Mijimbu 1 27:1-34
-
Vakulwane vaka-kuzachila mwangana (1-34)
27 Awa akiko mazavu avaIsalele amaswalale jamwangana. Hamazavu kana hapwile vatwamina vakujizuvo javakakuluka javo, natupitau twamakombakaji, natupitau twamakulukaji,+ navakulwane vaze vazachililenga mwangana+ hakuzakama mazavu kana. Awa mazavu alishishilenga kakweji hikakweji mumwaka, kaha halizavu hilizavu hapwile malunga 24,000.
2 Yashoveyame+ mwanaZavachele ikiye atwaminyinyinenga lizavu lyakulivanga lize lyazachilenga mukakweji wakulivanga. Halizavu lyenyi hapwile malunga 24,000.
3 Yashoveyame apwile wakuli vana vaPeleze,+ kaha ikiye apwile twamina watupitau twamazavu osena aze azachilenga mukakweji wakulivanga.
4 Ndotai+ kaAhowa+ ikiye atwaminyinyinenga lizavu lize lyazachilenga mukakweji wamuchivali, kaha Mikilote ikiye apwile kapitau. Halizavu lyenyi hapwile malunga 24,000.
5 Mbenaya+ mwanakapilishitu wamukulwane Yehoyata+ ikiye apwile kapitau kalizavu lyamuchitatu lize lyazachilenga mukakweji wamuchitatu. Halizavu lyenyi hapwile malunga 24,000.
6 Mbenaya apwile hali vaka-kwasa jita vangolo 30 kaha nawa ikiye apwile kapitau kavo. Mwanenyi Amizavate ikiye atwaminyinyinenga lizavu lyenyi.
7 Asahele+ ndumbwaYowave+ ikiye apwile kapitau kalizavu lyamuchiwana lize lyazachilenga mukakweji wamuchiwana, kaha mwanenyi Zevachiya ikiye apwile muhato wenyi. Halizavu lyenyi hapwile malunga 24,000.
8 Shamahute kaEzela ikiye apwile kapitau kalizavu lyamuchitanu lize lyazachilenga mukakweji wamuchitanu. Halizavu lyenyi hapwile malunga 24,000.
9 Ila+ mwanaIkeshe wakuTekowa+ ikiye apwile kapitau kalizavu lyakusokesa 6 lize lyazachilenga mukakweji wakusokesa 6. Halizavu lyenyi hapwile malunga 24,000.
10 Heleze+ wakuPelone uze apwile wakutanga yavaEfwalime ikiye apwile kapitau kalizavu lyakusokesa 7 lize lyazachilenga mukakweji wakusokesa 7. Halizavu lyenyi hapwile malunga 24,000.
11 Shivekai+ wakuHusha uze apwile wakutanga yavaZela+ ikiye apwile kapitau kalizavu lyakusokesa 8 lize lyazachilenga mukakweji wakusokesa 8. Halizavu lyenyi hapwile malunga 24,000.
12 Aviyezele+ wakuAnatote+ uze apwile wakutanga yavaMbenjamine ikiye apwile kapitau kalizavu lyakusokesa 9 lize lyazachilenga mukakweji wakusokesa 9. Halizavu lyenyi hapwile malunga 24,000.
13 Mahalai+ wakuNetofwa uze apwile wakutanga yavaZela+ ikiye apwile kapitau kalizavu lyakusokesa 10 lize lyazachilenga mukakweji wakusokesa 10. Halizavu lyenyi hapwile malunga 24,000.
14 Mbenaya+ wakuPilatone uze apwile wakuli vana vaEfwalime ikiye apwile kapitau kalizavu lyakusokesa 11 lize lyazachilenga mukakweji wakusokesa 11. Halizavu lyenyi hapwile malunga 24,000.
15 Heletai wakuNetofwa uze apwile wakutanga yaOtonyele ikiye apwile kapitau kalizavu lyakusokesa 12 lize lyazachilenga mukakweji wakusokesa 12. Halizavu lyenyi hapwile malunga 24,000.
