Mijimbu 1 19:1-19
19 Kutwala muze, Nahashe mwangana wavaAmone afwile, kaha mwanenyi amuswanyine.+
2 Jino Ndavichi alyambile ngwenyi: “Nangusolwela Hanune mwanaNahashe zangi yakwilila+ mwomwo ise angusolwelele zangi yakwilila.” Ngocho Ndavichi atumine valuwa vayenga nakuvendejeka Hanune hakufwisa ise. Oloze omu vangamba jaNdavichi vahetele mulifuchi lyavaAmone+ mangana vavendejeke Hanune,
3 vilolo javaAmone vambile kuli Hanune ngwavo: “Ove unashinganyeka ngwove Ndavichi ali nakusolwela iso kavumbi hakukutumina vaka-kukuvendejeka nyi? Ove kawatachikijile ngwove Ndavichi natumu vangamba jenyi kuli ove vakekese lifuchi, nakulisondwesa mangana valinongeseko nyi?”
4 Ngocho Hanune akwachile vaze vangamba jaNdavichi, avatewile wevu.+ Atetele nawa uvwalo wavo hakachi, wasalile kaha vipinji vyakukumina hamatako. Kufumaho avahangile vayenga.
5 Omu Ndavichi evwile mujimbu kana, hahaze vene atumine vatu vakikilile vaze vangamba jenyi, mwomwo vavevwishile chikuma sonyi. Mwangana avalwezele ngwenyi: “Twamenu kuYeliko+ palanga nomu nausoka wevu wenu numba jino mwizenga kuno.”
6 Kutwala muze, vaAmone vamwene ngwavo Ndavichi navahungu. Ngocho Hanune navaAmone vahanyine vatu jitalende* 1,000 japalata vayenga kuMesopotamya,* nakuAlame-maka, nakuZova+ mangana vakakumune matemba nakukamba vaka-kutambukila hatuvalu.
7 Ngocho vakakumwine matemba 32,000 nakukamba Mwangana waMaka navatu jenyi. Kaha vejile nakutunga chilombo chavo kwakamwihi naMeteva.+ VaAmone navakiko valovokele mujinganda javo, valikungulwile nakuya kujita.
8 Omu Ndavichi evwile mujimbu kana, atumine Yowave+ nalizavu lyamaswalale lyosena, kuhakilako navatu jenyi vangolo vaka-kwasa jita.+
9 Jino vaAmone valitanjikile mumazavu akulongesa kanawa kuchikolo changanda, kaha vamyangana vaze vejile vapwile uka wavo muchipapa.
10 Omu Yowave amwene ngwenyi maswalale vali nakwiza kulutwe nakunyima mangana vamulukuke, asakwile maswalale vamwe vangolo chikuma muIsalele, kaha avatanjikile mumazavu akulongesa kanawa mangana valihumangane namaswalale vavaSulya.+
11 Kaha malunga vaze vasalileho avahanyine kuli* ndumbwenyi Avishai+ avatanjike mumazavu akulongesa kanawa mangana valihumangane navaAmone.
12 Kufumaho ambile ngwenyi: “Kachi nge maswalale vavaSulya+ navanguhambakana ngolo, kaha mwizenga mungupululule. Oloze kachi nge vaAmone navamihambakana ngolo, kahami nangwiza ngumipululule.
13 Twatela kujikiza nakumika+ mangana tuyovole vatu jetu najinganda jaKalunga ketu. Yehova mwalinga vyuma vize mwamona ngwenyi vyamwaza.”
14 Jino Yowave navatu jenyi vapandamine kwakamwihi namaswalale vavaSulya mangana valwenga jita, kaha maswalale vavaSulya vachinyine.+
15 Omu vaAmone vamwene maswalale vavaSulya vanachinyi, navakiko vachinyine Avishai ndumbwaYowave, kaha vengilile munganda. Kufumaho Yowave akindulukile kuYelusalema.
16 Omu maswalale vavaSulya vamwene ngwavo vanavafungulula kuli vaIsalele, vatumine valuwa vakasake maswalale vavaSulya vaze vapwile kuKalwiji.*+ Vaze maswalale vejile, vavatwaminyinyine kuli Shofwake kapitau kamaswalale jaHatatezele.+
17 Omu Ndavichi vamulwezele mujimbu kana, hahaze vene akungulwile vaIsalele vosena. Vazaukile Yotau, kaha valitanjikile mumazavu akulongesa kanawa mangana valwenga navo jita. Maswalale vavaSulya valwile jita naNdavichi navatu jenyi vaze valitanjikile mumazavu akulongesa kanawa.+
18 Oloze maswalale vavaSulya vachinyine vaIsalele. Shikaho Ndavichi ajihile vaSulya vaka-kutambukisa matemba ajita 7,000, namaswalale vakutambuka hamavu 40,000. Ajihile nawa Shofwake kapitau kamaswalale javo.
19 Omu vangamba jaHatatezele vamwene ngwavo vanavafungulula kuli vaIsalele,+ hahaze vene valikashile chivwasano naNdavichi chakutwamanga mukuunda, kaha vavayulilenga jino kuli Ndavichi.+ Ngocho vaSulya kavasakile kukafwa cheka vaAmoneko.
Kwinyikila Chamwishi
^ Talende yimwe yapwile jikilongalamu 34.2. Tala Chihande B14.
^ Hepe., “kuAlame-nahalaime.”
^ Hepe., “avahanyine mumavoko.”
^ Ikiye Yufwalate.
