Mijimbu 1 29:1-30
29 Jino Mwangana Ndavichi ambile kulizavu lyosena ngwenyi: “Mwanami Solomone ou vanasakula kuli Kalunga,+ achili kanyike, kaha nawa keshi nachinyingiko,*+ oloze mulimo unatoho. Mwomwo tembele* mwatunga keshi yamutuko, oloze yaYehova Kalunga.+
2 Ami ngunahundangana hakulongesa vyuma vyazuvo yaKalunga kami. Ngunalongesa ulu wakutengesa vyuma vyaulu, napalata yakutengesa vyuma vyapalata, naunengu wakutengesa vyuma vyaunengu, nafwelu yakutengesa vyuma vyafwelu,+ namaliva+ akusonga vyuma vyamaliva, namalolwa alunyishe, namalolwa akulamika nandaka, namalolwa aulombo wakulisezaseza, namalolwa andando yayinene akulisezaseza osena, namalolwa alambashite amavulu chikuma.
3 Hakuwana nawa nge ngunazange chikuma zuvo yaKalunga,+ ngocho nanguhana luheto lwami+ lwaulu napalata mangana valuzachise kuzuvo yaKalunga kami, kuhakila kuvyuma vyosena vize ngunalongesa lyehi vyazuvo yajila,
4 najitalende* jaulu wakufuma kuOfwile+ 3,000, najitalende japalata yakutomesa 7,000, mangana vavishile hajimbango jatupete twazuvo,
5 naulu wakutengesa vyuma vyaulu, napalata yakutengesa vyuma vyapalata, navyuma vyeka vyosena vize navatenga vitotombwe. Jino iya mwalisuula kuhana wana kuli Yehova+ likumbi lyalelo?”
6 Ngocho vilolo vakujizuvo javakakuluka, navilolo vamiyachi yavaIsalele, natupitau twamakombakaji, natupitau twamakulukaji,+ natupitau vaze vatalilenga milimo yamwangana+ valisuwile kuhana wana.
7 Vahanyine jitalende jaulu 5,000, najindalike* 10,000, najitalende japalata 10,000, najitalende jaunengu 18,000, najitalende jafwelu 100,000 mangana vavizachise kumulimo wazuvo yaKalunga wamuchano.
8 Weshowo apwile namalolwa andando yayinene awahanyine mangana vawahakile kuvikumba vyazuvo yaYehova vize atalilenga Yehyele+ kaNgeleshone.+
9 Vatu vawahililile hakuhana awa mawana akulisakila mwomwo vawahanyine kuli Yehova namichima yavo yosena.+ Mwangana Ndavichi naikiye awahililile chikuma.
10 Kufumaho, Ndavichi alishile Yehova kumeso alizavu lyosena. Ambile ngwenyi: “Ove Yehova Kalunga kasetu Isalele, vakwalisenga haya myaka yosena.*
11 Ove Yehova, unene,+ nangolo,+ naulangaji, naukelenga, naluvaji*+ vyapwa vyove. Vyuma vyosena vyamwilu navyevi vyahamavu vyapwa vyove.+ Ove Yehova,+ wangana wapwa wove. Ove wazezuka helu hakupwa umwata wavosena.
12 Luheto naupahu vyafuma kuli ove,+ kaha weji kuyulanga vyuma vyosena.+ Ukwechi ngolo chikuma,+ kaha livoko lyove linahase kutohwesa+ vatu vosena nakuvahana ngolo.+
13 Shikaho, Ove Kalunga ketu, natukusakwilila nakwalisa lijina lyove lyamwaza.
14 “Ami yami iyaze, vatu jami nawa vakiko veyaze numba tukuhane mawana awa akulisakila? Vyuma vyosena vyafuma kuli ove, ngocho tunakuhane vyuma vize vyafuma kulivoko lyove.
15 Etu tunapu nge tuvamwiza, tuvaka-kuzuzumana kumeso ove nganomu vapwilenga vakakuluka jetu vosena.+ Kuyoya chetu hano hamavu chinapu nge himuvwimbimbi+ kaha. Katweshi kushimbulako.
16 Ove Yehova Kalunga ketu, evi vikumba vyosena tunalongesa mangana tukutungile zuvo yize navavulukilanga lijina lyove lyajila vyafuma kulivoko lyove, kaha vyosena vyapwa vyove.
