Mijimbu 1 17:1-27
17 Omu Ndavichi atwaminenga jino kanawa muzuvo* yenyi, ambile kuli kapolofweto Natane+ ngwenyi: “Tala, ami nguli nakutwama muzuvo yakutunga namishitale,+ oloze chikasha chalushiko lwaYehova chili nakutwama mumbalaka.”+
2 Kaha Natane ambile kuli Ndavichi ngwenyi: “Linga vyeshovyo vili kumuchima wove, mwomwo Kalunga wamuchano ali nayove.”
3 Haufuku vene uze, Kalunga ahanjikile kuli Natane ngwenyi:
4 “Yakonga ulweze ngamba yami Ndavichi ngwove, ‘Yehova nambe ngwenyi: “Keshi yove naungutungila zuvo ngutwamengamoko.+
5 Ami kanda ngutwamengaho lyehi muzuvo kufuma vene halikumbi ngwalowele vaIsalele muEjipitu palanga nakulikumbi lyalelo. Ngunanungwojokanga mujimbalaka namujitavanaku.*+
6 Myaka yoseneyi ngunatambukanga navaIsalele, kutala ngwalwezaho lyehi vaka-kuyula vaIsalele vaze ngwatongwele vafungenga vatu jami ngwami, ‘Ika munazenekela kungutungila zuvo yamishitale nyi?’”’
7 “Shikaho lweza ngamba yami Ndavichi ngwove, ‘Yehova wamayongomena nambe ngwenyi: “Ngwakufumishile kuulilo wavimuna, ngwakufumishile kumulimo wakulama mikoko mangana upwenga utwamina yavatu jami vaIsalele.+
8 Kaha nangupwanga nayove kweshokwo nauyanga.+ Nangunongesa nawa vaka-kole jove vosena vafume kumeso ove.+ Nangufumakanyisa lijina lyove nganomu afumakana majina avatu vavalemu vatwama hamavu.+
9 Nangusakwila vatu jami vaIsalele chihela mangana vatwamengamo. Navatwamangamo chakuzeneka kwivwa woma. Vatu vavapi kaveshi kukavayanjisa chekako nganomu vanapunga nakulinga kunyima,+
10 kufuma halikumbi ngwatongwele vaka-kuyula mangana vayulenga vatu jami vaIsalele.+ Nangufungulula vaka-kole jove vosena.+ Nangukulweza nawa ngwami, ‘Yehova mwakuhana chisaka chawangana.’
11 “‘“Omu naukatoka ngana mwavakakuluka jove, nangukatongola muka-tanga* yove, mwanove umwe havana vove+ mangana akakuswane. Kaha nangukazamisa wangana wenyi.+
12 Ikiye mwakangutungila zuvo.+ Nangukazamisa nawa litanda lyenyi haya myaka yosena.+
13 Nangukapwanga nguise, kaha ikiye mwakapwanga mwanami.+ Nangukamusolwelanga lika zangi yami yakwilila,+ keshi nge muze ngwalingile kuli uze apwileko shimbu kanda ove upwengako.+
14 Nangukamutongola akapwe twamina wazuvo yami nawangana wami haya myaka yosena.+ Litanda lyenyi nalikapwangako haya myaka yosena.”’”+
15 Natane alwezele Ndavichi mazu osenawa navyuma vyosena amwene muchakumumwenesa.
16 Ngocho Mwangana Ndavichi ejile, atwamine kumeso aYehova, ambile ngwenyi: “Ove Yehova Kalunga, ami yami iyaze? Chisaka chami kachatelemo kuchilingila vyuma vyosenevi unachilingilako.+
17 Ove Kalunga, kawakuminyine hakungulingila vyuma kanevi kahako, oloze unahanjika nawa vyuma naukalingila chisaka chayami ngamba yove kulutwe.+ Ove Yehova Kalunga, unangumono nge ngumutu uze vatela kuzezula lika.*
18 Vyuma vyeka mukaze nanguhanjika kuli ove ami ngamba yove Ndavichi haulemu ou unanguhane? Ove wangutachikiza kanawa ami ngamba yove.+
19 Ove Yehova, unalingi vyuma vyosenevi vyavinene hakusolola unene wove mwomwo yayami ngamba yove, kaha nawa mukiko mwaya muchima wove.+
20 Ove Yehova, kakweshi Kalunga weka apwa nge oveko,+ kaha nawa kakweshi Kalunga wekako shina yove kaha.+ Vyuma vyosena twevwa vyasolola hatoma chishina kanechi.
21 Kakweshi muyachi weka uze walifwana namuyachi wavatu jove vaIsaleleko.+ Ove Kalunga wamuchano, wavasokwele mangana vapwenga vatu jove.+ Wafumakanyishile lijina lyove hakulinga vyuma vyavinene, vyakwivwisa woma.+ Wahangile vaka-mafuchi eka kumeso avatu jove+ vaze wasokwele muEjipitu.
22 Walingishile vatu jove vaIsalele vapwenganga lika vatu jove haya myaka yosena.+ Ove Yehova, ove wapwile jino uKalunga kavo.+
23 Ove Yehova, lushiko unangushiki ami ngamba yove nachisaka chami lutesengamo haya myaka yosena. Kaha ulinga kweseka nomu unashiki.+
24 Lijina lyove lipwengangako lika, kaha nawa valizezulenga+ haya myaka yosena mangana vatu vahanjikenga ngwavo, ‘Yehova wamayongomena, Kalunga kaIsalele ikiye Kalunga kaIsalele.’ Chisaka chayami ngamba yove Ndavichi chizamenga lika kumeso ove.+
25 Mwomwo ove Kalunga kami, ove unangulweze ami ngamba yove vyuma unajinyi vyakunguhana chisaka chawangana. Echi chikiko chinangulingisa ngumike nakulomba kuli ove ngana.
26 Shikaho, ove Yehova, ove wapwa uKalunga wamuchano, kahami ngamba yove unangushiki vyumevi vyamwaza.
27 Ngocho fwila kukisula chisaka chayami ngamba yove, kaha chipwengangako lika haya myaka yosena. Mwomwo ove Yehova, ove unakisula chisaka chami, kaha nachipwanga chakukisula haya myaka yosena.”
Kwinyikila Chamwishi
^ Chipwe “munganda.”
^ Kulumbununa pamo, “kufuma hachihela chimwe vajikile mbalaka nakuya hachikwavo, nakufuma nawa hachihela chimwe vatwamine nakuya hachikwavo.”
^ Hepe., “mbuto.”
^ Chipwe “ngumutu uze vatela kuhana chihela chachinene.”
