Mijimbu 1 21:1-30
21 Jino Satana* emanyinyine vaIsalele nakole, kaha azondwele Ndavichi alave vaIsalele.+
2 Ngocho Ndavichi ambile kuli Yowave+ navatwamina javatu ngwenyi: “Yenunga mulave vaIsalele kufuma kuMbele-sheva swi nakuNdane.+ Kufumaho, mwizenga nakungulweza kuvula chavo mangana ngutachikize.”
3 Oloze Yowave ambile ngwenyi: “Yehova avulise vatu jenyi mapapa 100. Ove mwata wami mwangana, vaIsalele vosena vapwa lyehi hivangamba jove. Jino uli nakusakila ika kulava vatu? Ikaze nausaka kunehela vaIsalele mulonga?”
4 Oloze mazu amwangana ahonesele Yowave, ngocho Yowave ayile, ahichile mulifuchi lyosena. Kutwala muze, akindulukile kuYelusalema.+
5 Kufumaho, Yowave alwezele Ndavichi kuvula chavaIsalele vaze asonekele. Malunga vavaIsalele vaze vakwachilenga jipoko jamikwale vapwile 1,100,000, kaha malunga vavaYuta vaze vakwachilenga jipoko jamikwale vapwile 470,000.+
6 Oloze Yowave+ kasonekele vaLevi navaMbenjamineko,+ mwomwo ahungile lushimbi luze ahanyine mwangana.
7 Jino Kalunga wamuchano evwile kupihya chikuma havyuma alingile Ndavichi, ngocho azangamishile vaIsalele.
8 Kaha Ndavichi ambile kuli Kalunga wamuchano ngwenyi: “Ngunalingi shili+ yayinene hachumechi. Shikaho, ngukonekele hamulonga ngunalingi ami ngamba yove,+ mwomwo ngunalingi vyuma vyauleya.”+
9 Yehova ahanjikile kuli Ngate+ uze apwilenga mutu waNdavichi muka-kumona vyakumwenesa ngwenyi:
10 “Yako ulweze Ndavichi ngwove, ‘Yehova nambe ngwenyi: “Ngunakuhane vyuma vitatu usakuleho. Sakulaho chimwe chize nangukunehela.”’”
11 Ngocho Ngate ayile kuli Ndavichi, amulwezele ngwenyi: “Yehova nambe ngwenyi, ‘Sakulaho chuma chimwe chize nangukunehela.
12 Nausaka mulifuchi lyove mupwenga zala yakalombolombo+ hamyaka yitatu tahi, nyi nausaka vaka-kole jove vakuhangasane hatukweji vatatu nakukunongesa napoko yamukwale tahi,+ nyi nausaka mulifuchi lyove muhite poko yamukwale yaYehova, kulumbununa musongo wachihita hamakumbi atatu,+ kaha nawa kangelo kaYehova anongese+ vatu vosena mungalila yavaIsalele tahi?’ Hunanana kanawa havyuma kana nakusakulaho chimwe chize nanguya nakulweza Ou nangutumu.”