16 Ava vakiko vapwile vatwamina jamiyachi yavaIsalele: Eliyeze mwanaJikili ikiye apwile twamina wavaLuvene. Shefwachiya mwanaMaka ikiye apwile twamina wavaShimeyone.
17 Hashaviya mwanaKemwele ikiye apwile twamina wavaLevi. Zatoke ikiye apwile twamina wavana vaAlone.
18 Elihu+ ndumbwaNdavichi ikiye apwile twamina wavaYuta. Omoli mwanaMikayele ikiye apwile twamina wavaIsakale.
19 Ishimaya mwanaOvachiya ikiye apwile twamina wavaZevulune. Yelimote mwanaAzalyele ikiye apwile twamina wavaNafwatale.
20 Hosheya mwanaAzajiya ikiye apwile twamina wavaEfwalime. Yowele mwanaPetaya ikiye apwile twamina wachimbwa chamuyachi waManase.
21 Ito mwanaZekaliya ikiye apwile twamina wachimbwa chamuyachi waManase kuNgileyate. Yashele mwanaAvanele+ ikiye apwile twamina wavaMbenjamine.
22 Azalele mwanaYelohame ikiye apwile twamina wavaNdane. Ava vakiko vapwile vilolo jamiyachi yavaIsalele.
23 Hakuwana nge Yehova ashikile ngwenyi mwakavulisa vaIsalele nge vatanganyika vamwilu,+ ngocho Ndavichi kalavile vaze vapwile namyaka yakusemuka 20 nakuneha mwishiko.
24 Yowave mwanaZeluwiya aputukile kulava vaIsalele, oloze kamanyishileko. Kalunga akwachilile vaIsalele utenu* mwomwo yachuma alingile Yowave chakulava vatu,+ ngocho kuvula chavo kavachisonekele mumijimbu yavyuma vyasolokele mumakumbi aMwangana Ndavichiko.
25 Azamavete mwanaAchele ikiye atalilenga vikumba vyamwangana.+ Yonatane mwanaUjiya ikiye atalilenga visete* vyamumande, namujinganda, namumembo, namutuposhi.
26 Ezeli mwanaKeluve ikiye atalilenga vaka-kulima mande.
27 Shimei wakuLama ikiye atalilenga mande amivinyo, kaha Zavachi wakuSefwame ikiye atalilenga mihako vahilenga yize vakamwinenga vinyo.
28 Mbale-hanane wakuNgetele ikiye atalilenga milive namisukumole+ yize yapwile kuShefwela.+ Yowashe ikiye atalilenga maji.
29 Shichilai wakuShalone+ ikiye atalilenga mautanga avangombe aze alilililenga kuShalone. Shafwate mwanaAtalai ikiye atalilenga mautanga avangombe aze alilililenga kuvinema.*
30 Ovile kaIshimele ikiye atalilenga vangamela. Yeteya wakuMelonote ikiye atalilenga vimbulu.*
31 Yajize kaHangale ikiye atalilenga utanga wamikoko. Vosenava vakiko vapwile tupitau vaze vatalilenga luheto lwaMwangana Ndavichi.
32 Yonatane+ mwanandumbwaNdavichi apwile lunga wakunangakana. Ikiye apwile muka-kulweza mangana, kaha nawa muka-kusoneka. Yehyele mwanaHakamonyi ikiye azakaminenga vana vamwangana.+
33 Ahitofwele+ ikiye apwile muka-kulweza mwangana mangana. Hushai+ kaAlake ikiye apwile sepa lyamwangana.
34 Yehoyata mwanaMbenaya+ naAviyatale+ vakiko vashishile Ahitofwele. Yowave+ ikiye apwile kapitau kamaswalale jamwangana.
Kwinyikila Chamwishi
^ Hepe., “Utenu wapwile hali vaIsalele.”
^ Chipwe “atalilenga muze mwakulamina vikumba.”
^ Chipwe “kuvyana.”
^ Hepe., “vimbulu vavihwevo.”
