Mijimbu 2 1:1-17
1 Solomone mwanaNdavichi azaminenga lika hawangana wenyi. Yehova Kalunga kenyi apwilenga naikiye, kaha amulingishile apwenga wamulemu chikuma.+
2 Jino Solomone asanyikile vaIsalele vosena, tupitau twamakombakaji, natupitau twamakulukaji, navaka-kuyula, navamyata javaIsalele vosena vaze vapwile vatwamina vakujizuvo javakakuluka javo.
3 Kufumaho Solomone nalizavu lyosena vakandukile kuchihela chakulunduka kuNgiveyone+ mwomwo kukiko kwapwile mbalaka yakuliwanyina yaKalunga wamuchano, yize vatungile mupambo kuli Mose, ngamba yaYehova.
4 Halwola kana, Ndavichi apwile hanafumisa lyehi Chikasha chaKalunga wamuchano kuKilyate-yeyalime+ nakuchineha kuchihela kuze achilongeselele. Achijikilile mbalaka muYelusalema.+
5 Lijiko lyakulumbila+ lyaunengu lize atungile Mbezalele+ mwanaUli, Uli mwanaHule lyapwile kulutwe lwatavanaku yaYehova. Kaha Solomone nalizavu lyosena vejilenga kuze kulijiko nakulomba.*
6 Jino Solomone alumbile mawana kumeso aYehova. Alumbile vimuna 1,000 kupwa mawana akulumba haze halijiko lyakulumbila+ lyaunengu lize lyapwile kumbalaka yakuliwanyina.
7 Kuheta naufuku, Kalunga alisolwele kuli Solomone. Kalunga ambile kuli ikiye ngwenyi: “Ngulombe vyeshovyo musaka ngwove ngukuhane.”+
8 Solomone ambile kuli Kalunga ngwenyi: “Unasolwela tata Ndavichi zangi yakwilila yayinene,+ kaha unangutongola ami ngupwenga ngumwangana wakumuswana.+
9 Shikaho ove Yehova Kalunga, tesamo lushiko luze washikile tata Ndavichi+ mwomwo unangutongola ngupwenga ngumwangana wavatu vavavulu nge usekeseke wahamavu.+
10 Nguhane mangana nachinyingi+ mangana nguhase kutwaminyina ava vatu,* mwomwo iyaze mwahasa kuyula ava vatu jove vavavulu ngana?”+
11 Jino Kalunga ambile kuli Solomone ngwenyi: “Hakuwana nge evi vikiko unafwila mumuchima wove, kaha nawa kawangulombele vikumba, naluheto, naulemu, chipwe kujiha* vaze vakuhunga, chipwe kulomba kuyoya myaka yayivuluko,* oloze unangulombo mangana nachinyingi mangana uyulenga vatu jami vaze ngunakuhane upwenga umwangana wavo,+
12 ngocho nangukuhana mangana nachinyingi. Nangukuhana nawa vikumba, naluheto, naulemu, vize kanda vachipwengaho lyehi navyo vamyangana vaze vanapungako kunyima. Kaha kulutwe nawa kakweshi kukapwa umwe mwakapwa navyoko.”+
13 Ngocho Solomone afumine kuze kuchihela chakulunduka kuNgiveyone,+ kumbalaka yakuliwanyina, ayile kuYelusalema. Atwalileho lika kuyula vaIsalele.
14 Solomone alikungulwilile lika matemba natuvalu.* Apwile namatemba 1,400, natuvalu* 12,000,+ kaha avilaminyine mujinganda jamatemba,+ kwakamwihi namwangana muYelusalema.+
15 Mwangana alikungulwilile palata yayivulu, naulu wauvulu muYelusalema kwijiva nge malolwa,+ navitondo vyamishitale vyavivulu kwijiva nge misukumole yamuShefwela.+
16 Tuvalu twaSolomone vavalanjilenga kuEjipitu.+ Vaka-kusekasana jamwangana valanjilenga utanga hiutanga watuvalu* handando yoyimwe kaha.+
17 Litemba limwe lyakuEjipitu valilanjilenga najimbongo japalata 600, kaha kavalu umwe vamulanjilenga najimbongo japalata 150. Kaha vakiko nawa vavilanjishilenga kuli vamyangana javaHete, nakuli vamyangana javaSulya.
Kwinyikila Chamwishi
^ Chipwe “nakumwihula.”
^ Hepe., “nguhase kulovoka nakwingila kumeso avatu ava.”
^ Chipwe “myono.”
^ Hepe., “makumbi amavuluko.”
^ Chipwe “navaka-kutambukila hatuvalu.”
^ Chipwe “navaka-kutambukila hatuvalu.”
^ Chipwe pamo, “utanga hiutanga watuvalu kuEjipitu nakuKuwe. Vaka-kusekasana jamwangana valanjilenga ava tuvalu kuKuwe,” pamo kulumbununa kuShilisha.