13 Jino Ndavichi ambile kuli Ngate ngwenyi: “Chuma kana chinangukaluhwila chikuma. Nachiwaha Yehova angujihe, mwomwo atwama nakeke chikuma.+ Kanda navangujiha kuvatuko.”+
14 Kufumaho, Yehova anehele musongo wachihita+ hali vaIsalele, kaha vatu 70,000 vafwile.+
15 Kalunga wamuchano atumine nawa kangelo anongese Yelusalema. Omu Yehova amwene uze kangelo ali nakusaka kunongesa Yelusalema, alumwine vishinganyeka vyenyi vyakusaka kuyinongesa.+ Ambile kuli uze kangelo apwile nakunongesa vatu ngwenyi: “Kunahu, litwamine!”+ Uze kangelo kaYehova apwile kwakamwihi nachizungwilo chaOlonane+ kaYevuse.+
16 Omu Ndavichi andwile meso enyi, amwene kangelo kaYehova nemana muutangatanga oku nolwela poko yamukwale+ haYelusalema. Ngocho hahaze vene, Ndavichi navakulwane vaze vavwalile vikeleyi+ vafukamine chameso hamavu.+
17 Jino Ndavichi ambile kuli Kalunga wamuchano ngwenyi: “Ami yami ngwakambanga vatu valave vatu. Ngocho ami yami ngunalingi shili, kaha yami nawa ngunahengesa.+ Nyi ava mikoko vanalingi ika? Ove Yehova Kalunga kami, nguzangamise ami navaze vakuzuvo yatata. Kanda nauneha ou musongo wachihita hali vatu joveko.”+
18 Kufumaho, kangelo kaYehova alwezele Ngate+ ayenga kuli Ndavichi akamulweze mangana ayenga nakutungila Yehova lijiko lyakulumbila hachizungwilo chaOlonane kaYevuse.+
19 Ngocho Ndavichi akandukile nakuya kweseka namazu amulwezele Ngate aze ahanjikile mulijina lyaYehova.
20 Jino Olonane atalile kunyima, kaha amwene kangelo. Ngocho vana venyi vawana vaze apwile navo vaswamine. Halwola kanelu, Olonane apwile nakuzungula tiliku.
21 Omu Ndavichi ejile kuli ikiye, Olonane andwile meso, kaha amumwene. Hahaze vene Olonane afumine kuze kuchizungwilo, afukamine chameso hamavu kuli Ndavichi.
22 Ndavichi ambile kuli Olonane ngwenyi: “Ngulanjise* chihela chove chize chili nachizungwilo ngutungileho Yehova lijiko lyakulumbila mangana musongo wachihita uze uneza hali vatu ukume.+ Ngulanjisecho, nangukuhana ndando yosena naungutomena.”
23 Oloze Olonane ambile kuli Ndavichi ngwenyi: “Ove mwata wami mwangana, chimbate tuhu chakuzeneka ndando mangana ulingileho vyeshovyo unasake.* Waha nawa vangombe vapwenga wana wakulumba. Mbata nachileyi chakuzungwisa+ mangana utenge jikunyi. Mbata nawa tiliku yipwenga wana wamanona. Vyosena ngunakuhanevyo.”
24 Oloze Mwangana Ndavichi ambile kuli Olonane ngwenyi: “Nduma, ngwatela kuchilanda nandando naungutomena, mwomwo kangweshi kuhasa kukutambula chuma chove nakuchihana kuli Yehova chipwe kulumba vimuna vakuvatula vawana wakanyomboko.”+
25 Ngocho Ndavichi alanjile chize chihela kuli Olonane najishekele* jaulu 600.
26 Kufumaho, Ndavichi atungilile Yehova lijiko lyakulumbila+ haze hachizungwilo, kaha alumbile vimuna vakuvatula nakuhana nawa mawana akusolola kuunda. Asanyikile Yehova, kaha amukumbulwile hakutuma kakahya+ kufuma mwilu kaze kejile halijiko lyakulumbila wana wakulumba.
27 Ngocho Yehova alwezele uze kangelo+ akindulwise poko yenyi yamukwale muchindalo chayo.
28 Omu Ndavichi amwene ngwenyi Yehova nakumbulula kulomba chenyi kuze kuchizungwilo chaOlonane kaYevuse, atwalileho lika kuhana mawana kuze.
29 Halwola kana tavanaku yaYehova yize atungile Mose mupambo, nalijiko lyakulumbila wana wakulumba vyapwile kuNgiveyone+ hachihela chakulunduka.
30 Oloze Ndavichi kahashile kuya kuze nakwihula Kalungako mwomwo evwile woma wapoko yamukwale yakangelo kaYehova.
Kwinyikila Chamwishi
^ Chipwe pamo, “muka-kulikanga.”
^ Hepe., “Nguhane.”
^ Hepe., “unamono ngwove vyamwaza.”
^ Shekele yimwe yapwile jingalamu 11.4. Tala Chihande B14.