17 Ove Kalunga kami, ngunatachikiza ngwami ove weji kukekesanga michima,+ kaha weji kwivwilanga kuwaha vatu vakulonga.*+ Ngunalisuula kuhana vyuma vyosenevi mwomwo yakusungama chamuchima wami,* kaha ngunawahilila chikuma hakumona ava vatu jove vanalisuula kukuhana mawana akulisakila.
18 Ove Yehova Kalunga kavakakuluka jetu, Kalunga kaApalahama, naIsaka, naIsalele, kafwa vatu jove vatwaleho lika kupwa namichima yakulisuula haya myaka yosena. Vakafwe vahake michima yavo kuli ove.+
19 Kafwa mwanami Solomone alamenga jishimbi+ jove namazu ove akwanukisa, najindongi jove namuchima wenyi wosena.+ Mukafwe alingenga vyuma vyosenevi nakutunga tembele* eyi ngunalongesela vyuma.”+
20 Kufumaho, Ndavichi ambile kulizavu lyosena ngwenyi: “Alisenu jino Yehova Kalunga kenu.” Kaha lizavu lyosena lyalishile Yehova Kalunga kavakakuluka javo. Vafukamine chameso hamavu nakulifukula kuli Yehova nakuli mwangana.
21 Lichako vahanyine Yehova vimuna vakuvatula nakulumba nawa mawana akulumba+ kuli Yehova. Valumbile mavuvu javangombe vavakuji 1,000, navizamba javapembe 1,000, navana vamikoko vavizamba 1,000, namawana avinyo.+ Valumbilile vaIsalele vimuna vakuvatula vavavulu chikuma.+
22 Valile nakunwa nakuwahilila chikuma+ kumeso aYehova halikumbi lize. Vaswanyishile Solomone mwanaNdavichi kamuchivali hawangana, kaha vamuwavishile kumeso aYehova mangana apwenga twamina.+ Vawavishile nawa Zatoke apwenga kapilishitu.+
23 Solomone atwamine jino halitanda lyaYehova+ kupwa mwangana uze aswanyine ise Ndavichi. Afukililenga, kaha vaIsalele vosena vamwononokelenga.
24 Vilolo vosena,+ navaka-kwasa jita vangolo,+ navana vaMwangana Ndavichi+ vosena valiluwilenga kuli mwangana Solomone.
25 Yehova alingishile Solomone apwenga wamulemu chikuma kumeso avaIsalele vosena. Amuhanyine nawa ukelenga uze kanda vachipwengaho lyehi nawo vamyangana javaIsalele.+
26 Ndavichi mwanaYese ayulile vaIsalele vosena.
27 Ayulile vaIsalele hamyaka 40. Ayulile myaka 7+ muHevelone, kaha ayulile nawa muYelusalema hamyaka 33.+
28 Afwile muushinakaji,+ wakusuuluka namyaka* yayivulu ayoyele, naluheto, naulemu. Kaha mwanenyi Solomone amuswanyine hawangana.+
29 Mujimbu waMwangana Ndavichi wavyuma alingile kufuma kukuputuka swi nakumakumishilo watwama mumijimbu asonekele Samwele muka-kumona vyakulutwe, nakapolofweto Natane,+ naNgate+ muka-kumona vyakumwenesa.
30 Mumijimbu kana mwatwama nawa mijimbu yawangana wenyi yosena, navyuma vyangolo alingile, navyuma vyasolokele kuli ikiye, nakuli vaIsalele, nakumawangana avaka-mafuchi eka osena.
Kwinyikila Chamwishi
^ Chipwe “kaha nawa wamuvwovu.”
^ Chipwe “zuvo; nganda.”
^ Talende yimwe yapwile jikilongalamu 34.2. Tala Chihande B14.
^ Ndalike yapwile lumbongo lwaulu lwachichele lwavaPeleja. Tala Chihande B14.
^ Chipwe “kufuma kumyaka yosena nakutwala kumyaka yosena.”
^ Chipwe “naulemu.”
^ Chipwe “vakusungama.”
^ Chipwe “yamuchima wami wamwenemwene.”
^ Chipwe “zuvo; nganda.”
^ Hepe., “namakumbi.”
