etome mwanaYelutune, naHosa vakiko vapwile vaka-kulama kuvikolo.
39 Kaha kapilishitu Zatoke+ navapilishitu veka vapwile kutavanaku yaYehova hachihela chakulunduka kuNgiveyone,+
40 mangana vahanenga wana wakulumba kuli Yehova halijiko lyakulumbila chimene nachingoloshi, nakulinga nawa vyuma vyosena vize vasoneka muJishimbi jaYehova jize ahanyine vaIsalele.+
41 Vapwile hamwe naHemane, naYelutune,+ namalunga veka vasakwile halijina halijina mangana vasakwililenga Yehova+ mwomwo “zangi yenyi yakwilila kuyatwama haya myaka yosena.”+
42 Vapwile nawa hamwe naHemane+ naYelutune mangana vembenganga jineta, najingunga, navisaji vyakwimba myaso yaKalunga wamuchano. Kaha vana vaYelutune+ vapwilenga hachikolo.
43 Jino vatu vosena vayile kujizuvo javo, Ndavichi nawa ayile nakukisula tanga yenyi.
Kwinyikila Chamwishi
^ Hepe., “vanukenga.”
^ Chipwe pamo, “Hanjikenu.”
^ Chipwe “Enu vana.” Hepe., “Enu mbuto.”
^ Hepe., “lizu lize ahanjikile.”
^ Chipwe “Ulemu.”
^ Chipwe pamo, “mwomwo yaluvaji lwakujila chenyi.”
^ Chipwe “Lemesenu.”
^ Chipwe “kuwanyikisako.”
^ Chipwe “neza.”
^ Chipwe “Kufuma kumyaka yosena nakutwala kumyaka yosena.”
^ Chipwe “Chipwenga vene ngocho.”
