Mijimbu 1 24:1-31
24 Jino awa akiko mazavu avaka-tanga yaAlone: Vana vaAlone vapwile Natave, naAvihu,+ naEleyaza, naItamale.+
2 Oloze Natave naAvihu valivangile kufwa shimbu kanda sevo afwenga.+ Vafwile chakuzeneka vana. Eleyaza+ naItamale vatwalileho lika kuzata mulimo waupilishitu.
3 Kaha Ndavichi naZatoke+ mwanaEleyaza, naAhimeleke mwanaItamale vahandunwine ava vaka-tanga yaAlone mumazavu mangana vazatenga milimo yavo.
4 Hakuwana nge vana vaEleyaza vapwile navatwamina vavavulu kuhambakana vana vaItamale, ngocho vatwamina kana vavahandunwine ngana: Vana vaEleyaza vapwile navatwamina 16 vakujizuvo javakakuluka javo, kaha vana vaItamale vapwile navatwamina 8 vakujizuvo javakakuluka javo.
5 Hakuwana nge kuli vana vaEleyaza nakuli vana vaItamale kwosena kwapwile vatwamina vakuchihela chajila navatwamina vaze vazachililenga Kalunga wamuchano, ngocho vatwamina vahamazavu kana vavahandunwine cheka kuzachisa tutachikijilo.+
6 Kufumaho Shemaya mwanaNetanele uze apwile muka-kusoneka wavaLevi asonekele majina avo kumeso amwangana, navilolo, nakapilishitu Zatoke,+ naAhimeleke+ mwanaAviyatale,+ navatwamina vakujizuvo javakakuluka javapilishitu navaLevi. Kuli Eleyaza vasakwileko zuvo yimwe yavakakuluka javo, kaha kuli Itamale nawa vasakwileko zuvo yimwe yavakakuluka javo.
7 Katachikijilo kakulivanga kaholokelele hali Yehoyalive, kaha kamuchivali kaholokelele hali Yetaya,
8 kamuchitatu kaholokelele hali Halime, kamuchiwana kaholokelele hali Seyolime,
9 kamuchitanu kaholokelele hali Malakiya, kakusokesa 6 kaholokelele hali Miyamine,
10 kakusokesa 7 kaholokelele hali Hakoze, kakusokesa 8 kaholokelele hali Aviya,+
11 kakusokesa 9 kaholokelele hali Yeshuwa, kakusokesa 10 kaholokelele hali Shekanyiya,
12 kakusokesa 11 kaholokelele hali Elyashive, kakusokesa 12 kaholokelele hali Yakime,
13 kakusokesa 13 kaholokelele hali Hupa, kakusokesa 14 kaholokelele hali Yesheveyave,
14 kakusokesa 15 kaholokelele hali Mbilinga, kakusokesa 16 kaholokelele hali Imele,
15 kakusokesa 17 kaholokelele hali Hejile, kakusokesa 18 kaholokelele hali Hapizeze,
16 kakusokesa 19 kaholokelele hali Petahiya, kakusokesa 20 kaholokelele hali Yahezekele,
17 kakusokesa 21 kaholokelele hali Yakine, kakusokesa 22 kaholokelele hali Ngamule,
18 kakusokesa 23 kaholokelele hali Ndelaya, kakusokesa 24 kaholokelele hali Majiya.
19 Omu mukiko vavahandunwine mangana vazatenga milimo yavo+ omu vengililenga muzuvo yaYehova kweseka najindongi avahanyine kakuluka yavo Alone jize amuhanyine Yehova Kalunga kaIsalele.
20 Ava vakiko vaLevi vaze valitulileho: Kuli vana vaAmalame+ vamalunga kwapwile Shuvayele.+ Kuli vana vaShuvayele vamalunga kwapwile Yeteya.
21 Kuli vana vaLehaviya+ vamalunga kwapwile Ishiya uze apwile twamina.
22 Kutanga yavaIzahale kwapwile Shelomote.+ Kuli vana vaShelomote vamalunga kwapwile Yahate.
23 Kuli vana vaHevelone vamalunga kwapwile Yeliya+ uze apwile twamina, wamuchivali apwile Amaliya, wamuchitatu apwile Yahajele, wamuchiwana apwile Yekameyame.
24 Kuli vana vaUjiyele vamalunga kwapwile Mika. Kuli vana vaMika vamalunga kwapwile Shamile.
25 NdumbwaMika apwile Ishiya. Kaha kuli vana vaIshiya vamalunga kwapwile Zekaliya.
26 Vana vaMelali+ vamalunga vapwile Mali naMushi. Kuli vana vaYajiya vamalunga kwapwile Mbeno.
27 Ava vakiko vapwile vana vaMelali vamalunga: Kuli Yajiya kwapwile Mbeno, naShohame, naZakule, naIvili.
28 Kuli Mali kwapwile Eleyaza. Eleyaza kapwile navana vamalungako.+
29 Kuli vana vaKishe vamalunga kwapwile Yelamele.
30 Vana vaMushi vamalunga vapwile Mali, naEtele, naYelimote.
Ava vakiko vapwile vana vaLevi vamalunga kweseka najizuvo javakakuluka javo.
31 Navakiko nawa vazachishile tutachikijilo+ nge muze valingile vandumbwavo vana vaAlone kumeso aMwangana Ndavichi, naZatoke, naAhimeleke, navatwamina vakujizuvo javakakuluka javapilishitu navaLevi. Twamina hitwamina wamukulwane wakujizuvo javakakuluka javo atesekele hamwe natwamina hitwamina wakanyike wakujizuvo javakakuluka javo.