Mijimbu 1 18:1-17
18 Kutwala muze, Ndavichi afungulwile vaFwilishite. Kaha atambwile nganda yaNgate+ najimbongi jajingilikileko jize japwile mumavoko avaFwilishite.+
2 Afungulwile nawa Mowave,+ ngocho vaMowave vapwile jino vangamba jaNdavichi, kaha vamunehelelenga milambu.+
3 Ndavichi afungulwile nawa Hatatezele+ mwangana waZova+ kwakamwihi naHamate+ omu Hatatezele apwile nakuya nakuzamisa cheka wangana wenyi kuKalwiji Yufwalate.+
4 Ndavichi amutambwile matemba 1,000, navaka-kutambukila hatuvalu 7,000, namaswalale vakutambuka hamavu 20,000.+ Kufumaho atengwile tuvalu vakumatemba vosena, oloze asezeleho kaha tuvalu 100.+
5 Omu vaSulya vakuNdamashiku vejile nakukafwa Hatatezele mwangana waZova, Ndavichi ajihile vaSulya 22,000.+
6 Kufumaho, Ndavichi ahakile maswalale jenyi muNdamashiku, muSulya. Ngocho vaSulya vapwile jino vangamba jaNdavichi, kaha vamunehelelenga milambu. Yehova akafwilenga Ndavichi afungulule* kweshokwo ayilenga.+
7 Ndavichi atambwile nawa jikepwe jamujingulule jaulu kuvangamba jaHatatezele, kaha ayile najo kuYelusalema.
8 Mwangana Ndavichi atambwile nawa unengu wauvulu chikuma munganda yaChivihate naKune, jize japwile jinganda jaHatatezele. Solomone ambachile unengu kana, autengele Limbashiya,+ najipanda, navinoma.+
9 Omu Tou Mwangana waHamate evwile ngwavo Ndavichi nafungulula maswalale jaHatatezele+ Mwangana waZova+ vosena,
10 atumine mwanenyi Hatolame ayenga kuli Mwangana Ndavichi mangana akamumeneke nakumusakwilila hakulwa jita naHatatezele nakumufungulula. (Mwomwo Hatatezele alwilenga chikuma jita naTou). Amutwalilile vyuma vyakulisezaseza vyaulu, navyevi vyapalata, navyevi vyaunengu.
11 Mwangana Ndavichi ajilikile vyuma vyosenevi kupwa vyaYehova+ nge omu ajilikile palata naulu atambwile kuli vaka-mafuchi eka vosena, kuli vaSulya, navaMowave, navaAmone,+ navaFwilishite,+ navaAmaleke.+
12 Avishai+ mwanaZeluwiya+ ajihile vaEtome 18,000 muChinema chaMungwa.+
13 Avishai ahakile maswalale muEtome. Kaha vaEtome vosena vapwile jino vangamba jaNdavichi.+ Yehova akafwilenga Ndavichi afungulule* kweshokwo ayilenga.+
14 Ndavichi ayulilenga vaIsalele vosena.+ Ayulilenga vatu vosena mwachiyulo, mwakwoloka.+
15 Yowave mwanaZeluwiya ikiye apwile kapitau kamaswalale.+ Yehoshafwate+ mwanaAhilute ikiye apwile muka-kulama mijimbu yawangana.
16 Zatoke mwanaAhituve naAhimeleke mwanaAviyatale vakiko vapwile vapilishitu, kaha Shavasha ikiye apwile muka-kusoneka.
17 Mbenaya mwanaYehoyata ikiye apwile mwata wavaKelete+ navaPelete.+ Kaha vana vaNdavichi vamalunga vakiko vapwile vangambela.
