Mijimbu 1 26:1-32
26 Awa akiko mazavu avaka-kulama kuvikolo:+ Kuli vaKola kwafumine Meshelemiya+ mwanaKole wakuli vana vaAsafwe.
2 Kahava vakiko vana vaMeshelemiya vamalunga: Watwatwa apwile Zekaliya, wamuchivali apwile Yechayele, wamuchitatu apwile Zevachiya, wamuchiwana apwile Yatanyele,
3 wamuchitanu apwile Elame, wakusokesa 6 apwile Yehohanane, wakusokesa 7 apwile Eliyehowenai.
4 Ava vakiko vana vaOvete-etome vamalunga: Watwatwa apwile Shemaya, wamuchivali apwile Yehozavate, wamuchitatu apwile Yowa, wamuchiwana apwile Sakale, wamuchitanu apwile Netanele,
5 wakusokesa 6 apwile Amiyele, wakusokesa 7 apwile Isakale, wakusokesa 8 apwile Peuletai. Kalunga akiswile Ovete-etome hakumuhana vana vosenava.
6 Vana vamalunga vaze asemene mwanenyi Shemaya vapwile vaka-kuyula kuzuvo yakakuluka yavo mwomwo vapwile vindume, kaha nawa vingazule jamalunga.
7 Ava vakiko vapwile vana vaShemaya vamalunga: Otonyi, naLefwayele, naOvete, naElezavate. Elihu naSemakiya, vandumbwaElezavate navakiko vapwile vingazule jamalunga.
8 Vosenava vapwile vana vaOvete-etome vamalunga. Malunga kana navana vavo navandumbwavo vapwile vingazule jamalunga vaze vatelemo kuzata milimo. Vosena vapwile 62.
9 Meshelemiya+ apwile navana vamalunga navandumbwenyi. Vapwile vingazule jamalunga 18.
10 Kaha Hosa wakutanga yaMelali apwile navana vamalunga. Mwanenyi Shimili ikiye apwile twamina. Numba tuhu kapwile twatwako, oloze ise amutongwele kupwa twamina.
11 Mwanenyi wamuchivali apwile Hilikiya, wamuchitatu apwile Tevaliya, wamuchiwana apwile Zekaliya. Vana vaHosa vamalunga navandumbwenyi vapwile 13.
12 Vatwamina vahamazavu awa avaka-kulama kuvikolo navandumbwavo vosena vapwile namilimo yavo vazachilenga. Vazachililenga kuzuvo yaYehova.
13 Shikaho vaze vavalemu navaze vamokomoko kweseka najizuvo javakakuluka javo vazachishile tutachikijilo+ hakulipangila vikolo.
14 Kaha katachikijilo kaShelemiya kaholokelele kumututuko. Vazachishile nawa tutachikijilo hali mwanenyi Zekaliya uze apwile lunga wakuzangama muka-kulweza mangana, kaha katachikijilo kenyi kaholokelele kunote.
15 Katachikijilo kaOvete-etome kaholokelele kusulo. Kaha vana venyi+ vavahanyine mulimo wakulama jizuvo jakutulikila vyuma.
16 Katachikijilo kaShupime naHosa+ kaholokelele kumulauko kwakamwihi naChikolo chaShalekete, kujila yakuya kumulundu. Lizavu limwe lyavaka-kulama lyalitalasanyine nalizavu likwavo.
17 Kumututuko kwapwile vaLevi 6, kaha kunote kwapwilenga vatu vawana hakumbi hakumbi. Kusulo kwapwilenga vawana hakumbi hakumbi. Kaha vaka-kulama jizuvo jakutulikila vyuma+ vapwilenga vavali vavali.
18 Kusenge yakumulauko kwapwilenga vaka-kulama. Kujila+ kwapwilenga vawana, kaha kusenge kwapwilenga vavali.
19 Awa akiko apwile mazavu avaka-kulama kuvikolo vakutanga yavaKola navaMelali.
20 Kuli vaLevi kwafumine Ahiya uze atalilenga vikumba vyamuzuvo yaKalunga wamuchano. Ikiye nawa atalilenga vikumba vize vajilikile.*+
21 Kaha kuli vana vaLatane vamalunga kwafumine Yehyeli.+ Vana kana vapwile vakutanga yavaNgeleshone vaze asemene Latane. Vapwile vatwamina vakujizuvo javakakuluka jaLatane kaNgeleshone.
22 Zetame nandumbwenyi Yowele vaze vapwile vana vaYehyeli vamalunga vakiko vatalilenga vikumba vyamuzuvo yaYehova.+
23 Kuli vaAmalame, navaIzahale, navaHevelone, navaUjiyele+
24 kwafumine Shevuwele mwanaNgeleshome, Ngeleshome mwanaMose. Shevuwele ikiye apwile twamina uze atalilenga jizuvo jakutulikila vyuma.
25 Vandumbwenyi vakutanga yaEliyeze+ vapwile Lehaviya+ mwanaEliyeze, naYeshaya, naYolame, naJikili, naShelomote.
26 Shelomote navandumbwenyi vakiko vatalilenga vikumba vyosena vize vajilikile+ kuli Mwangana Ndavichi,+ navatwamina vakujizuvo javakakuluka,+ natupitau twamakombakaji, natupitau twamakulukaji, natupitau twamaswalale.
27 Vyuma vize vambachilenga kujita+ navyuma vize vapupilenga+ vavijilikilenga mangana vavizachisenga kuzuvo yaYehova.
28 Vatalilenga nawa vyuma vize ajilikile Samwele uze apwile muka-kumona vyakulutwe,+ naSaulu mwanaKishe, naAvanele+ mwanaNele, naYowave+ mwanaZeluwiya.+ Vyeshovyo vajilikile vavitalilenga kuli Shelomite* navandumbwenyi.
29 Kuli vaIzahale+ kwafumine Kenanyiya navana venyi vamalunga vaze vahanyine milimo yakuweluka. Vapwile vakulwane navaka-kuyula+ vaIsalele.
30 Kuli vaHevelone+ kwafumine Hashaviya navandumbwenyi. Vapwile vingazule jamalunga 1,700 vaze vatwaminyinyinenga vaIsalele vakungalila yakumulauko waYotau. Vatwaminyinyinenga vaIsalele kumilimo yaYehova yosena nayeyi yamwangana.
31 Kuli vaHevelone kwafumine nawa Yeliya+ uze apwile twamina yavaHevelone kweseka nachisaka chazuvo yakakuluka yavo. Mumwaka wakusokesa 40 wachiyulo chaNdavichi,+ vatu jaNdavichi vatondeletondele vindume, vingazule jamalunga muli vaHevelone, kaha vavawanyine kuYazele+ kuNgileyate.
32 VandumbwaYeliya vapwile vingazule jamalunga 2,700 vaze vapwile vatwamina vakujizuvo javakakuluka javo. Shikaho Mwangana Ndavichi avahanyine mulimo wakutwaminyina vaLuvene, navaNgate, nachimbwa chamuyachi waManase muvyuma vyaKalunga wamuchano vyosena, navyevi vyamwangana.
Kwinyikila Chamwishi
^ Chipwe “vyuma vize vahanyine.”
^ Ou Shelomite ikiye uze vanavuluka muvesi 25 na 26 ngwavo Shelomote.
