Mijimbu 1 5:1-26
5 Luvene+ ikiye apwile mwanaIsalele watwatwa. Numba tuhu Luvene apwile twatwa, oloze utwatwa wenyi vauhanyine vana vaYosefwe+ mwanaIsalele, mwomwo asawile* kahela kaise.+ Ngocho kavamusonekele nge hitwatwa muchisaka chavoko.
2 Numba tuhu Yuta+ apwile nangolo kuhambakana vandumbwenyi vosena, kaha nawa kuli ikiye kukiko kwafumine uze mwakapwa twamina,+ oloze utwatwa vauhanyine Yosefwe.
3 Vana vaLuvene mwanaIsalele watwatwa vapwile Hanoke, naPalu, naHezelone, naKalami.+
4 MwanaYowele walunga apwile Shemaya, kaha Shemaya asemene Ngonge, Ngonge asemene Shimei,
5 Shimei asemene Mika, Mika asemene Leyaya, Leyaya asemene Mbale,
6 Mbale asemene Mbela uze vatwalile muufunge kuli Mwangana waAsulya Chilingate-pilinese.+ Mbela apwile mwata wavaLuvene.
7 Vandumbwenyi vaze vasonekele kweseka najitanga javo navisaka vyavo vapwile Yeyele uze apwile twamina, naZekaliya,
8 naMbela mwanaAzaze, Azaze mwanaShema, Shema mwanaYowele. Vatu vakutanga yaMbela vatwaminenga kuAlowele+ swi nakuNevo nakuheta kuMbale-meyone.+
9 Vatwaminenga nawa kumututuko swi nakumaputukilo apambo kuKalwiji Yufwalate,+ mwomwo vimuna javo vavulile chikuma mungalila yaNgileyate.+
10 Hamakumbi aSaulu, vatu kana valwile jita navaHangale, kaha vafungulwile vaHangale. Ngocho vatwaminenga mujimbalaka javaHangale mungalila yosena yakumututuko waNgileyate.
11 Jino vaka-tanga yaNgate vatwaminenga muMbashane swi nakuSaleka,+ kaha valihachile navaka-tanga yaLuvene.
12 Yowele ikiye apwile twamina, kaha hinamushisa Shafwame. Yanai naShafwate navakiko vapwile vatwamina muMbashane.
13 Vandumbwavo vakujizuvo javakakuluka javo vapwile Mikayele, naMeshulame, naSheva, naYolai, naYakane, naJiya, naEvele. Vosena vapwile 7.
14 Ava vakiko vapwile vana vaAvihayile, Avihayile mwanaHuli, Huli mwanaYalowa, Yalowa mwanaNgileyate, Ngileyate mwanaMikayele, Mikayele mwanaYeshishai, Yeshishai mwanaYato, Yato mwanaMbuze.
15 Ahi mwanaAvachele, Avachele mwanaNgunyi ikiye apwile twamina wakuzuvo yavakakuluka javo.
16 Vatu kana vatwaminenga muNgileyate,+ namuMbashane,+ namujimbongi jajingilikile kuMbashane, namumusenge waShalone swi nokwo wakakuminyinyine.
17 Vosena vavasonekele kweseka navisaka vyavo hamakumbi aYotame+ Mwangana wavaYuta nahamakumbi aYelovowame*+ Mwangana wavaIsalele.
18 VaLuvene, navaNgate, nachimbwa chamuyachi waManase vapwile namaswalale vangolo 44,760 vaze vambachilenga jikepwe, najipoko jamikwale, namata amanana. Maswalale kana vavanangwile kulwa jita.
19 Valwile jita navaHangale,+ naYetule, naNafwishe,+ naNotave.
20 Vavakafwile kulwa navaHangale navosena vaze vapwile navo, ngocho vavahanyine mulivoko lyavo, mwomwo valombele kuli Kalunga avakafwe kulwa jita. Kalunga avalingilile vyuma vamulembelelele mwomwo vamufwelelele.+
21 Kaha vatambwile vimuna javo. Vatambwile vangamela 50,000, namikoko 250,000, navimbulu 2,000. Vakwachile nawa vatu 100,000.
22 Vatu vavavulu vafwile mwomwo Kalunga wamuchano+ ikiye alwile jita kana. Kufumaho vatwaminenga muze mungalila palanga nomu vavatwalile muufunge.+
23 Vatu vakuchimbwa chamuyachi waManase+ vatwaminenga mungalila yakufuma kuMbashane nakuheta kuMbale-helemone, nakuSenyile, nakuPili yaHelemone.+ Vatu kana vapwile vavavulu chikuma.
24 Ava vakiko vapwile vatwamina vakujizuvo javakakuluka javo: Efwele, naIshi, naElyele, naAzalyele, naYelemiya, naHotaviya, naYachele. Vapwile vaka-kwasa jita vangolo, malunga vakuya puho, kaha nawa vatwamina vakujizuvo javakakuluka javo.
25 Oloze kavapwile vakushishika kuli Kalunga kavakakuluka javoko. Valingile ujila natulunga twavatu veka naveka vamulifuchi,+ vaze anongesele Kalunga kumeso avo.
26 Kutwala muze, Kalunga kaIsalele azondwele Pule Mwangana waAsulya+ (kulumbununa Chilingate-pilinese+ Mwangana waAsulya), ngocho ambachile vaLuvene, navaNgate, nachimbwa chamuyachi waManase, avatwalile muufunge. Avatwalile kuHalahe, nakuHavole, nakuHala, nakukalwiji Ngozane+ kuze vatwama palanga nakulelo lino.
