Mijimbu 1 22:1-19
22 Jino Ndavichi ambile ngwenyi: “Hano hakiko nahakapwila zuvo yaYehova Kalunga wamuchano nalijiko lyavaIsalele lyakulumbila wana wakulumba.”+
2 Kufumaho, Ndavichi alwezele vatu vakungulule vamwiza+ vaze vatwaminenga mulifuchi lyaIsalele, kaha avahanyine mulimo wakusonga malolwa akutungisa zuvo yaKalunga wamuchano.+
3 Ndavichi akungulwile nawa fwelu yayivulu yakufula jimbambo jamapito akuvikolo navikungo vyakunungisa mapito. Akungulwile nawa unengu wauvulu chikuma, kaha vahonene nakuupezalisa.+
4 Akungulwile nawa maliva amishitale+ amavulu mwomwo vatu vakuShitone+ nakuTule+ vamunehelele maliva amishitale amavulu chikuma.
5 Jino Ndavichi ambile ngwenyi: “Mwanami Solomone achili kanyike, kaha nawa keshi nachinyingiko,*+ oloze zuvo eyi navamutungila Yehova nayipwa yaulangaji chikuma+ mangana fuma yayo nakuwaha chayo+ vihete kumafuchi osena.+ Ngocho nangumulongesela chimweza vyuma vyakutungisa vyosena.” Shikaho Ndavichi alongesele vyuma vyakutungisa vyavivulu chikuma shimbu kanda afwenga.
6 Kufumaho, asanyikile mwanenyi Solomone, amulwezele atunge zuvo yaYehova Kalunga kaIsalele.
7 Ndavichi alwezele mwanenyi Solomone ngwenyi: “Ami ngwafwililile chikuma kutunga zuvo yize navavulukilanga lijina lyaYehova Kalunga kami.+
8 Oloze Yehova ahanjikile kuli ami ngwenyi, ‘Unamwange manyinga amavulu chikuma, kaha nawa unalu jijita jajinene. Shikaho kaweshi kutunga zuvo yize navavulukilanga lijina lyamiko,+ mwomwo unamwange manyinga amavulu chikuma hamavu kumeso ami.
9 Tala! Ove naukasema mwana walunga+ uze mwakapwanga wakuunda, kaha nangukamulingisa akatwame mukuunda chakuzeneka kumuzungisa kuli vaka-kole jenyi vosena vaze navakamujingilika.+ Lijina lyenyi mwakapwa ikiye Solomone,*+ kaha hamakumbi enyi vaIsalele navakatwamanga mukuunda, kumatwitwi keke.+
10 Ikiye mwakatunga zuvo yize navakavulukila lijina lyami.+ Mwakapwanga mwanami, kahami nangukapwanga nguise.+ Nangukazamisa litanda lyawangana wenyi mangana akayulenga vaIsalele haya myaka yosena.’+
11 “Shikaho ove mwanami, Yehova apwenga nayove. Ufukilenga mangana utunge zuvo yaYehova Kalunga kove, nge omu ahanjikile kutalisa kuli ove.+
12 Omu Yehova mwakutongola uyule vaIsalele, akukafwe upwenga uwakuzangama nakunangakana+ mangana ulamenga jishimbi jaYehova Kalunga kove.+
13 Kachi nge naukavangizanga jindongi+ josena namazu akuyula osena aze Yehova alwezele Mose kuhana vaIsalele,+ kaha naufukila. Umika, jikiza. Kanda nawivwa woma chipwe kulizuzukilako.+
14 Tala! Ami ngunayandangila hakukungulula jitalende jaulu 100,000, najitalende* japalata 1,000,000, naunengu wauvulu chikuma nafwelu yayivulu chikuma+ vize navahona kupezalisa mangana vatungise zuvo yaYehova. Ngunakungulula nawa maliva namalolwa.+ Ove nawa ukahakileho.
15 Uli nawa navaka-kuzata vavavulu, vaka-kusonga malolwa, navaka-kwola malolwa,+ navaka-kusonga maliva, navakuluwa vaka-kuzata milimo yakulisezaseza.+
16 Ulu, napalata, naunengu, nafwelu vinapu vyavivulu chikuma.+ Shikaho yakonga uputuke kuzata mulimo. Yehova apwenga nayove.”+
17 Kufumaho, Ndavichi alwezele vilolo vavaIsalele vosena vakafwe mwanenyi Solomone. Avambile ngwenyi:
18 “Yehova Kalunga kenu ali nayenu, kaha nawa namilingisa mutwame mukuunda chakuzeneka kumizungisa kuli vaka-kole jenu vaze vanamijingilika. Vatu vamulifuchi vosena anguhanyinevo mumavoko ami, kaha lifuchi lyosena vanalifungulula kumeso aYehova nakumeso avatu jenyi.
19 Shikaho, fwilenu kutondatonda Yehova Kalunga kenu+ namichima yenu yosena namyono* yenu yosena. Putukenu kutunga chihela chajila chaYehova Kalunga wamuchano+ mangana munehe chikasha chalushiko lwaYehova navinoma vyajila vyaKalunga wamuchano+ muzuvo eyi namutunga, eyi navavulukilanga lijina lyaYehova.”+
Kwinyikila Chamwishi
^ Chipwe “kaha nawa wamuvwovu.”
^ Lijina kana lyafuma kulizu lyachiHepeleu lize lyalumbununa “Kuunda.”
^ Talende yimwe yapwile jikilongalamu 34.2. Tala Chihande B14.
^ Tala Mukana waMazu.
